كنباوى وكنباوية.. حلقة رقم (30).. مرسى يعطى الضوء الأخضر لأنصاره للانتقام من الإعلاميين

صارت عادة عند "كنباوية" أن تحدث نفسها طوال تواجدها بالمطبخ أو الفسحة، حتى صار هذا الأمر يقلق "كنباوى" عليها، وكم حاول أن يثنيها عن تلك العادة إلا أنه لاحظ أنها فى الأيام الأخيرة قد تمادت فيها أكثر من ذى قبل، فراح يحدثها فى هذا الأمر مستاءً:
"كنباوى": وبعدين معاكى يا"كنباوية"؟ وإيه آخرة ده كله؟ ما تولع يا ستى، حنعمل إيه يعنى، آدى الله وآدى حكمته، إحنا اللى عملنا فى نفسنا كده، إحنا اللى مكّناهم مننا ومن بلدنا، واللى يشيل قربة مخرومة لازم تخر على دماغه، وأديها خرّت على دماغنا، حنشتكى ليه بقى واحنا السبب فى ده كله؟ إحنا اللى انتخبناهم نشرب بقه.. وبلاش تعملى فى نفسك كده، انتى كده حيجرالك حاجة، وانا عايزك، والولاد محتاجينك، مش كل حاجة لازم تنهد، الله يهدها عليهم يا رب، قادر كريم يمحيهم ويريحنا منهم.
"كنباوية": ما تقلقش عليا يا"كنباوى"، أنا بخير، بس أنا بنفّس عن نفسى شوية علشان حطق من جنابى من اللى بيعملوه واللى بيحصل فينا.
"كنباوى": جد جديد تانى يا "كنباوية"؟
"كنباوية": آه يا خويا، بسلامته كشر عن أنيابه وهدد الإعلاميين فى مؤتمر المرأة، وبكده يبقى إدى الضوء الأخضر لأنصاره يعملوا ما بدا لهم فينا، وأول المتمة أنصار أبو اسماعيل حاصروا مدينة الإنتاج الإعلامى من تانى، وكسروا عربيات إعلاميين وضيوف قنوات، وضربوا أبو سعدة وغيره وغيره، دى بقت مهزلة، مابقتش دولة القانون، خلاص يا "كنباوى" بقت ولاية المرشد ومرسى.
"كنباوى": والداخلية عملت إيه؟
"كنباوية": داخلية مين يا "كنباوى"، قول يا باسط، الداخلية موالسة مع مرسى، وكلامها كله فض مجالس، بعتت كام عربية ديكور من قبيل إحياء ماء الوجه، بس مش أكتر من كده.
"كنباوى": دى كده زادت عن حدها أوى، والجيش وضعه إيه؟
"كنباوية": الجيش بيتفرج ياخويا، بيتفرج، أنا نفسى أصوّت على اللى بيحصل فى البلد.
"كنباوى": صوّتى يا اختى صوّتى، وانا حساعدك، حقعد أندب معاكى، بس ده مش حل.
"كنباوية": طيب انت شايف إيه الحل؟
"كنباوى": الحل نخرج تانى للميادين نطلب انتخابات رئاسية مبكرة، نعمل حاجة، نتصرف، مانحطش إيدنا على خدنا لشوية خريجين سجون يتحكموا فينا وفى مصير البلد.
"كنباوية": ماهمه ممكن ينزلوا ألاضيشهم يتخانقوا مع المتظاهرين وتبقى حرب أهلية.
"كنباوى": الجيش مش حيسمح بكده، ساعتها حيتصرف وينزل يعمل حاجة.
"كنباوية": يا ريت ده يحصل، الأمل فى الجيش دلوقتى، هو بس اللى بإيده يشوف للمصريين حل.
"كنباوى": بس الجيش لسه واخد على خاطره من "يسقط يسقط حكم العسكر".
"كنباوية": ماكلها بتغلط، والجيش نفسه كان له غلطاته بعد الثورة، ‘يه حيعاقبنا على اللى قلناه؟ طيب احنا ما عاقبناهوش ليه على اللى عمله قبل ما يسلم الحكم لمرسى والإخوان.
"كنباوى": الجيش برضه له هيبته.
"كنباوية": واحنا ندمنا وعرفنا غلطنا، خلاص المسامح كريم علشان البلد ماتضيعش.
"كنباوى": يبقى البلد كلها لازم تستنجد بالجيش.
"كنباوية": نستنجد ياخويا نستنجد.
"كنباوى": إيه حنرغى ونلُك كتير كده ومش حنتغده النهارده ولا إيه؟
"كنباوية": لأ يا خويا خمس دقايق والأكل يكون قدامك يا عنيا.
"كنباوى": تسلملى عنيكى وايديكى يا"كنباوية"، ويحلها من عنده الحلّال اللى لا بيغفل ولا بينام.
"كنباوية": يسمع منك ربنا يا "كنباوى" آمين.