كنباوى وكنباوية.. حلقة رقم (34).. سلطانية باسم يوسف والنائب العام

"كنباوى" يدخل من باب الشقة فور عودته من شغله متجهًا نحو "كنباوية" وهى تعد طعام الغداء.
"كنباوية": حمد الله على السلامة يا "كنباوى"، ربنا ما يحرمنى من دخلتك عليّا، جايب إيه معاك؟
"كنباوى": بسبوسة وكنافة من اللى انتى بتحبيهم.
"كنباوية": تسلملى وتسلملى مجايبك، وما يحرمنى من خيرك وكرمك ربنا.
"كنباوى": قوليلى يا "كنباوية"، إيه حكاية باسم يوسف ده! أنا شوفته النهارده الناس ملمومة حواليه عند دار القضاء العالى.
"كنباوية": ده مقدم برنامج "البرنامج" الإخوان "قارشين ملحته" ويشوفوا العمى ولا يشوفوه.
"كنباوى": ليه كده! همه بيكرهوه أوى؟
"كنباوية": بيقعد يتريق عليهم وعلى حكمهم، وهارى الريس مرسى تريقة ونقورة.
"كنباوى": وده مش غلط عليه؟
"كنباوية": معاه مصر كلها، وطقم محامين، وبيقروا الحلقات وعارفين يدافعوا عنه إزاى، وهو مش بيقول غير الحق.
"كنباوى": طيب كان بيعمل إيه عند دار القضاء العالى؟ بيصور حلقة جديدة؟
"كنباوية": لأ.. ده النائب العام الإخوانى اللى مش راضى ينكسف على دمه كان باعت له أمر ضبط وإحضار.
"كنباوى": ليه كفا الله الشر؟
"كنباوية": دول متهمينه بازدراء الأديان والتطاول على مرسى.
"كنباوى": يعنى إيه يا "كنباوية" كلمة ازدراء دى؟
"كنباوية": يعنى احتقار يا "كنباوى"، بيقولوا إنه بيتريق على الدين الإسلامى!
"كنباوى": ماهو لو فعلا عمل كده يبقى كافر، وحرام عليه، الناس تحبه ليه؟ وله حق النائب العام يقبض عليه ويحبسه كمان.
"كنباوية": يا "كنباوى" دى أفلام وإشاعات مغرضة، الراجل مسلم زينا، وموحد بالله، بس همه قرفانين منه علشان تريقته على مرسى، قام قالوا يلبسوه أى تهمة علشان يكفروه ويدوا الفرصة للمتشددين إنهم ينقلبوا عليه، ومش بعيد يحاولوا يغتالوه.
"كنباوى": وهو مش خايف على نفسه؟ ده كده بايع عمره.
"كنباوية": فيه بيقولوا إن المليون جنيه اللى بياخدها فى الحلقة الواحدة هى اللى مقوية قلبه كده.
"كنباوى": مليون جنيه فى الحلقة!! يا جاه النبى!! ده كده مش يتريق على مرسى، ده يتريق على أوباما كمان بجلالة قدره، قولتيلى.. وأنا أقول هو جايب الشجاعة دى كلها منين، أتارى الفلوس مقوية قلبه.
"كنباوية": إنت كده ظلمت الراجل، الراجل بيحب البلد وخايف عليها، وبيتكلم كده علشان مصلحتها قبل مايبص على الفلوس أو همه حيدوله كام.
"كنباوى": بس مليون جنيه كتير.
"كنباوية": ماهو كمان بيكسّب القناة اكتر من كده بالإعلانات اللى بتتعمل فى البرنامج، وكمية المشاهدة العالية، يعنى أصحاب القناة مش هبل ولا عبط علشان يرموا فلوسهم كده لله والوطن ومحمد مرسى، دول بيكسبوا أكتر منه.
"كنباوى": كده أنا اتنورت والنبى يا "كنباوية"، ابقى اندهى عليّا اتفرج عليه لما ييجى البرنامج بتاعه.
"كنباوية": بس كده؟ من عنيّا الاتنين.
"كنباوى": أخبار الأكل إيه؟
"كنباوية": حالًا ويكون جاهز، عملالك لحمه راس وممبار.
"كنباوى": تسلم إيديكى يا "كنباوية".