غادة مصطفى تكتب: حوار ارتجالي بين الجدة وحفيدتها

حوار ارتجالي:
(الجدة) تعالي يا حبيبتي عايزة أعرف أخبار الدنيا
(البنت) حاضر يا تيتا افتح لحضرتك التليفزيون
(الجدة ) لا تليفزيون إيه افتحي النت
(البنت) هههههه طيب حضرتك تحبي حاجة معينة
(الجدة) أيوه افتحي فيس بوك بتاعي أحسن خلاص نظري راح وأنا بتفرج على على على
(البنت) على الصور يا تيتا؟
(الجدة) لا على الأزياء الحديثة
(البنت) طيب حضرتك هتتفرجي إزاي دلوقت؟؟!
(الجدة) لا ما أنا اهتماماتي اتغيرت عايزة أعرف الأخبار إيه آخر الأخبار؟
(البنت) حاضر يا تيتا فيه خبر عن ارتفاع الأسعار
(الجدة) أيوه أنا عارفة الخبر ده حاجة تانية بقي
(البنت) ارتفاع سعر البنزين
(الجدة) هو مافيش غير الموضوع ده ده عايزه موضوع تاني
(البنت) حاضر يا تيتا فيه خبر جديد
(الجدة) ها
(البنت) ارتفاع سعر كروت الشحن ؟!
(الجدة) يا بنتي أنت عايزة تشليني؟
(البنت) ليه بعد الشر على حضرتك يا تيتا دي الأخبار وأنا ذنبي إيه بس؟؟!
(الجدة) طيب سماح المرة دي هاتي خبر غيره
(البنت) خبر جديد يا تيتا
(الجدة) قولي
(البنت) خبر عن قناديل البحر في الساحل الشمالي
(الجدة) كويس الخبر ده علشان يحرموا يلبسوا مايوهات قال موضة قال.. اللي بعده
(البنت) ارتفاع أسعار الكهرباء
(الجدة) قومي يا حبيبتي شوفي وراكي إيه
(البنت ) ليه يا تيتا بس عملت إيه
(الجدة ) انا عايزة أخبار مش كل شوية خبر واحد ارتفاع ارتفاع مافيش انخفاض أبدا
(البنت) طيب خلاص أحسن كل الأخبار على نفس الموضوع اه تيتا في خبر جديد أهوه
(الجدة ) صحيح ؟!!! فرحيني
(البنت) أنباء جديدة عن ارتفاع أسعار تذكرة المترو سنة 2020
(الجدة) قومي يا بنتي أنا مش عايزة أخبار أنا هتفرج على التليفزيون
(البنت) تحبي قناة معينة
(الجدة) أيوه أي برنامج فيه حورات ناس بتتكلم عن أحوال الدنيا
(البنت) حاضر يا تيتا أهوه برنامج عن كيف تتغلب الأسرة على ارتفاع الأسعار تيتا تيتا حضرتك مش بتردي ليه تيتا؟!
(الجدة) عندي ارتفاع في ضغط الدم يا حبيبتي.