*التليفون بيرن* ماحدش بيتحرك ولا حد فكر أنه يقوم يرد على التليفون.. غالبا ماحدش بيرد على التليفون غير ماما..لأن إلى بيعوز حد فينا بيكلمه على الموبيل أو النت. التليفون عمال يرن.. زهقت قولت اشوف مين إلى مصمم يتصل دا.. - الو - الو يا حبيبتى ازيك - الحمد لله، مين معايا؟ - اية دا انتى مش عارفانى؟ - لا والله معلش مش واخدة بالى.. - اخس عليكى.. معاكى طنط فيفى يا حبيبتى.. - آة أهلا يا طنط ازيك؟ - الحمد لله يا حبيبتى انتى عاملة اية؟ - الحمد لله - وماما عاملة اية واخواتك؟ - الحمد لله كويسين.. *19 سؤال تانيين اجابتهم الحمد لله * - وبابا..كويس؟ - اة الحمد لله.. - لسة مسافر ولا جه؟ - لا يا طنط لسة مسافر - اة..طب اية مش هيجى قريب؟ - ماعرفش والله يا طنط - لا يا حيبتى ماهو لازم اما يجى أو انتوا تروحوله..كدا مش هينفع *ايوة يعنى هي عايزة اية دلوقتى!* - آة ماحنا بنشوف الموضوع دا يا طنط..حضرتك عايزة ماما صح؟ - اة يا حبيبتى هاتيها كدا اسلم عليها لاحسن هي مابتسألش خالص مش عارفة اية إلى واخدها مننا - للأسف يا طنط هي مش موجودة دلوقتى أول ما ترجع هقولها تكلمك حاضر.. *الحمد لله هتقفل* - اية دا اومال هي فين؟ - مش عارفة والله يا طنط هي في مشوار، بس اكيد أول ماترجع هقولها تكلمك.. - قوليلى صحيح، دهنتوا الريسيبشن زى ما كانت بتقول ولا لسة؟ *ريسيبشن؟! ريسيبشن اية؟..وانا مالى اصلا! هي مش هتقفل ولا اية!* - لا يا طنط لسة - ليه بس هو مش انتوا كلكوا خلصتوا امتحانات..هي قالت هتعملوها في الاجازة..الحقوا بقى اعملوها قبل رمضان.. - آة ضرورى طبعا.. - صحيح، اختك إلى في ابتدائية عملت اية في النتيجة؟ - الحمد لله.. - الحمد لله على كل حاجة طبعا بس جابت كام يعنى؟ - مش فاكرة 97 أو 98 حاجة كدا.. - ما شاء الله ما شاء الله..انتى عارفة هيثم ابن اخويا جاب 78..ابوه منكد عليه..بس بينى وبينك يستاهل..دا دافعله فلوس اد كدا في الدروس.. - معلش بقى يا طنط المهم انهم عدوا وخلاص.. - أة، وانتى نتيجتك طلعت؟ - لأ لسة.. - اكيد هتجيبى امتياز طبعا.. - أن شاء الله..مش فارقة كتير يعنى.. - وكريم اخوكى لسة ماشتغلش؟ *يا رب ارحمنى* - لأ يا طنط لسة.. - لا ماهو مفروض يشد حيله كدا..هو فاكر أن الشغل هيجيله لحد عنده ولا اية؟..لازم يتعب شوية.. -........... - صحيح انتى سيسى ولا إخوان؟ - سيسى ولا إخوان ازاى يعنى يا طنط؟ - انتخبتى مين يعنى؟ - لأ انا مانتخبتش.. - ليه؟؟ كان لازم نتزلى تنتخبى السيسى طبعا! - ماتقلقيش يا طنط انتوا قومتوا بالواجب وزيادة.. - ربنا يستر على البلد..بس هو السيسى هو إلى هيعدلها الصراحة.. -............ - طب يا حبيبتى مش عايزة اطول عليكى بقى.. *يا بنت التيت!..كل دا ومش عايزة تطولى عليا؟!!!!* - لما ماما تيجى بقى خليها تكلمنى *وتكلمك ليه؟! مانتى عرفتى كل حاجة منى خلاص:D * - حاضر يا طنط اكيد... - مع السلامة.. - سلام. *سجدة شكر لله* *ندم شديد على انى رحت ادر على التليفون* و أخيرا ماما جت.. - ماما، طنط فيفى اتصلت بيكى وعيزاكى تكلميها.. -آة كويس فكرتينى.. -ماما....هي مين طنط فيفى دى؟!
