شهر رمضان: إعلانات.. وبينها مسلسلات!!

راجع من التراويح النهاردة تعبان قوي.
نفسي في قهوة. - ..... لو كنت باعرف أعملها حلوة زي قهوتك كنت عملتها لنفسي، بس أنتي عارفه مايعدلش دماغي إلا القهوة بتاعتك.
- حاضر.
شكرا، ها، إمتي حتعملي القهوة؟
- لما تيجي الإعلانات.
إمتي يعني؟
- ثواني، اسكت بقي عاوزه أشوف الحتة دي.
الحمدلله، الإعلانات جت.
- أما أقوم بسرعة أعمل لك القهوة، قدامي خمس دقايق
. يا سلام إنت حاسباها.
- آه المسلسل ده بالذات فيه إعلانات كتير، كل سبع دقايق مسلسل تيجي خمس دقايق إعلانات، بس لو المسلسل بدأ نادي علي.
برافو عليكي القهوة جت قبل الإعلانات ما تخلص، اوعي تكوني لكلكتيها.
- أهو المسلسل رجع، إيه ده كل مرة يعملوا كده.
عملوا إيه؟
- المسلسل خلص من قبل الإعلانات، ورجعوا علي التتر. فين الريموت؟
عاوزه قناة إيه؟
- عاوزة قناة.. عاوزة.. نسيت، استني لما أجيب الأجندة، هي الساعة كام دلوقتي؟
إيه الأجندة دي؟
- أصلي كاتبة فيها مواعيد المسلسلات اللي باشوفها.
للدرجة دي، مع إنك مش غاوية مسلسلات أصلا.
- طول السنة ما أحبش أتفرج علي مسلسلات، مش عارفة إيه اللي بيحصل لي في رمضان.
طب بالمناسبة بتشوفي كام مسلسل.
- تسعة.
ياخبر، تجيبي وقت منين، ده كل مسلسل بالإعلانات بتاعته ياخد ساعة، يعني تضيعي تسع ساعات كل يوم في المسلسلات، مش كتير شوية؟
- دي مسألة نسبية.
مش فاهم.
- القنوات فيها السنة دي تسعين مسلسل، يعني أنا باتفرج علي عشرة في المية بس، وسايبة تسعين في المية.
يا حرام، إبقي شوفيهم بعد رمضان يا ستي، ياما حيتعادوا.
- قلت لك مش باتفرج علي مسلسلات إلا في رمضان.
يبقي عندهم حق بقي.
- مين دول.
الممثلين والفنانين، عندهم حق يصمموا كلهم إن يبقي لهم مسلسلات في رمضان.
- طب بس بس، أهو ده أكتر مسلسل بأحبه، أقعد أتفرج عليه معايا، حيعجبك قوي.
ماشي، أصلي أنا بأحب الممثل ده قوي.
- أحكي لك اللي فاتك؟
لا مش مهم، ياما شفنا مسلسلات من نصها وفهمناها كويس، إيه ده كلهم بيشربوا سجاير، مش قالوا حيبطلوا الحكاية دي عشان ما يشجعوش الناس علي السجاير.
- البطل ما بيشربش.
غيرتي القناة ليه، مش تستني لما نتفرج.
- أصل أنا باتفرج علي مسلسلين في نفس الوقت، الإعلانات لما تيجي في مسلسل أتفرج علي التاني شوية، وزي ما أنت قلت بأفهم الاتنين. وده برضه مسلسل حلو.
هو فيه إيه، مش عاجبني السجاير، آلاقي دول بيشربوا خمرة!!
- ما هم متضايقين شوية.
وده كلام يعني لو بدل ما يقعد مع صاحبه في بار قعد معاه عالقهوة، بلاش القهوة، كافيه شيك كده علي قد مستواه، حتفرق إيه في الأحداث.. إيه ده وكمان حشيش!!
- اتفرج وأنت ساكت بقي، الحمدلله الإعلانات جت عشان أرجع للمسلسل التاني، إيه اللي حصل هو اتغير كده ليه؟!
اتغير إزاي يعني
ومين فيهم؟
- هو البطل مش كان صعيدي، إزاي بقي باشا كده، أكيد حاجة مهمة فاتتني.. يا خسارة.
أبدا ماكانش صعيدي.. الحتة اللي شوفتها معاكي كان باشا برضه.
- آه، آه، "سوري"، ده في المسلسل التاني، أصل البطل ده نفسه عامل أكتر من مسلسل، الواحد اتلخبط.
تصدقي إن مخك تعبان، وأنا الحق علي أني سمعت كلامك وقعدت معاكي أتفرج.
- هو أنا لوحدي اللي باتفرج علي المسلسلات، ما كل الناس علي كده، وهم يعني عاملين العدد الكبير ده ليه مش عشان عارفين إن الناس عاوزه تتفرج.
