عندك.. بطاقة انتخابية؟!

* إيه اللى مسهرك لغاية دلوقتى؟
- مستنياك
* خير
- أصل فاتك حاجة لطيفة قوى فى التليفزيون، قلت استناك عشان أحكيهالك.
* خليها للصبح عشان تعبان وعاوز أنام.
- إيه الغلاسة بتاعتك دى، بقى أنا سهرانة ده كله وأنت مش عاوز تسمع.
* طب قولى، بسى لو طلعت حاجة تنكد مش حأفوتهالك.
- ما تنكدش بس بتورينا النواب بتوع مجلس الشعب عندنا بيعملوا إيه.
* بيعملوا إيه؟
- شوف ياسيدى، شوبير كان جايب على التليفون رجب هلال حميدة، ده نايب فى المجلس، بيشتم فى سمير زاهر بتاع اتحاد الكورة وبيقول أنه عامل مخالفات خطيرة ومحدش بيحاسبه.
* اختصرى.
- طيب، المهم أنه استشهد بنايب تانى اسمه سمير موسى بيقول أنه أداة ورقة كاتب فيها إن سمير زاهر خلى المستشار بتاعه يبيع تذاكر ماتش مصر والجزاير فى السوق السوده وكسبوا أكتر من تمنميت ألف جنيه.
* ياخبر.
- مش دى الحكاية، النايب سمير موسى راح داخل على التليفون معاهم وقال لشوبير إن ده محصلش وأنه ما اداش لرجب حميدة أى ورق.
* وطلع مين فيهم الصادق!
- ما هى دى الحكاية اللطيفة بقى، رجب هلال حميدة قال أنا عندى الورقة وبخط ايدك، راح سمير موسى قال والله العظيم ما حصل، ولو الورقة معاك صورها ووزعها على المجلس، قام رجب قال أقسم بالله العظيم حصل وحاوزعها.
* هم الاتنين حلفوا بالله العظيم!!
- آه والله العظيم.
* يعنى فيهم واحد بيحلف وهو عارف أنه كذاب والناس كلها دلوقتى شافتهم.
- ها، إيه رأيك بقى، مش حكاية دمها خفيف؟!
* ولا دمها خفيف ولا حاجة، دى حكاية تحرق الدم، وأنا كنت عارف أنك حتنكدى علىّ قبل ما أنام.
- ليه بتقول كده.
* كل ما بأشوف عمايل أعضاء مجلس الشعب بتوعنا بأقول مافيش أمل إن حالنا يتصلح.
- وهم مالهم بأحوالنا بس؟!
* ياسلام!! مش دول اللى مفروض يدافعوا عن حقوقنا ويجيبوها لنا!! بيعملوا إيه، ولا حاجة، رايحين المجلس راجعين من المجلس، كل اللى بيدوروا عليه مصلحتهم.
- إزاى تقول كده، لأ طبعاً بيعملوا حاجات تانية.
* زى إيه إن شاء الله؟
- بيناموا، ويقزقزوا لب، ويرفعوا الجزم على بعض.
* ونسيتى اللى بيعملوه بره المجلس؟
- قصدك إيه؟
* بيهاجموا أقسام الشرطة عشان يخرجوا قرايبهم المقبوض عليهم، وبيعرفوا يهربوا بره البلد لو صدرت ضدهم أحكام، ويصوروا سيديهات لبعض.
- وبيطلعوا فى البرامج يتكلموا.
* أنا نفسى أعرف حاجة مهمة.
- خير.
* مش بيحصل إن النواب دول لو غلطوا ووافقوا على حاجة مش مفروض يوافقوا عليها فيه ناس بتوجههم فيغيروا رأيهم فى ثوانى.
- حصل.
* ليه بقى لما واحد يغلط فى برنامج ويقول كلام ما يصحش محدش بيوجهه ويقوله ماتعملش كده تانى.
- يمكن يكون ده بيحصل.
