«أم العيال» قصيدة للشاعر أبوالحسن حسن عكاشة

كتر خيرها دي أم عيال
ماشية وشايلة وراها جبال
طالعة تلف فعز الحرّ
جارَّه حملوها وقلبي انجرّ
لُقمة عيش وما ليها مفرّ
وعرق نازل مابيتشال
***
علشان عايزه تربي عيال
لفت كونها آلاف أميال
لون الطيبة في قلب حبيبة
قلبي بدمعُه عليها آهو سال
***
أكبر فرحة ف يومها تبيع
علشان تطعم طفل رضيع
جبنة وسمنة ودي المواضيع
اللي بتبني عليها آمال
***
نادر لما تعيش أفراح
خايفة ف بكرة تلاقي جراح
أكبر حلم تنام ترتاح
وإن عيالها بأحسن حال
***
وكتَّر خيرها دي أم عيال
ماشية وشايله وراها جبال