لميس الحديدى : مساء الخير فى البرنامج ده اختياراتنا للفنانين لما بنجيب بنستضيف فنان او فنانة الحقيقة بتبقى اختيارات شخصية جدا يعنى انا بصح كده الصبح واقول انا نفسى اسمع او اشوف فلان او فلانه وبستشير طبعا كل الكاست بتاعى لكن فى النهاية بقول انا بحب اسمع فلان او فلانة واكيد ان جزء كبيرمن الجمهور اتمنى ان يكون ذوقه شبه ذوقى وعلشان كده معظم الفنانين اللى استضفناهم يعنى أعتقد يعنى ليهم تيست معين ليهم ذوق معين ليهم مكانة معينة استضفنا الفنان عمرالشريف الفنان هانى شاكريسرا هشام عباس يعنى نوع معين من الفنانين أعتقد بيقدم حاجة مختلفة هذه الحلقة انا بحب صوتها جدا وبحس ان ادائها مختلف يمكن مش واخده مكانها على القمة زى ما هى تستحق لكن لها مكان لوحده نادية مصطفى هى ضيفة حلقتنا النهاردة ناس كتيرة تعرف سلامات وتعرف الصلح خير وشدونى عينيه ودايما لما كنت قاعدة مع الاصطف اقولهم طب بلاش سمعونى بقى الشباب الجديد بيقول ايه ؟ نكتشف ان احنا فى كتيرمن الجيل اللى موجود دلوقتى منفتكرلوش اغنية واحده فى غنوة تفضل تزن علينا تزن علينا طول النهار فى التليفزيونات وبعد ما تخلص الغنوة ويخلص الفيديو كليب هى الغنوة دى كانت فين ؟ كانت بتقول ايه ؟ تختفى الغنوة وننساها وننسى صاحبها وننسى كل حاجة الا لو كان بيطلع علينا فى اعلانات عاملة كده وعاملة كده نادية مصطفى هى ضيفتنا النهاردة هذه الفنانة صوت جميل لكن لا يخلع ملابسه بعد الفاصل فاصل لميس الحديدى: نادية مصطفى هى ضيفة حلقتنا النهاردة ودى حلقات صيف بنحاول فيها يعنى نسمعكم صوت جميل وشىء مختلف ونبعد شوية عن السياسة وهمومها ومشاكلها مساء الخيريا نادية نادية مصطفى : مساء الخير يا لميس ومساء الخير لكل المشاهدين لميس الحديدى: يعنى منورانا النهاردة نادية مصطفى : انتى اللى دايما منورة ومتالقة وجميلة وبرنامج فعلا بجد ضرب نارعمرك ما قدمتى حاجة سخيفة يعنى فكربتقدمى وثقافة وفن وكل حاجة بجد انا النهاردة بيشرفنى وجودى معاكى لميس الحديدى: اشكرك واحنا كمان المقدمة اللى قلتها فى ناس كتيرة وتلاقيهم طول النهار او هى هو طول النهار على الفيديوكليب وفى الراديو وعلى كل المحطات وبعدين تخلص الاغنية يا نادية نقول ايه اللى حصل ؟ لكن انتم اغانيكم فى جيل كامل انتى منه لسة الاغانى موجودة سايبة اثر برغم ان بصراحة انتى مش على القمة نادية مصطفى: صح معاكى حق يعنى انا طبعا بس والله مش تقصير منى والله يا لميس يعنى انا هقولك على حاجة اولا الكلمة اللى انتى قلتيها دى حقيقة فعلا كل حاجة بقت شبه بعض الاصوات بقت شبه بعض الالحان شبه بعض الكلام والموضوعات بقت شبه بعض هو دا اللى ما بيخليكيش تفتكرى غنوة عارفة ازاى؟ ليه بقى؟ لان دلوقتى المؤلف او الملحن بيستسهل غنوة نجحت من المقام الفلانى بتلاقى كلوا اشتغل من نفس المقام فكرة نجحت بالكلام الفلانى تلاقى كلوا اشتغل من نفس الكلام وبقت المساله بالنسبالهم هما عايزين هيقبضوا كام بس المؤلف والملحن وليا تجارب عديدة والله العظيم اقربها امبارح لميس الحديدى: ايه بقى احكيلى حصل ايه؟ جالك كلام مثلا غريب ولا كده ؟ نادية مصطفى : لا امبارح المفروض انى انا كنت داخلة اغنى تترمسلسل ولحن الملحن والملحن بصراحة من الناس الطيبيين مش هقول اسماء طبعا بعتلى السى دى الاول علشان اسمع الشغل فانا قعدت يومين اسمعه ولسه مهضمتوش عارفة ازاى فوجئت تالت يوم بيكلمنى بيقولى انا سجلت خلاص لميس الحديدى: سجل ايه ؟ نادية مصطفى: سجل المزيكا امتى تحبى تركبى صوتك؟ قلتله بس انا مقعدتش معاك لسه ولا حفظنا مع بعض فى حاجات انا مش عجبانى المفروض نغيرها قاللى لا طب ما السى دى معاكى بقاله يومين وانتى مردتيش علي قلتله حتى لو 10 تيام ومردتش عليك قبل ما تخش تسجل مزيكا المفروض تقولى دا اللى انا اتعودتوا من الملحينيين الكبار ان المطبخ او ورشة العمل حتى قلتله الكلمة دى قلتله انا قعدت مع الاستاذ كمال الطويل الله يرحمه وقعدت مع الاستاذ محمد سلطان ربنا يديله الصحة وطول العمروالاستاذ حلمى بكر الناس الكبار دول لو فى جمله مش مريحانى بيغيروهالى دا حقيقى حتى استاذ عبد الوهاب محمد الله يرحمه كان يبقى قاعد معايا فى الاستوديو وانا بسجل واحنا اتفقنا على كل حاجة خلاص وانا رايحة بقى الصوت علشان اركب صوتى فاقوله ايه اللى جابك يا استاذ عبد الوهاب؟ وهو كانت حالته الصحيه صعبه جدا وحركته تقيله بس ابص الاقيه قبل منى موجود فى الاستوديو يقولى يمكن كلمة ما تعجبكيش كلمة متعجبنيش ازاى يعنى ؟ يقولى ممكن وانتى بتغنيها يكون ليها واقع تانى فمتريحكيش وانتى بتغنيها متريحكيش مش متعجبكيش لميس الحديدى : متريحيكيش الملحن قالك ايه ؟ نادية مصطفى: قالى مش هينفع كده اعمل احسن من كده ولا اكتر من كده ومش هينفع انى انا ادفع فلوس كمان تانى علشان نغير انا خلاص سجلت فطبعا عامل زى ما يكون بيلوى دراعى عارفة ازاى ؟ طبعا اعتذرت عن تترالمسلسل لميس الحديدى: وطبعا دا المتوقع منك بما انك لحن ما حبتهوش نادية مصطفى : طبعا بس لميس الحديدى: دا استسهال يعنى كل الكلام دلوقتى بحبك وهجر وسيبتنى وصاحبتنى ورمتنى ومش عارفه حصل ايه وبعدين ابتدينا ننحرف لكلام جديد بقى فى كلام انا بعتبره سب وقذف والله العظيم يعنى انا بعتبر فى اغانى فيها سب وقذف يعنى فى اغانى فيها تهجم شديد جدا على المراة ومش عايزة اقول قلة ادب انا بعتبرها فى قاموسى قلة ادب بتجيلك الكلمات دى يا نادية؟ نادية مصطفى: بتجيلى الكلمات دى طبعا و بتجيلى الالحان دى وبعدين كمان الكارثة مش بس الكلمات و الالحان بقى التصوير كمان وطريقة التصوير لا يعنى مش بتاعنا خالص لميس الحديدى: ايه مؤهلات المغنيه دلوقتى يعنى انا هجيلك دلوقتى عليكى انتى فى جزء هتكلم عليكى وحياتك وتاريخك وكده لكن ايه مؤهلات المغنية الان 2009 ؟ مغنية صيف 2009 لان على الشتا احتمال المؤهلات تتغير؟ نادية مصطفى: يا رب بس لما الدنيا تبرد يلبسوا لميس الحديدى: فى جميع الاحوال ايه المؤهلات بقى تبقى حلوه بس ولا ايه ؟ نادية مصطفى: مش شرط تبقى حلوة المهم انها تكون عندها الجراة انها تقف قدام الكاميرا بشكل معين لميس الحديدى: والصوت مبقاش مهم ؟ نادية مصطفى : لا مش مهم طبعا الصوت خالص ويبقى معاها فلوش علشان خاطر تنتج غنوة لميس الحديدى: لازم فى المقدمة كده نادية مصطفى اه طبعا لميس الحديدى: وانتى بتقوليلى ان الملحن بيسجل الموسيقى طبعا انا من الجيل اللى كنت اسمع يعنى ان بيجى الموسيقيين ويعزفوا وكده وبعدين نغنى مع الموسيقيين وحاجات كده دا اختفى؟ نادية مصطفى: لا طبعا اختفى جدا للاسف ما هو ده كمان برضه افقد الغنوة الاحساس الجميل انا بحب حفلات اللايف جدا لان لما بغنى مع الفرقة بيبقى مختلف تماما احساسى مع انى اغنى احط الهيدفون والمزيكا متسجله بسمعها بيختلف الاحساس يعنى لازم اغنى مرة واتنين وتلاته لحد ما ادخل فى المودد لكن مع الناس وقدام الناس ومعايا موسيقيين لا بتختلف المواضيع لميس الحديدى: احساس تانى خالص نادية مصطفى : اه طبعا طبعا طبعا وبعدين كمان حاجة تانية قلة بروفات الحفلات دى بقت كارثة ومشكله ليه بقى؟ لان انا طالعة مش واثقة فى الموسيقيين ولا واثقه اللحن ده هيتقال زى ما انا مسجلاه ولا فبياثر على الاداء لا لميس الحديدى: زمان كنتى بتعملى كام بروفة ؟ نادية مصطفى : لا كتير يعنى انا اشتغلت مع الماسيه الاستاذ احمد فؤاد الله يرحمه قد ايه كان دقيق فى كل حرف يعنى وكان بجد بشوف الموسيقين هما نفسهم حابين يتعبوا معاكى لكن دلوقتى لا خلاص مفيش وقت لان عندهم نحت لميس الحديدى: علشان كده كتير من حفلات اللايف مبتبقاش للاسف متقنه يعنى نادية مصطفى : اه لقلة البروفات اكيد مش كل الناس اللى بيهتموا بالبروفات برضه علشان انا يعنى منقعش فى خطا التعميم هنا لا فيه فرق محترمة موجوده بيحبوا يتعبوا لان بيبقالهم اسماء بيخافوا عليها وبيعنيوهم الناحية الفنية اكتر من الناحيه الماديه لميس الحديدى: نادية انتى حاسه ان بعد هذا التاريخ الطويل يمكن من سنة ايه بتغنى ؟ 82 مثلا نادية مصطفى: 84 ، 85 لميس الحديدى: انك مش واخده حقك ان نادية هذا الصوت الجميل اللى هو حقيقى متميز مختلف فيه فترة من الفترات انتى كنتى فى كل الاسماع والاماكن والاذان انتى حاسه انك دلوقتى مش واخده حقك ؟ نادية مصطفى: لا فعلا لميس الحديدى: ليه ؟ نادية مصطفى: لا حاجات كتير قوى يعنى اولها الناحية الانتاجية وانا بصراحة بقول الله يكون فى عون المنتجين علشان دلوقتى حصلت كارثة اسمها الدون لود من على النت لكل الاغانى يعنى النهاردة الاغانى قبل ما بتنزل على السى دى او الكاسيت فى السوق بتلاقى الولاد معاهم الاغانى فطبعا بيخسر خسارة فادحة المنتج يعنى هينتج ليه ؟ لميس الحديدى: سوق الكاسيت اضرب نادية مصطفى: طبعا صناعة الكاسيت لازم يبقى فيه رقابة ولازم يعملوا كنترول على الموضوع ده لان دى كارثة بجد دا حقيقى والنهارده حتى الناس اللى كانه بيبيعوا بملايين الكاسيتات مبقتش مبيعاتهم زى الاول لميس الحديدى: هل كمان مالكيش فيديو كليب كفاية؟ نادية مصطفى : تمام برضه لان الكليب دلوقتى بقى مكلف لميس الحديدى: والمقومات كمان مش قصدى مقومات جمال بس قصدى مقومات اداء نادية مصطفى: لا انا لي شروطى فى التصوير اللى انا بصوره لميس الحديدى: بيقبلوها المخرجين ؟ نادية مصطفى: اه المخرجين اللى انا اشِتغلت معاهم قبلوا حقيقى يعنى انا اشتغلت مع الاستاذ محمد سامى اساسا محستهوش ان هوعايز انى انا.. لميس الحديدى: لابانيو ولا روف نادية مصطفى: لا لا لا خالص لميس الحديدى: فكرتى فى موضوع البانيو ده ؟ نادية مصطفى: طب ما هو عندنا فى البيت يعنى لازم قدام الناس لميس الحديدى: تغيير تغيير وعلى الروف وتحت الروف وكده طب الفيديو كليب انتى مش موجودة على الفضائيات كمان بالقدر الكافى اللى يخلى الزنانة تشتغل بصراحة يعنى نادية مصطفى: وليه مش عارفة المفروض القنوات ديه على فكرة المفتاح فى ايديهم هما ليه بقى لان هما دايما بيعتمدوا على شكل معين من الاغانى لو انتى لاحظتى كل الاغانى ديه نوعيه معينة من الاغانى طب انا صورت اللى جاراللى مثلا او الليلادى او ما تقوليش فى وشى واهديتها للقنوات دى متذعتش انا بتمنى وبوجه رسالة بجد من خلالك يا لميس وبرنامج محترم وبقول للناس كلها ولاصحاب القنوات الفضائية دى يا ريت نفكر بس فى الناس اللى عاوزين يسمعوا بجد الفن الجميل مش انا بس لا انا هانى شاكر محمد الحلو على الحجار مدحت صالح انغام شيرين الناس دى كلها غاده رجب فى اصوات كتير امال ماهر انا متاسفه انا بقول اسماء ساعات ممكن انسى محدش يزعل منى لكن بقول يا ريت الناس دى تتواجد الى جانب الناس التانية انا ما بقولش نوقف الناس التانية لكن ده يبقى جنب ده والناس هى الحكم الناس هى اللى تقول احنا عايزين ده ومش عايزين ده صدقينى انا لما ببقى ماشية فى الشارع كل الناس بتسالنى انتى فين يا نادية ؟ لازم تكونى موجوده على عشان تريحينا من لميس الحديدى: بس دى مسئولية عليكم يعنى خلينى اقول ان في اتهام لجيلكم الجيل اللى انتى اتكلمتى عليه ده يمكن كان قبليك بشوية على الحجار بس كان معاكى محمد ثروت محمد الحلو كل الناس دى انتم برضه سبتوا الساحة يعنى زى ما تكونتوا اتخضيتوا كده فى هجمة شرسه دخلت علينا كل قلع وانطلق وكلمات وقعت ما يمكن دا ذوق الناس انتم ما حاربتوش يا نادية نادية مصطفى : لا دا مش ذوق الناس خالص بالعكس الناس بتسالنا انتم فين ؟ انتم ليه مش موجودين؟ احنا موجودين بدليل انى انا عملت اغانى جديدة واهديتها للقنوات ديه متذعتش يا لميس يعنى التقصير ده يعتبر من مين منى انا ولا منهم هما ؟ بلاش دايما دايما بيتذعلى انا عندى اغانى كتير عاملها جديدة فى الاذاعة مثلا هقول الاذاعة ومش هخجل من ده لكن لما بيجى المسئول عن البلاى ليست يذيعولى سلامات الصلح خيريذيعولى الحاجات اللى الناس سمعتها لميس الحديدى: علشان كده حتى لما بسال الولاد الشباب اللى هما فى الاصطف مثلا بقولهم تعرفوا ايه لنادية؟ قالولى سلامات والصلح خير قلتلهم لا يا جماعة دى عندها اغانى كتيرة جدا نادية مصطفى :لان هما فعلا كده ما بيذيعوش للناس هما الاغنيتين دول بس انا طبعا فى حفلاتى اللى بعملها دلوقتى بحاول على قدر ما يمكنى بقى احيانا فيه اغانى مينفعش تقوليها فى حفلة لكن بقيت مضطرة انى انا اقولها فى حفلة علشان اسمع الناس انى انا عندى اغانى كتير لميس الحديدى: هل مثلا وجود عدد من محطات الراديو يعنى دلوقتى بقى عندنا الاغانى ونجوم اف ام وراديو مصر دى كلها محطات الى حد ما غنائية بتذيع اغانى دا ممكن يزودلكم شوية الانتشار ؟ نادية مصطفى : اكيد لميس الحديدى: ما دام صاحب المحطة او القائم على المحطة بيفهم شوية نادية مصطفى : اه لميس الحديدى: ليه يا نادية مش مع شركة انتاج ؟ نادية مصطفى : علشان زى ما قلتلك ان شركات الانتاج دلوقتى صعبة دلوقتى يقولوا اه او يوافقوا على ان يبقى مطرب حقيقى معاهم لازم يبقى في مطربة معينة بمواصفات معينة او اذا كان حتى مطرب كويس يروحوا حاطلنوا حاجات معينة علشان خاطر الكليب بتاعة يتذاع فى القنوات دى لميس الحديدى: لكن اكيد يعنى جاتك عروض يعنى فى شركات كتير فى محسن جابر فى روتانا فيه شركات كتيرة يعنى مفكرتيش نادية مصطفى :انا اشتغلت مع الاستاذ محسن جابر وكان بيشرفنى انى انا اشتغلت معاه روتانا ما اشتغلتش معاهم خالص ومن الناس المقربين جدا ليا الاستاذ محسن جابر بس انا زى ما قلتلك انا مشفقة على المنتجين النهاردة من اللى حاصل فى سوق الكاسيت على فكرة اوعدك قريب انا معايا منتج بس مش هقول دلوقتى لميس الحديدى: طيب دا خبر اهو نادية مصطفى : دا انا عندى اخبار كتير ليكى حلوه لميس الحديدى: هنخش فى الاخبار دى لكن خلينى اتكلم على الذوق العام للناس يمكن كمان انتم متهمين ان انتم شكل الاغنيه ما بيتغيرش صحيح انتى من الناس اللى قدموا الاغنية المتطورة اللى هى رتمها سريع مزيكاتها اسرع الى حد ما لكن يمكن الشباب عايزين يحسوا بنفسهم اكتر فى غناكم وعشان كده بيحسوا بنفسهم اكتر فى غنى تامر و دندن وفنفن وكده يعنى يمكن بيحسوا كده اكتر نادية مصطفى : هو مقياس نجاح الغنوة اختلف شوية النهاردة يعنى زمان لما كنتى تسمعى غنوة تقولى الله من اول مرة لكن دلوقتى علشان تحكمى على غنوة لازم تسمعيها مرة واتنين وتلاتة لازم تشوفيها العين احيانا برضه بيبقالها اثر كبير الابهار اللى بتشوفيه فى الفيديو كليب ده عامل من عوامل نجاح الغنوة فهو دا الموضوع انا عاملة غنوة مثلا اسمها محتاجة دى الحان محمد ضياء نفسى تتصور عاملة غنوة جميله تيجى نبدا من جديد للاستاذ محمد سلطان امنية عمرى انها تتصور لانها غنوة فعلا حاسه انها ممكن ترجعنى تانى موجودة على الساحة الغنائية لان فيها غنى فيها نعومة فيها يعنى بحس كده غنوة رقيقة لميس الحديدى: طب ما تغنلينا منها حته نادية مصطفى : حاضر لميس الحديدى: دا محمد سلطان دا شىء عظيم جدا دا هو اللى فاضل الحقيقة يعنى ربنا يديله الصحة هو والاستاذ حلمى بكر نادية مصطفى : اه طبعا يا رب يديله الصحة من الناس المقربين جدا لقلبى كفنانيين وكبنى ادميين ، تيجى نبدا من جديد ، نمشى تانى ايد فى ايد ، تيجى نبدا من جديد، نمشى تانى ايد فى ايد ،فى براح ارض السماح ، والخصام يبعد بعيد ، لا ندم على وقت راح ، لا الم ناره تقييد، لاندم ندم على وقت راح ، لا الم ناره تقييد ، ابتسملى وقولى طيب ، وانت عارف قلبى طيب ، يوم ما ترجع عايز يعيد تيجى نبدا من جديد، لميس الحديدى: الله فيها ريحة محمد سلطان احساس محمد سلطان مدرسة هو مدرسة هخرج فاصل قصير يا نادية نرجع تانى جميل برضه الغنى الحلو فاصل نادية مصطفى : نادية مصطفى يعنى بقايا من الفن الجميل فى رايى الشخصى جدا يعنى نادية فى ناس سحبوا البساط مننا يعنى الفن اللبنانى والفن الخليجى شوية بقى اكثر اهميه فى الوطن العربى ؟ لميس الحديدى:لا مقدرش اقول دا لان يعنى وجود الاصوات العربية يعنى الى جانب الاصوات المصرية دا بالعكس دا بيخلق منافسة وبيبقى لصالح الغنوة ولصالح العمل الفنى لميس الحديدى: ايوه بنسمع وكل حاجة لكن الحقيقة يعنى ان الفنانة اللبنانية سعرها اعلى يعنى لما تيجى مثلا تطلبيها فى حفلة تلاقى الفنانة اللبنانيه سعرها اعلى زى ما بقولك عايزة اقولك حاجة تانية طلتها مختلفه دا تقصير منكم ولا فيه حاجة غلط؟ نادية مصطفى : زى ما احنا اتفقنا فى الاول ان الفيديو كليب النهاردة بقى عامل كبير من عوامل النجاح والفلوس هى اللى بتخلق ده ماشى هما وراهم جهات انتاجيه وراهم مديرين اعمال يعنى بيلمعوا الموضوع عارفة ازاى ؟ صناعة النجم دى مش حاجة سهلة ومفيش فنان يقدر يعمل ده لوحده لميس الحديدى: نادية عندها من يصنعها ولا لا؟ نادية مصطفى: فى البدايات اه لميس الحديدى: مين ساعدك على الوصول ؟ نادية مصطفى: اولا لازم اذكر فى البداية الاستاذ محمد سلطان يعنى ليه فضل كبير عليَ مهما قلت مش هوفيه حقه هو يعنى مدرستى فى الفن ومدرستى فى الحياه وكل حاجة انا بتعلم منه حاجات كتير دا حقيقى بجد الاستاذ حلمى بكر برضه من الناس اللى وقفوا جنبى مفيش مناسبة ولا فيه مرة بيقعد فيها الا بيتكلم ساعات يعنى انا مرة فى برنامج قال كلمة خلانى اعيط وانا قاعده بجد والله فانا عمرى ما بنسى ابدا الناس اللى وقفت جنبى يعنى كانت رئيسة التليفزيون ساعتها السيدة العظيمة ساميه صادق برضه ليها فضل كبير علي لانها اولا كان ممنوع فى اى حفلة على الهوى انه يطلع صوت جديد انا اول حفلة طلعت فيها كانت على الهوا ودا ماكنش عرف فى مصر لميس الحديدى: كنت ايه نجحت فى امتحان على ما أعتقد ؟ نادية مصطفى: لا انا دخلت لجنة استماع الاول لميس الحديدى: هو فيه لجنة استماع ما خلصنا من لجنة الاستماع نادية مصطفى: ما هى دى الكارثة جديد ما النهارده فى اصوات كتيرة موجودة على الساحة ممتحنوش من قبل ناس بيفهموا بجد فى الفن لميس الحديدى: مين اللى امتحنك فى لجنة الاستماع ؟ نادية مصطفى: اسٍتاذ عبد الحليم نويرة الله يرحمه استاذ حلمى بكر ربنا يديله الصحة يارب والاستاذ محمد سلطان الاستاذ عبد العظيم محمد لميس الحديدى: اساتذه نادية مصطفى:اه طبعا انا حتى وانا فى الجامعة لجنة التحكيم اللى طلعتنى مطربة جامعات مصر وانا فى الجامعة طالبة كانت منار ابو هيف الاستاذ عبد العظيم عبد الحق ناس برضه ليهم ثقلهم فى الفن عارفة ازاى ؟ لميس الحديدى: دلوقتى طبعا هما بيبعتوا السى دى يعملوا الغنوة ويبعتوا السى دى وخلاص متهيالى مفيش لجان استماع الموضوع ده انتهى خلاص نادية مصطفى: الموضوع ده انتهى خلاص لازم يبقى فيه تدخل من النقابة ويبقى فيه رقابة من الاذاعة حتى يعنى اتمنى ان مش اى غنوة تتحط فى الاذاعة لميس الحديدى: سمعت ان انتى وانا بقرا السيرش عليكى ان قعدتى تدربى سنة ونص مع الاستاذ سلطان لحد ما طلعتى تغنى ؟ نادية مصطفى: اه لميس الحديدى: تدربى سنه ونص؟ نادية مصطفى: اه لميس الحديدى: تدربى على ايه بوكاليز وكده ؟ نادية مصطفى: اولا هو ودانه لوحده متخصصه لتدريب البوكاليزاسمها مدام راكيل لميس الحديدى: مشهورة دى ؟ نادية مصطفى: اه انا فوجئت ان فيه ناس فنانين كبار كانه بيروحولها يعنى فايزة احمد الله يرحمها اول مرة اشوفها ماكنش عند الاستاذ محمد سلطان انا شوفتها عند مدام راكيل بتتمرن فدى كانت نموذج لميس الحديدى: بتعلم ايه مدام راكيل طول عمرى نفسى اشوفها نادية مصطفى: هى بتعمل مرونة كده للصوت يعنى عضلة الصوت دى زى اى عضلة فى الجسم الكلام ده بتاع الاستاذ محمد سلطان بصراحة هو اللى قالى كده لو ممرنتهاش هتبقى جامدة عارفة ازاى ؟انا لو حطيت ادينى فضلت حاطه ايديا شوية ومحركتهاش فترة هتقف توجعنى لو انا جيت احركها بعد كده هتوجعنى فالصوت لازم يبقى مرن فهى بقى تخصصها ده تعلمنى ازاى اخد نفسى وانا بغنى فين وازاى؟ لا المسالة مش كده علشان انا بنصح كل حد عنده موهبة ربنا ايدهاله المسالة مش موهبة بس لا فى حاجات تانية كتير في عوامل كتير لميس الحديدى: مين علمك تقفى على المسرح ؟ نادية مصطفى: استاذ محمد سلطان لميس الحديدى: ازاى قالك ايه؟ نادية مصطفى: قالى لازم تبقى واقفه مفرودة مينفعش ان المطربة تبقى واقفه التليفون عامله كده مثلا لازم البعد المسافة بينك وبين التليفون تبقى انتى حاساها ان فى العالى تبقى لازم تبعدى فى القريب فى الواطى لازم تقربى والمسافة دايما بينك وبين المايك بشبر كده متخشيش قوى على المايك اسمعى المزيكا وهما بيغنوا علشان متخرجيش عن الصول لا فيه حاجات كتير اتعلمتها منه لميس الحديدى: فيه حد بيعلم ناس كده دلوقتى ؟ نادية مصطفى: الناس اللى عندهم ضمير المفروض يعلموا ده يعلموا الاصوات الجديدة لان احنا بجد فى حاجة لاصوات جديدة جميله علشان متتقلش الكلمة دى ان احنا هينسحب من تحت رجلينا البساط لميس الحديدى: لكن ارجع تانى لموضوع الفنانيين اللبنانيين والعرب الكلمة عندهم مختلفة خلينا اقولك ان كثير من الاغنيات الخليجيه الكلمة بالذات الكلمة حلوة قوى يعنى فيه غنى كلامه مختلف انا بلاقى الكلام عندنا بقى سطحى جدا ممل جدا نادية مصطفى: منقدرش نقول كل الاغانى لميس الحديدى: معظمها يا نادية معظمها شبه بعض دا غير الاصوات كلها شبه بعض هقولك انا وجهة نظرى فى الاصوات دلوقتى نادية مصطفى: لا معاكى حق زى ما قلتلك الاستسهال خلاهم يقولوا اى مواضيع ولو فى اتنين واقفين بيتكلموا مع بعض كده وطلع لفظ حتى لو كان سافل يطلع فى غنوة ودا يعنى حرام ان احنا نعمل ده لان ودننا تعبت بجد والله العظيم انا ساعات بسمع اغانى بقول ايه ده يا ولاد معقوله فى كلام بيتقال كده؟انا مش مصدقه والحمد الله ولادى طالعين رافضين لى ده لميس الحديدى: البنات بيسمعوا ايه ؟ نادية مصطفى: بيسمعوا عبد الحليم لميس الحديدى: لا يا شيخه نادية مصطفى: وحياة ربنا لميس الحديدى: دا انا لما بسمع عبد الحليم بيقولى يييييه نادية مصطفى: لا على فكرة البيت عليه عامل كبير قوى يعنى لو كل البيوت وكل اب وام ميسمحوش لولادهم يفرضوا عليهم انا اللى افرض على ولادى فى الاول وانا متاكده ان هما هيحبوه لميس الحديدى: اه بس دا بيت فيه نادية مصطفى واركان فؤاد لازم يسمعوا عبد الحليم نادية مصطفى: بالظبط زى اجهزة الاعلام عندنا لازم نقول انه هتفرضوا على الناس مستوى معين من الاغانى هيبقى هو ده فانا لو سمعتى ولادى ام كلثوم وعبدالحليم والناس القمم دى طب هيسمعوا حد تانى ازاى ؟ مش هيسمعوا لميس الحديدى:ايه اسوا اغنية سمعتيها قريب مش لازم تقوليلى مين انا هقولك لما تقوليلى امارة كده انا هقولك ايه اسوا اغنيه سمعتيها قلتى يا نهار ابيض ازاى ؟ نادية مصطفى: طب والله لفظ مقدرش اقوله والله العظيم لفظ مقدرش اقوله وللاسف ان كل الناس اللى بيعملوا الشغل ده اول ما تجيبيهم وتتكلمى معاه اصل دا موقف فى فيلم فكان لازم اقول ده ليه؟ علشان ايه؟ طب ما احنا سمعنا من الافلام سواء افلام عبد الحليم او ليلى مراد او كل الناس اللى اشتغلوا فن بجد عمرنا ما سمعنا لفظ مبتذل او يضايقنى لما بسمعه لميس الحديدى: صحيح طب معانا اتصال من الفنان الكبير هانى شاكر مساء الخير يا استاذ هانى هانى شاكر : اهلا اهلا ازيك يا لميس لميس الحديدى: اخبارك ايه ؟وحشنا والله هانى شاكر : انا الحمد الله ربنا يخليكى لميس الحديدى: انا لسه بفكر نادية بالمرة اللى انت كنت منورنا فى البرنامج وعلى الموتوسيكل هانى شاكر: اه بالظبط كده لميس الحديدى: وجيت لنا على الموتوسيكل ممكن نعلى بس صوت الاستاذ هانى لو سمحتوا يا جماعة استاذ هانى لسه كنت بتكلم مع مدام نادية على فكرة المعركة اللى انتم لازم تقودوها كفنانيين محترمين يعنى ضد الاغنيات الجميلة اللى موجودة اليومين دول انت شايف المعركة دى ممكنة ولا خلاص هما كسبوا المعركة والغلبة لهم يعنى ؟ هانى شاكر : لا بصى انا طبعا بحب اسلم الاول على نادية حبيبة قلبى الفنانة الجميلة اللى عايز اقول ايه رمز من رموز الغناء فى مصر نادية مصطفى والله بتكلم بجد والله بصى يا لميس انا بقول لا يصح الا الصحيح يعنى اكيد الجمهور فى وقت من الاوقات هيزهق من التفاهات دى وهيزهق من السخافات اللى احنا شايفنها بحجة ان الناس المفروض انها تغنى القنوات الفضائية أعتقد برضه انها هتزهق فى يوم من الايام معرفش امتى لكن المفروض هتزهق فى يوم من الايام الحاجات الغريبة المسفه اللى احنا شايفناها على فكرة فيه ظاهرة خطيرة جدا اليومين دول يا لميس انه النهاردة معظم اللى بيتفرج على القنوات الفضائية بيوطى الصوت وبيتفرج على مناظر لميس الحديدى: شبه محطات البورنو والله العظيم لميس الحديدى: انا بشوف دا شىء قاتل انتى بتلغى تلت تربع العمل وشايفة بس الصورة مجرد بس الصورة بتتلوى وترقص فى جنينة ولا فى اوضة نوم ولا فى حمام لميس الحديدى: بانيو بانيو هانى شاكر: ولا فى بانيو اه والله بقى هو دا المهم للى بيشوف لكن لا الصوت مهم ولا الكلام مهم ولا اللحن مهم احنا لغينا الغنوة كده القنوات دى فعلا وصلتنا لمرحلة ان حقيقى الفن بقى ناقص الفن بقى اجزاء مهمة فيه بقى هوالفن النهارده فى القنوات دى بقى صورة يعنى انا مش عارف انا بقول برضه اكيد الناس هتزهق ولا يصح الا الصحيح لميس الحديدى: يعنى في ناس بيقولوا ان هذا الفن للاسف بيعبر عن الجيل بيعبر عن جيل الشباب يمكن احنا ذوقنا مختلفة يمكن الجيل ده عايز يشوف ده هانى شاكر: هو لو الجيل ده عايز يشوف ده احنا المفروض نصحح له مفاهيمه ونصحح له سمعه يعنى المفروض الفن كده الفن المفروض انه بيرتقى بذوق الناس مش بينزل بذوقه لى اسفل السافلين يعنى دا المفروض اللى الفن يعمله لكن كونى انى انا النهارده انى انا استسهل كقناة فضائية وافضل هاتك يا رقص من صباحة ربنا 24 ساعة بدون ما اسمع لا كلام ولا لحن دا مدمر لمهنة الغنى وللغنى عموما العربى مش بس المصرى لميس الحديدى: ايه اسوا اغنية سمعتها مؤخرا يا استاذ هانى لسه كنت بسال نادية ايه اسوا حاجة سمعتها؟ هانى شاكر: والله اسوا حاجة سمعتها بامانة بعد بحبك يا حمار واخده بالك افكارك خليها تاكليك لميس الحديدى: ايوه اشكرك افكارك خليها تاكليك اشكرك يا استاذ هانى ايوه صحيح ايه افكارك خليها تاكليك؟ نادية مصطفى: انا مش عارف ماكنتش متخيل ان احنا نوصل بالتعبير لهذا المستوى المتدنى من المعنى للاسف الشديد لميس الحديدى: هو مستوى متدنى طبعا انتى عارفة دى غنوة مين ؟ غنوة الاستاذ تامر حسنى هانى شاكر: وانا بحبه على فكرة تامر بالمناسبة لكن بقول ان لكل جواد كبوه انا أعتقد ان دى كبوه كبيرة لتامر وهو بشكل او باخر لميس الحديدى: لا كان فيه قبلها غنوة تانية عايزة اقولك عليها برضه دى كبوه كبوه وكبوه هانى شاكر: لا دى اكبر كبوه لميس الحديدى:كان فيه غنوة تانية برضه مش عارفه ايه هقولك عليها بقى هاقولك بعدين هانى شاكر: لكن انا أعتقد ان تامر الفترة اللى جايه بعد وجوده فى عالم الفن مع محسن جابر فنان ومنتج محترم أعتقد انه تفكيره دايما هيروح للشىء الصحيح انا متفاءل بده لان هو الحقيقة شاف رد الفعل عند الناس وعند زمايله وعند كل العاملين وعند كل الناس اللى حواليه ان الكلام مش لازم يبقى سهل قوى مش لازم الكلام اللى بنقوله واحنا بنهزق بعض فى الشارع ينفع يتغنى والولاد الصغيرين يحفظوه لميس الحديدى: وبعدين احنا لازم نبطل نزهق بعض فى الشارع بالكلام ده لازم نشد الناس لمرحلة تانيه هانى شاكر طبعا طبعا دا المفروض ان الفن بيعمل كده لميس الحديدى: اللى بيكتبوا الكلام كمان يا استاذ هانى الحقيقة الغنوة دلوقتى بقى عليه عبء كبير جدا وانا راى ان كثير من الكتاب بقم بيقعدوا قاعده كده متفهمش عاملة ازاى يكتبوا كلام عجيب هانى شاكر: والله بصى يا لميس هقولك حاجة انا ازعم انا بيتهيالى ان الكلام ده كلام تامر برضه وانا بنصحه كاخ اكبر له انه لا يعنى يعتمد بجد على مؤلفين تانيين هو ملحن هايل ومطرب هايل انه انا بقى ما يكنش عندى من الخبرة على انى انا الف كلمات انا معتقدش انى هردى لنفسى ان انا الف والحن واغنى فلازم يعتمد على المؤلفين الجمال اللى موجودين على الساحة ويوفر مجهوده هو للحن للتلحين وللغنا متهيالى كده لميس الحديدى: انا بشكرك استاذ هانى شاكر هانى شاكر: ونادية نورتنى ونورت الدنيا كلها معاكى يا لميس نادية مصطفى: انت اللى منور ومتالق دايما هانى شاكر: وياريت تسمعنا حاجة نادية بقى حاجة جميله كده لميس الحديدى:اه ما انا هقولها دلوقتى تسمعنا حاجة جميلة استاذ هانى شاكر دايما غيرانه ليه قيمة فنان لو راى ودا مهم جدا فى الفنانيين ان هو ليس فقط له صوت وقيمة باقية الحقيقة ومستمرة ومتجدد دايما لكن انا بعتقد دايما ان لو راى اشكرك يا استاذ هانى هناخد تليفون تانى وبعدين نسمع نادية مين معايا ؟ الاستاذ الفنان محمد ضياء مساء الخير يا استاذ محمد محمد ضياء: مساء الفل ازيكم لمس الحديدى: ازى حضرتك محمد ضياء: عاملين ايه ؟ لميس الحديدى: والله كويسين اخبار المزيكا معاك ايه؟ محمد ضياء: الحمد الله تمام لميس الحديدى: بيقى فيها خناقات واسامى ناس استاذ محمد يعنى نادية مصطفى صوت مهم ليه فى رايك مش واخده حقها قوى على الساحة فى المكان الذى تستحقه تقصير منها ولا من الانتاج ولا منين بالظبط ؟ محمد ضياء: اولا نادية صوت مصرى لاول مرة انك انتى تقول على صوت ليه جنسيه او ليه بلد لميس الحديدى: اه انت حاسس ان هو صوت مصرى تخيل معاك حق محمد ضياء :يعنى حاجة مثلا تقولى الهرم تقولى لميس الحديدى: لا هى فعلا صوت مصرى انتى جبت فعلا الديسكربيشن الصح هو صوت مصرصوتها فعلا احساسه مصرى محمد ضياء : متلاقيهاش عند حد كتير لميس الحديدى: صحيح صحيح محمد ضياء : صوت لى شخصيه طبعا غير طبعا ما شاء الله ربنا يحميها صوت احساسه عالى جدا وقوى وبعدين مين اللى قال انها مش واخده مكانها ؟ لا واخده المكان ده بس انا لماقعدت معاها كذا مرة نادية يعنى بتقولى انتى مش شايف اللى بيحصل فى الساحة ؟ومش شايف اللى بيتقال؟ ومش شايف اللى بيتغنى؟ فبتحصل دايما بتلاقى حاجات دايما بتعدى كده زى زوبعة فبتلاقى الناس الكويسه تستنى شويه لغاية ما تعدى ونادية ليها شغل جديد ماشاء الله حلو هنصوره ان شاء الله فيه غنوة اسمها محتاجة تاليف الاستاذ بهاء الدين محمد ولحنى وتوزيعى وان شاء الله هتتصور دى غنوة من الاغانى بجد اللى انا نادرا ما اعمل غنوة زى كده انا حاببها جدا لو مثلا تسمعنا حاجة منها يا ريت لميس الحديدى: حاضر هخليها تسمعنا حاجة منها بس عايزة اسالك انت عندك امل يعنى انت ملحن وبيجيلك كل الاصوات الاول خلينى اقولك بتجيلك اصوات من اللى هى عايزة تركب طبقات ومن اللى هى وحاجات كده اللى هى عايزين بقى نخش الاستوديو ونشوف بقى هنعمل ايه طبقة فوق طبقة وفجاه يطلع صوتها حلو او صوته حلو وهو صوت اساسا ما يتسمعش ولا فى الحمام انا بفكر اغنى يا استاذ محمد بجد تفتكر لو غنيت انا يبقى فيه امل فى الحياه يعنى؟ محمد ضياء : يا ريت نعملك شريط ونعبى شريط هقول لحضرتك حاجة طبعا ما فى شك ان التقنيات دى والحاجات الحديثة دى كلها اكيد طبعا بتحسن الصوت انما مش بتغير الصوت يعنى ما ينفعش فى حاجة اسمها اداء وفى حاجة اسمها طرب فى حاجة اسمها غنى يعنى لو نادية عايز تحطلها حاجة لو فى حاجة شوية خفيفة حاجات زى كده يعنى حاجات لا تذكر انما فى اصوات عايزة 300جهاز علشان اصلحلهم صوتهم ومفيش فايده لميس الحديدى: لو جالك صوت من دول بتعمل ايه بقى؟ محمد ضياء: ما بشتغلش دلوقتى شغل قليل جدا علشان كده لميس الحديدى: بس بيجولك يعنى فيه حد بيجيلك يقولك ؟ محمد ضياء : دا اكيد بيجى كتير طبعا لميس الحديدى: بتعتذر ولا بتقولهم ايه ؟ محمد ضياء: دا لازم طبعا الواحد ميضيعش كل اللى عمله فى حياته علشان غنوة ولا اتنين للناس دى لميس الحديدى: صحيح اشكرالفنان محمد ضياء وهو ملحن ايضا لو ايضا يعنى باع الحقيقة الحانه كلها متميزة جدا نادية مصطفى : لاهوماشى فعلا على خطى الملحنين الكبار يعنى محمد بيخاف جدا على اسمه وعلى شكله وفعلا بيعمل فن بجد وبعدين انا لما قعدت معاه وبقوله اللى حاصل واللى مش حاصل والانتاج وكده والله العظيم عملى غنوة ومسالنيش مين هيدفع ؟ ولا مين يعنى مسالنيش على حاجة خالص وانا بهاء الدين محمد وهو مؤلف عبقرى يعنى كل فكرة وفكرة ماشاء الله عليها بجد لميس الحديدى: سمعينا حاجة من محتاجة وبعدين انا عندى طلبات بقى ايه فايزة احمد وعبد الوهاب وحاجات كده بقى فيه عندنا طلبات كتيرة بس نسمع محتاجة الاول وبعدها الفاصل وبعد كده نكمل نادية مصطفى: محتاجة أقرب قوى مشتاقه ، والشوق قوى وانا جنبك ، بتعب قوى من غيرك بتعب قوى ، جنبك بتهدى اى نار ، جنبك بيحلو المرار، مش قادرة يعنى باختصار والشوق بيفرح بيكى اوى ، جنبك بتهدى اى نار ، جنبك بيحلو المرار ، مش قادرة يعنى باختصار ، الشوق بيفرح بيكى اوى ، محتاجة قرب قوى . لميس الحديدى: الله فاصل ونرجع مع الصوت الجميل فاصل لميس الحديدى:مرة اخرى مع نادية مصطفى صوت جميل يعنى له بصمة فى اذانا جميعا نادية انتى اشتغلتى زى ما كنا بنتكلم مع ملحنين كبار واشتغلتى مع الشباب بتحسى بفرق ايه ؟ يعنى من غير ما نقول ان الشباب وحشين يعنى؟ نادية مصطفى: اه فيهم طبعا كويسين احنا لسه قايليين على محمد ضياء دلوقتى من الملحنيين اللى ماشين على خطى الكبار وكويس قوى ان الملحن او المؤلف او المطرب دايما يبقاله كبير عارفه ازاى لميس الحديدى:انا بعتبر دا ينتمى للجيل جيل وسط جيل عارف الاساسيات والاصول والحاجات نادية مصطفى: لا ومن الجيل الجديد اللى اشتغلت معاه حد برضه اسمه وليد سعد من الشباب كويس قوى لما بيركز بيعمل حاجات حلوة قوى لميس الحديدى: لما بيركز نادية مصطفى: اه لميس الحديدى: لا انا قصدى ايه الفرق فى الشغل؟ بتحسى مثلا برهبه وانتى قاعدة مع حلمى بكر محمد سلطان طب احكيلى على بليغ حمدى اشتغلتى مع بليغ حمدى؟ نادية مصطفى: اشتغلت مع بليغ حمدى طبعا عملت معاه حاجة اسمها الا رؤياك وعملت حاجة اسمها يا جمال اسكندريه هى نفس التيمة اللى عاملها فى ريا وسكينة يا جمال اسكندرية ما شيكوا على البحر غيه الاستاذ عبد الوهاب محمد كانت عاجباه التيمة اوى قاللى ايه رايك نكتب عليها قلتله انا موافقه وعاملهالى على اسكندرية فعلا بجد من الاغانى الحلوة قوى لميس الحديدى: طب هنقف بس ثانية واحده لان معانا الموسيقارالكبير يعنى واحد من عمالقة الفن فى الزمانات واللى فاضل لينا يعنى دلوقتى الاستاذ محمد سلطان مساء الخير محمد سلطان: اهلا مساء الخير يا فندم لميس الحديدى: يعنى دا شرف كبيرلينا ان حضرتك تكون فى مداخله معانا يعنى احنا استمتعنا سنوات طويله بفن جميل يعنى الحقيقة محمد سلطان : ربنا يخليكى اشكرك جدا لميس الحديدى: استاذ محمد الاول خلينى اسالك على نادية انت نادية دى دربتها وعلمتها و كبرتها رايك فيها ايه ؟ محمد سلطان: شوفى هقول لحضرتك على حاجة انا دايما راى فى نادية مشكوك فيه لانى انا متحيز لها اوى يعنى وهذا اولا انا قبلتها عن اقتناع وهذا الاقتناع زاد مع مرور الوقت وهى عن جدارة تستحق هذا الاهتمام منى يعنى ان انا كنت مهتم بيها جدا لانها فعلا لسه حضرتك دلوقتى كنتى بتقولى بصمة عجبتينى قوى فى الكلمة دى فعلا بصمة اللى هى الشخصية فا نادية طلعت للناس بشخصية مميزة غير اى حد تانى وبالتالى بقى لها شخصية مميزه بمجرد ما الاذن تلتقى بصوت نادية مصطفى تعرف ان دا صوت نادية مصطفى على طول ودا شىء يهمنى جدا النجم اذا ما كانش مميز اذا كان ده ملحن ولا مطرب ولا شاعر ولا اى فنان يبقى مالاقاش اللى يحدد شخصيته لميس الحديدى: قولى بقى انت فين ؟ محمد سلطان: نعم انا فين ايه؟ لميس الحديدى: مش فين دلوقتى انت فين ليه الحانك مش كتيرة زى الاول ؟ محمد سلطان :لا دا شىء طبيعى طبعا انا شوفى انا هقول لحضرتك على حاجة احنا لينا عدد ضخم من الالحان فى الفضائيات بره فى البلاد العربيه فى اوروبا فى امريكا فى كندا فى كل حته فانا انا النهارده علشان اعمل حاجة تلاقى صدى وتلاقى ودن تسمعها علشان الفنان يحب دايما النجاح انا اغانى كلها الحمد الله ناجحة 99% معملتش حاجة الحمد الله فشلت انما انا دلوفتى عايزه اعمل حاجة ابقى شايف ان فيه قدامى منافسه المنافسه تخلق نجاح لميس الحديدى: انت شايف ان مفيش منافسه يا استاذ محمد سلطان؟ محمد سلطان : فيه فيه ناس كويسه انما مش دا الجو ابقى سعيد قوى انى انا ابقى بنافس لميس الحديدى: اه طبعا حضرتك كنت موجود فى جو فيه اصوات زى فايزة وورده ونجاة واصوات كثيرة جدا قيل المنافسه بينكم فظيعة وبين الملحنين كمان محمد سلطان: وعبد الحليم حافظ لميس الحديدى: عبد الحليم حافظ اه طبعا كانت منافسه شرسه يعنى محمد سلطان: كانت منافسه جميله من غير منافسه مش ممكن يعنى الثراء لميس الحديدى: المشكلة دلوقتى انك مش لاقى اصوات ولا حاسس ان الالحان كلها محمد سلطان : لا انا لازم اقول راى بصراحة انا بسمع فيه اصوات كويسه مش عايز اذكراسماء لكن فيه ناس كويسه لميس الحديدى: زى مين مثلا؟ محمد سلطان لا مش هقول اسماء لان انا ممكن اقول اسم وانسى اسم تانى مبقولش اسماء وفيه ناس مستواها مش قوى اولا اى انسان عنده عزة نفس ومتمسك بمصريته قوى لازم يقول رايه بصراحة لميس الحديدى:اه بس يا استاذ محمد ما دوركم بقى ودورالاصوات الكويسه ودورالملحنين الكباراللى زى حضرتك اللى هما يجروا الناس بعيد شويه عن الهلث يعنى محمد سلطان : لا لا مينفعش هقولك ليه احنا ايدانهم التاريخ واضائنلهم قدامهم الشعاع اللى هما منوا يقدروا يستمدوا منوا النجاح يقدروا يعرفوا احنا ازاى نجحنا يعنى ؟ كل واحد يكون لى قدوه من غير القدوة ما ينفعش كلنا عندنا قدوة انا قدوتى عبد الوهاب السنباطى واخده بال حضرتك ايضا الاجيال دى لازم يبقى ليها قدوه ميقدرش يقول انا واللى قبلى ما ينفعش فيه ناس ما بتعترفش بعبد الوهاب للاسف الشديد اللى بيفكر هذا التفكير انا بعتبره صفر صفر مالوش قيمة فين ناس كويسه جدا موجوده تبشر بالخير لكن السواد الاعظم وحش ليه ؟ انا بسمع الاغانى كلها من مقام واحد اللى هو الكرد مش معقوله الحانها كلها متشابهه لميس الحديدى: ما هو مفيش لحن اساسى هو فيه بتاعه كده لوحدها كتله كده محمد سلطان : انا هقول لحضرتك حاجة يعنى انا اهم حاجة فى كل دول بتكلم عن الشخصية انا علشان اقدراعمل شخصية الملحن الاقيه مختلف عن غيره لما الاقيهم كلهم بيدوروا فى فلك واحد وفى مقام واحد اللى هو الكرد اللى هى كرد النوى والحان كلها متشابهه لميس الحديدى: ايه اللى حصل ده بالعكس دلوقتى الملحنين منفحتين جدا على بره المفروض بيخشوا الانترنت بيسمعوا حاجات بيسمعوا حاجات اجنبيه بيشوفو سات لايت انتم ماكنش عندكم ده محمد سلطان: لا هقول لحضرتك حاجة احنا ما طلعناش من فراغ يعنى الموهبة لوحدها من غيرثقافة متنفعش لازم الملحن اللى بيشتغل يبقى فاهم بيقول مقام ايه بيغير من المقام لى مقام تانى ازاى عارف اللحن ده اللى بيكتبوا ده بيتكتب ازاى؟ تاريخ بتاعه ايه؟ دا فين ملحنين مش عارفين الدليل يعنى ايه للاسف الشديد انا امتحنت فى اللجنة ملحنين مش عارفين بقوله الدليل دا كرد يا بنى مش عارف قاللى مش عارف قلتله دا كرد طيب الدليل بتاعه ايه مقلش لميس الحديدى: دا فى لجنة الاستماع؟ محمد سلطان : اه فى لجنة الاستماع من 25 سنه لميس الحديدى: هو لسه فى لجنة استماع يا استاذ محمد ؟ محمد سلطان : اه طبعا لميس الحديدى: والله دا احنا لسه بنقول خلصت لان بنسمع اصوات على الراديو محمد سلطان: لا لا دول يا مدام انتى اولا استاذ ممتازة جدا وناجحة وانا بحييكى على البرنامج بتاعك لميس الحديدى: اشكرك محمد سلطان : انا بشوف حاجات بتدعوا الى العجب يعنى حاجات غريبة جدا مش عايز اظلم ناس فى ناس كويسه بس خايف اذكراسماء وانسى اسماء اخرى لان فيه كذا واحد كوي قوى وفيه شعراء كمان كويسين جدا فيه اصوات حلوة لميس الحديدى: بس لما بيغنوا بقى يا استاذ محمد عندى مشكلة كلهم بيغنوا ما بيفتحوش بقهم تلاقيهم بيغنوا ايييه كده يعنى تحسى ان الغنا كل الناس شبه بعض محمد سلطان : ماهم معظمهم شبه بعض لان كل لابس فستان التانى او بدلة التانى وبالتالى مفيش تجديد وبالتالى مفيش تطور التطور يعنى ايه ؟التطور من الاحسن الى الاحسن التطور مش التغيير لمجرد التغيير انى انا اغير اعمل واقول ان دا تطور لا مش تطور اصل وبعدين علشان اصل الى العالمية لازم اتمسك بشخصيتى وانغمس فى المحلية علشان اللى بره يسمعونى يلاقونى مختلف عنهم انما لما انا اقلد اللى بيتقال بره ويبقى كل شغلى ايقاعات ودرامزوعالية جدا وصوت فى الخلفية وكل الاغانى زى بعض وواحد بيغنى والكورال يرد وراه ومش عارف ايه يرد وراه ودبب ورقص يبقى انا يبقى انا بحط الغناء والرقص فى قالب واحد مع ان الغناء دا شىء واللحن و المزيكا دا شىء معنوى والرقص دا شىء مادى لميس الحديدى: ماهما بيعلوا الطبلة والدرامز والحاجات دى محمد سلطان : يعنى هما بيقصدوا ان الناس ترقص اللى عايز يرقص يرقص لوحده لكن اللى عايزيسمع يسمع لان اول حاسة ربنا خلقها لنا هى الاذن ربنا قال السمع والابصار يبقى الاذن هى المتلقى الاول اما الرقص دا للعين ما يبقاش كل شغلنا الرقص والتنطيط ومش عارف ايه وحاجات يعنى دا تطور يعنى هو احنا يعنى بنتطور بنغزو العالم الخارجى بيضحكوا علينا والله الامة العربية كلها كتير جدا ما مشيوش فى سكتنا واحنا ماشين فى طريق انا شايف انه سد للاسف الشديد انا