أهالي الغربية ل"رصد": وصلة نور من عين السيسي تحل مشكلتنا

بعد استمرار انقطاع الكهرباء

يشتكي أهالي محافظة الغربية من انقطاع المتكرر للتيار الكهربائي، بالتزامن مع موجات السقيع التي تمر بها البلاد.
واشتكى المواطنون من غلاء فاتورة الكهرباء على الرغم من انقطاع الكهرباء لساعات طويلة.
ففي مدينة السنطة، يشتكي الأهالي من انقطاع الكهرباء لمدة تتجاوز الخمس ساعات يوميًا منذ منتصف ديسمبر الماضي.
ويقول عصام نوح، أحد اهالي السنطة ل"رصد"، الحكومة بتريح نفسها وبتخاف على التيار العالي بتاع الكهربا فبتقطعها عننا"
وتابع "في الصيف كانو بيقولونا تخفيف أحمال، واستحملنا، دلوقتي بقا إيه السبب، بيقطعوها في فتره امتحانات، والطلبة مش عارفة تذاكر"
تضيف شهندا على" الكهرباء بتقطع أكتر من 4 ساعات بالنهار، لما دة حالها في الشتا في الصيف كانوا بيقطعوها ليه؟ "
ويوضح هيثم سامح، مالك محل ألبان، ل"رصد" أن فاتورة الكهرباء الخاصة بمحله تتجاوز 1500جنيهًا، وتصل أحيانًا إلى 3000 جنيها، معقبًا: أومال لو مبتقطعش نص اليوم كانت الفواتير بقت كام؟
ويؤكد أحمد معوض، مالك محل بقالة بالسنطة، إن انقطاع الكهرباء المتكرر قد تسبب في تعطل ثلاجة المحل، واضطر لتصليحها بأكثر من ألف جنيه، متابعًا "فاتورة الكهربا جاتلي الشهر ده 400 جنيه، طب مين يتحمل بقا عطل التلاجة كل شويه؟"
تقول نورهان عتمان، طالبة بالصف الأول الثانوي: "اليوم قصير جدًا والامتحانات بدأت، ولما بنبدأ مذاكرة بيكون الليل دخل، فالكهرباء بتقطع طول الليل، نذاكر إزاي؟"
وأضافت "أنا واخواتي، واحد فيهم ابتدائية واتنين في إعدادي، بنمتحن، وكل واحد فينا بيبقى قاعد بيزاكر على شمعه، ياريت الحكومة تشوف حل لحد ما نخلص الامتحانات حتى"
وأضاف عثمان خلف، صاحب محل ملابس: "الكهربا بتقطع كتير ، بس برده فيه اختراع اسمه "ديزل" مش كل المشاكل نطلب من الحكومة تحلها، لو كل بيت جاب ديزل بألف جنيه ولا ألفين المشكلة هتتحل، ومش هنشوف حد بيشتكي تاني" .
وفي المحلة الكبرى، أكد الأهالي أن الكهرباء تنقطع في اليوم أكثر من 5 مرات بشكل منفصل معربين عن سخطهم من تسبب انقظاع الكهرباء في فساد الأجهزة الكهربائية في المنازل والمحلات، وغلاء الفواتير.
يوضح محمد حسن، طبيب ومالك لعيادة طبية بالمحلة، أن أسعار فواتير الكهرباء تضاعف بشكل كبير خلال الفترة الماضية، رغم سوء الخدمة وانقطاعها المتكرر.
ويضيف، إن أغلب أيام الأسبوع بقفل العيادة لأن الكهرباء بتقطع أكتر من ساعتين في المرة".
وألقى جمال فتحي، باللوم على قارئ العداد في ارتفاع فاتورة التيار الكهربائي، قائلا: "الراجل اللي بيقرأ العداد بيحط رقم تخييلي من دماغه، فعشان كدة الفواتير بتيجي غالية"
وتابع :"بالمنطق كدة الكهربا ما بتجيش تقريبا طول الليل، وفي الآخر ألاقي الفاتورة 250 جنيه، يبقى أكد اللي بيقرأ العداد هو اللي غلطان"
تقول محاسن متولي، ربة منزل خمسينية العمر، "فواتير الكهربا بقت نار، الأول كنا بندفع 20 جنيه، بقت 60، وبعد كده بقت 80 ، ودلوقت عدت ال100 ونفس الاستخدام واحد مفيش حاجة زادت، غير أن الكهربا بقت بتقطع كل يوم أكتر"
وفي طنطا، اشتكى الأهالي من ازدياد انقطاع التيار الكهربائي، بالتزامن مع موجات البرد القارصة التي تمر بها البلاد.
يقول سيد ناجي، موظف، "الكهربا بتقطع كل يوم أكتر من 6 مرات، والمفروض الجو بارد وافراد الأسرة متجمعين كلهم، يقطعو الكهربا ليه؟ ، ماهو أصلا مفيش أحمال ولا تكييفات ولا تلاجات شغاله"
يقول عصام الروبي "السيسي كل شويه يقولنا انتو نور عيني، يعني نوصل وصلة نور من عيون السيسي ونور بيها بيوتنا؟"
كما تشتكي عصمت حمدي من انقطاع الكهرباء بعد المغرب يوميًا في الوقت الذي يتواجد في أولادها في "الدروس الخصوصية"، وتقول :"بناتي بيكونوا في الدروس وقت المغرب والكهربا بتقطع كل يوم في نفس التوقيت ده، ببقى قلقانة على البنات، ومش عارفه أتصرف"
وتضيف ل"رصد" :"حسبي الله ونعم الوكيل، يعني لا هيبقى تعليم للولاد ولا كهربا يذاكرو فيها؟"
وتساءل سيف أحمد، طالب بالمرحلة الإعدادية، ساخرًا،"هو لسه الراجل اللي بياخد 20 جنيه من أيام الرئيس مرسي عشان يقطع الكهرباء موجود؟، وتابع "مش السيسي بيقول إحنا نور عينيه، أنا بقوله خليلك نور عنيك وهات لنا نور الكهربا".