أزمة انقطاع الكهرباء تخيم على قرى الغربية والأهالي: "حسوا بينا"

تطل أزمة انقطاع التيار الكهربي برأسها من جديد بمحافظة الغربية؛ حيث يتم انقطاع التيار الكهربي في شتى مراكز المحافظة لمدة تتجاوز الخمس ساعات يوميًا عن المنازل والمصانع والمنشآت التجارية، مما أدى إلى سخط الأهالي.
تنقطع الكهرباء يوميًا في وقت الظهيرة، فضلًا عن وصولها بكميات أقل على الرغم من ارتفاع الفواتير الشهرية للكهرباء، بالإضافة إلى انقطاع المياه وشبكات الاتصال والإنترنت بسبب انقطاع الكهرباء.
تقول ابتسام رمضان، ربة منزل: "الكهرباء بتقطع كل يوم أكتر من 5 ساعات ولازم كل يوم تقطع وقت الظهر، ومش بيراعوا الحر اللي احنا فيه، ولا بيراعو الغلبان اللي ممعهوش يشترى مولد كهرباء".
ويعلق محمود سليمان، جزار: "احنا هنلاحقها منين ولا منين يعني، الأسعار غالية وحالنا واقف، كمان كل يوم اصلح الثلاجات بألف والفين جنيه؟ يرضى مين دا ياناس، أنا بقيت بشغل مولد الكهرباء طول الليل عشان بخاف النور يقطع واللحمة تبوظ حسوا بينا ياحكومة شوية".
وأضافت شيرين حسن، ممرضة: "انقطاع الكهرباء زاد على الحد والناس زهقت بجد من المشكلة دي، وتعبنا من كتر الشكاوى للمسؤولين ولكن كالعادة بلا جدوى".
ويصرخ أحمد رجب، صاحب محل بقالة، قائلا: "حرام اللى بيحصل فين دا ياحكومة التلاجة لسه مصلحها الشهر اللي فات ب200جنيه، ومطلوب أصلحها دلوقتي ب500جنيه، دا غير الفواتير والحالة النايمة، انجدونا مش عارفين نصرف على عيالنا".
واختلف معهم محمود ربيع، محامي، قائلًا: "الحكومة هتعمل إيه ولا إيه؟ اصبروا على ما قناة السويس تنفتح والدولة تشوف اللي وراها وبعدين ابقوا قولوا مطالبكم واشتكوا، وأي حد هينتقد الحكومة دلوقتى مش عاوز الخير للبلد".