بقول ده من منطلق غيرتى على مصر وعلى الاغنية وعلى الموسيقى العربية اللى هى اغنية ثرية بالمقامات حاجة تانية خالص يعنى هى موسيقى دى بتتذاع فى فرنسا موسيقى عن مصر عن النيل عن الاهرام عن الصحراء عن الجمل عن مش عارف عن الناى الحاجات دى كلها بعبر فيها عن الريحه المصريه اللون المصرى مش اللون بتاعهم هما يعنى بعملهم مزيكا مش بعملهم المزيكا بتاعتهم ما هما عندهم دى انا ما اضفتش حاجة انا بديهم روحى انا بديهم مصر لميس الحديدى: انا بشكرك شكرا جزيلا الاستاذ الكبير الموسيقار الكبير محمد سلطان على هذه المداخله يعنى قيمة كبيرة جدا فى الفن المصرى بشكرك شكرا جزيلا يعنى هرونى بقى الشباب عايزين يسمعوا حاجات كتيرة جدا سمعينا بقى صوتك فى كتيرمن فايزة ولحنك محمد سلطان نادية مصطفى: حاضر بس لا صوتى مفيهوش حاجة من فايزة هى فين وانا فين لميس الحديدى: اختارى بقى غنوة لفايزة نادية مصطفى : ليه يا قلبى ليه بتحلفنى ليه ، اخبى الحكاية وادارى عليه ، ليه يا قلبى ليه بتحلفنى ، اخبى الحكايه وادارى عليه ، موصفلوش عذابى وحيرتى شبابى ، وحبه اللى خدنى من اهلى وصحابى ، وازاى بس ادارى وازاى يبقى جارى واتشوق اليه ، ليه يا قلبى ليه بتحلفنى ليه ، ليه يا قلبى ليه ز لميس الحديدى: يا سلام يا سلام نادية بتتطبخى؟ نادية مصطفى : طبعا طبعا لميس الحديدى: اللى بتتجوز سورى لازم تتعلم الطبخ نادية مصطفى: اه الحمد الله لميس الحديدى: بتطبخى ايه ؟ ايه احسن حاجة بتطبخيها؟ نادية مصطفى: بطبخ بكل لغات العالم لميس الحديدى:لا متعادنيش ارجوكى نادية مصطفى: لا مقدرش بصى بقى انا ماكنش ليا فى المطبخ خالص بجد والله وكان عندى حد بيجى يطبخ يعنى فمره حبيت افاجا اركان قلت انا هعمله اكلة بايدى واركان بيعشق الاكل لما تحطى قدامه الاكل بقى لميس الحديدى: سورى بقى ؟ نادية مصطفى : لا فظاع بجد وهما بيفننوا فى شكل الاكل حتى الترابيزة بتاعة الاكل كده تبقى فظيعة فالمهم رحت عملاله شوربه وعملتله مش فاكره بس كان ايه ساعتها المهم طلعت الشوربه حادقة رحت حطيت سكر علشان اخبى الحداقة بتاعتها طلعت حدقه قوى يعنى فالمهم قالى انتى حاطه ايه على الشوربه دى قلتله مفيش حاجة ايه الشوربة عادية مالها وحشه ولا ايه اوعى ؟لا دى جميلة جدا بس انتى حاطه عليها سكر صح بقيت مستغربة هو ذواق بشكل غيرطبيعى يعرف هو بياكل ايه حتى لو حطيتي له حاجات فى بعض بيبقى عارف مكونات الحاجة من الطعم لميس الحديدى: فا اضطريتى تتعلمى بقى ولا ايه ؟ نادية مصطفى : اضطريت اتعلم دا على التليفون ماما اعمل ايه ؟ احط ايه ؟ وانا حابه اعمل ده يعنى عايزة ارضيه لميس الحديدى: همسه بنت نادية مصطفى همسه مامى بتطبخ؟ همسه : الو لميس الحديدى: ازيك انتى عندك كام سنة اساسا دلوقتى ؟ همسه: انا عندى 18 لميس الحديدى: 18 بقم عرايس همسه مامى بتطبخ ؟ ولا ما بتطبخش ومامى بتضحك عليكم ؟ همسه : بتطبخ تحفه بجد انا مش قادرة اقولك لميس الحديدى: تحفه بتغنى وتطبخ كمان دا ايه الهنا ده يعنى فى البيت مامى بتغنى وبابى بتغنى وكمان بتطبخ ما شاء الله همسه: بجد الكبده بتاعتها تحفه والفته اللى بالزبادى يعنى كل حاجة بصراحة مقدرش لميس الحديدى: اوعى تتخنى يا همسه ها خلى بالك شايفه مامى رفيعة ازاى اوعى تتخنى مامى وبابى بيغنوا على طول بيردوا على بعض بالغنى مثلا كل الناس متخيله بيت فى اركان وفى نادية يقعدوا بقى يتخانقوا ويتصالحوا بالغنا؟ همسه :هما ساعات بيغنوا يعنى بيت موسيقى لذيذ مسلى يعنى مفيش صمت كده فى البيت يعنى على طول تلاقى حد بيغنى فى الحمام حد بيغنى فى المطبخ حد بيغنى كده يعنى لميس الحديدى: طب ما حدش بيوقف حد مفيش مثلا مامى بتقول لبابى مثلا كفايه بقى زهقت انا عايزة اطلع صوتى شوية اركان صوته يعنى مشاء الله صوت جبل جاهورى يغطى على البيت كله ؟ همسه: لا لما حد بيتكلم فى التليفون ياجماعه يقولوا وطى صوتكم شويه دى الحاجة الوحيدة اللى بتحصل لميس الحديدى: نفسك تغنى يا همسه ولا ايه ؟ همسه : اه يعنى الحمد الله نادية مصطفى: اه صوتها حلو لميس الحديدى: والله العظيم نادية مصطفى : اه لميس الحديدى: فى حلقة بقى استضيفك علشان وقت البرنامج خلص فانا نفسى اسمع صوتك مستعده ان هما يطلعوا يغنوا نادية مصطفى: اه اه يا ريت لميس الحديدى: معندكيش مشكلة ؟ نادية مصطفى : لا خالص لميس الحديدى: مش حاسه ان الوسط والسخافه وال ؟ لميس الحديدى: لا انا عندى اتنين بيغنوا بصراحة هما التلاته بيغنوا بس فيروزوهمسه صوتهم حلو وعندهم الجراه بس ريم صوتها حلو ومعندهاش جراه بتترعب يعنى انا ممكن اخش عليها وهى بتغنى تروح واقفه دا انا ماما ابدا يعنى خجلها هو اللى بيمنعها بس لكن عندى فيروز وهمسه أعتقد ان هما هيبقوا حاجة لميس الحديدى: نفسك فى ايه ؟ نادية مصطفى: حاجات كتيرة قوى لميس الحديدى: يعنى زى ايه ؟ نادية مصطفى: ان شاء الله فى المرحلة اللى جاية القريبة اوى دى تكون عودة قوية لنادية كفنانة وتكون مش اقل من البدايات يعنى البداية كنت شايفاها قويه جدا الحقيقة وانا فعلا زى ما كنت بس مش تقصير منى ولا حاجة انا هحاول وهعمل اقصى ما فى وسعى ان انا اكون موجودة المرحلة اللى جايه دى بشكل باذن الله افضل كمان من ال لميس الحديدى: تنضفى ودان الناس شويه والناس تسمع غنى حلو طب تقفللنا بقى بمسافات انا بحب مسافات هما بيحبوا سلامات انا بحب مسافات فمعلش اختيارات ديكتاتوريه جدا دى كانت حلقتنا مع الصوت الجميل نادية مصطفى علشان اسيبكم بقى مع مسافات واقولكم باباى الفترة اللى جايه هنعيد مجموعة من افضل حلقتنا هناخد اجازة شويه بس هنعيد مجموعه من افضل حلقتنا كل سنه وانتم طيبيين اتفضلى نادية مصطفى: مسافات مسافات بينى بينك مسافات، مسافات مسافات بينى وبينك مسافات تتعب فيها السفاير وتتوه التيارات وتضيع الجوابات من بعد المسافات وتضيع الجوابات من بعد المسافات مسافات مسافات
