بلدنا سادة ولا زيادة

وما بلدنا الا مقهي كبير .. تقصده رغم أنفك لتشرب ما تحب وماتكره .. ليس علي مزاجك وانما علي مزاج القهوجي .. وفي النهاية تدفع وانت زي الباشا من غير فصال او نقاش وتاني يوم تيجي غصب عنك وتشرب تاني وتدفع تاني ..واوعي تفكر تقف تستني الباقي هايقولك إحمد ربنا علي الباقي في جيبك ..والباقي في حياتك.
مرة القهوجي يسقيك قهوة سادة .. ومرة يتكرم عليك بشوية سكر ويخليها زيادة.
يوم يسقيك الهنا والسعادة وفي نفس اليوم يسقيك المر بالصودا.
عمرك ماتقدر تقول للقهوجي فرجني علي " المنيو" وعمرك ماتقدر تختار.. اللي يتحط قدامك تشربه وانت ساكت لأن مش من حقك الاختيار..هوانت كنت اخترت اسمك ولا حتي اخترت مدرستك ..وهو انت اخترت نوعية دراستك اوحتي مهنتك ..يبقي تشرب وانت ساكت..وتدفع وانت ساكت.
قاعد مكانك وانت بتسمع القهوجي بيقول "واحد ألم وصلحه" و"اتنين عذاب وريحه"و"تلاته عناب وفسحه "
شايفه بيرص حجرين قلق وتوتر علي فحم الشيشة .. ومتابعه وهو بيعصرالقلوب في الخلاط مع الليمون
متفكرش تغير الترابيزه لأن العيب مش في الترابيزه ..ممكن يكون العيب فيك انت انك اختارت قهوة غلط ..ويمكن العيب في القهوجي اللي بيفرض عليك ذوقه وبعد مابيفرض عليك ذوقه بيفرض عليك تسعيرته .. يعني هاتشرب بمزاجه وهاتدفع بمزاجه .
في القهوة ممنوع تقول رأيك .. لوعايز تتفرج علي الماتش هيشغلولك خطاب الريس ولوقلت عاوز اشوف المسلسل هايقولولك ماقلتش ليه من الاول .. ده ميعاد برنامج الافضل ..ساعتها هاتقول الافضل اني أروح بيتنا ..وبرضه هايقولك ادفع تمن الفرجة ..هاتقول انا ما تفرجتش .. هايقولك بس الناس اتفرجت عليك وانا باحرق دمك ..فرجه دي ولا مش فرجه يامتعلم يابتاع المدارس ..وتاني هاتدفع وانت ساكت
طب ايه اللي جابرك علي القهوة دي ..ما تشوف غيرها.
هاتقولي مش عارف ليه كل ما أروح غيرها بارجع احن لها ..
يمكن تكون مش أنضف قهوة وأكيد مش أوسع قهوة .. بالعكس دي ممكن تكون اسوأ قهوة وممكن يكون أسوأ قهوجي وممكن يكونوا أسوأ زباين.
لكن تقول ايه.. الكيف غلاب وباين عليا أدمنتها .. بحلوها ومرها بحبها .. ومهما ألف بارجعلها .
وهاقول تاني .."هات واحد شاي ياعم القهوجي" .. وهابتسم باستمتاع وانا سامعه بيقول "وعندك واحد سحلب وصلحه"