أو عشان يلهوهم ويلخبطوهم زي ما عملوا معاكي، افهمي، دلوقتي فيه ميه وعشرين قناة بتعرض مسلسلات عربية، يعني عادي إن يبقي فيه عدد كبير، لكن إنتي مخك فين
اتفرجي علي مسلسلات مش مشكلة، بس ما توصلش لتسعة وكمان اتنين في نفس الوقت، طبعا لازم تتلخبطي.
- مالكش دعوة أنت.
طب استني رجعي المحطة بسرعة.
- دي إعلانات.
عاوز أشوف الإعلان ده، ارجعي بسرعة، تاني، إعلانات عن الضرايب تاني، عن إيه المرة دي.
- عن قنطرة الدفاتر.
قنطرة!! مش السنة اللي فاتت كانت فوترة
- ما هم لسه برضه بيتكلموا عن الفواتير.
بس بجد إعلانات بلدي، بيئة زي البنت ما بتقول، قنطرة!! مش عارف ليه كل الإعلانات بتاعة الضرايب بتبقي مستفزة كده، ما يوفروا الفلوس دي أحسن ويعملوا بيها حاجة مفيدة.
- فلوس إيه؟
الفلوس اللي كلفوا بيها الإعلانات، مش قالوا إن إعلانات قانون الضرايب الجديد اتكلفت خمسة وأربعين مليون، مش حرام الفلوس دي. مش إحنا أولي بيها.
- إحنا مين؟
أنا وإنتي واللي زينا، بدل ما يخصموا عشرة في الميه من كل مبلغ يدخل لنا وياخدوا فلوسنا يعملوا بيها إعلانات.
- ما هو أكيد الإعلانات بتزود حصيلة الضرايب.
هم قالوا إن حصيلة الضرايب زادت السنة اللي فاتت أربعة وعشرين مليار.
- يبقي عندهم حق.
يعني إنتي مصدقة إن الإعلانات هي السبب.
- ما هو باين أهو.
وليه ما تقوليش إننا بقينا ندفع أكتر، وإن كل القوانين الجديدة بتاعتهم إحنا اللي بندفع تمنها.. استني استني إيه الإعلان ده.
- هو انت حتقعد تتفرج علي الإعلانات ولا المسلسلات.
نعم، نعم، السكة الحديد بتاعتنا عاوزني أنا أروح أقول للراجل اللي ماسك مطوة في إيده عيب عليك تقطع الكرسي، طب ما هو حيقطعني ويديني بيها في بطني!!
- المسلسل زمانه رجع علي القناة التانية.
هم لسه من رمضان اللي فات بيقولوا احسبها صح تعيشها صح يا سلام علي طولة بالهم.
- المسلسل.. فيه حتة مهمة، الإعلانات دي بتيجي كل شوية.
بقي خمسة وثمانين في المية من نصيبنا في مية النيل بيروح في الزراعة، إزاي، إذا كان أكلنا كله مزروع بالمجاري، ماشي حأصلح الحنفية بنفسي، وأدخر في غسيل المواعين، طب هم حيوفروا في المية بتاعة حمامات السباحة، إلا فيه إعلان عشان الناس دي تحسبها صح وتعيشها صح.
- الناس بتوع حمامات السباحة مش محتاجين يحسبوا أصلا. أقلب القناة بقي؟!
أقلبي يا ستي.. يا ساتر لسه في نفس الموقف، عشان تستريحي مافيش حاجة فاتتك.
- الحمدلله.. ما أنا عارفه الأحداث هي هي يعني حيجيبوا تلاتين حلقة وأكثر منين! الحلقة خلصت.
وسايبة الإعلانات بعد المسلسل ما خلص ليه؟
- ما هي الخمس دقايق دول بأريح فيها، كل المسلسلات بتخلص مع بعض وتبتدي مع بعض وكل القنوات دلوقتي فيها إعلانات.
حاجة غريبة فعلا.
- شوف بقي أنا حاشرح لك. بيقولك إن 07٪ من الإعلانات بتاعة السنة كلها بتتعرض في رمضان.
يا سلام!!
- آه عشان كده المسلسلات كتير في رمضان، عشان الإعلانات مضمونة.
يا سلام.
- وعشان تبقي عارف، أنا سمعت إن فيه حملة إعلانات جديدة بيحضروا لها، يمكن عشان رمضان اللي جاي.
مين دول اللي بيحضروا.
- بتوع الضرايب.
يا ساتر يا رب.. حملة إيه إنشاء الله!!
- بيقولوا حملة عشان المواطن البسيط.
إيه؟! تاني، حيعملوا إيه في المواطن البسيط.
- ما تخافش ما تخافش مش حيدفع ضرايب.
طب ما يسيبوه في حاله، عاوزين منه إيه؟
- مافيش حاجة.. بيقولوا حيسجلوه عندهم عشان يضموه لمنظومة الاقتصاد الرسمي.
المواطن البسيط، ومنظومة الاقتصاد الرسمي!! وكمان حملة إعلانية في رمضان، طب إقلبي ودوري لي علي أي مسلسل، وآخر مرة نتفرج علي إعلانات.