* لو كان زى ما بتقولى كانوا منعوهم خالص من الظهور فى التليفزيون فاكرة النايب عبدالرحيم الغول لما قال إن تداول السلطة ده حلم بعيد المنال إزاى قال كده، حتى لو هو عاوز ده مفروض يدارى، والله أنا لو مسئول كنت أصدر أوامر إن أى نائب يقول كلام بالشكل ده ممنوع يطلع فى التليفزيون خالص.
- وإذا ده حصل حنعرف إزاى مين فيهم الكويس ومين الوحش؟
* ولما نعرف الكويس من الوحش إيه اللى حيتغير؟!
- مش حننتخبهم تانى.
* ياسلام!
- طبعا، ما هو أنا مستنياك وعاوزه أحكى لك اللى حصل عشان جت لى فكرة لازم ننفذها.
* استر يارب، أصل أنا عارف أفكارك.
- إحنا لازم نعمل بطاقة انتخابية.
* عشان نعمل بيها إيه، إحنا اللى محتاجينه بطاقة تموين، لكن انتخابية دى لازمتها إيه؟
- ده كلام بالذمة؟!
* يعنى أنتى عاوزه تفهمينى أنك عاوزه تنتخبى؟
- وما انتخبش ليه؟
* عشان حاجات كتير قوى.
- زى إيه؟
* زى.. زى الحبر الفوسفورى.
- ماله، ده حتى يخلى الواحد ماشى منور.
* قال إيه خايفين الواحد يروح ينتخب أكثر من مرة بأمارة إيه، إذا كان الميتين بينتخبوا، وتقولى لى نعمل بطاقة، اسكتى اسكتى، وهم لو عاوزينا ننتخب ما يقولوا بالرقم القومى، مش عملوه عشان تبقى كل حاجة بالكمبيوتر، إيه لازمتها البطاقة؟!
- مش مشكلة، ده مجرد مشوار للقسم.
* مش حاروح القسم برجلى، حد عارف إيه اللى ممكن يحصل لى هناك.
- مش حيحصل حاجة، كلهم بيقولوا أنها سهلة.
* ولو.
- ليه بس؟
* عشان لما أعملها وماانتخبش حاديهم فرصة يزوروا صوتى.
- ماتنتخبش ليه؟
* انتى بتستعبطى، مابتقريش إيه اللى بيحصل للناس فى الانتخابات!
- إيه اللى بيحصل!
* بهدلة، بيمنعوهم يوصلوا اللجان، ويضربوهم، وبتوصل كمان للقتل، وفى الآخر ده كله ليه؟
- قلت لك عشان نختار الناس الكويسة.
* طب ولو الناس الكويسة دى ماعرفتش ترشح نفسها!
- ليه ماتعرفش؟
* انتى مش شايفة الملايين اللى بتتصرف فى الانتخابات، الكويسين دول حيجيبوا منين؟
- تفتكر هم بيصرفوا الفلوس دى كلها ليه، عشان عاوزين يخدموا البلد بجد، ولا عشان عارفين أنهم حيرجعوها بالفوايد وأكتر.
* اسأليهم.
- بس اللى أنا أعرفه إن فى بلاد كتير بيصرفوا برضه فلوس أكتر من عندنا، وناس كمان بتتبرع لهم، يعنى ده موضوع عادى، مش كده؟!
* آه، بس هناك الناس واعية وفاهمة، بيعملوا كده عشان مصلحة بلادهم، وفيه رقابة ومحاسبة وأى شبهة فساد بتتعرف، طب أنا عاوز اسألك سؤال، لو أنا انتخبت واحد كويس، ونجح، حيعمل إيه فى الآخر، إذا كان المجلس بتاعنا حتى مابيعرفش يحاسب الوزير.. بلاش دى، الوزير نفسه مابيخافش من المجلس ومابيحضرش الجلسات اللى فيها استجوابات له.
- الوزير عضو فى المجلس، إلا ده صح؟
* إيه بالضبط.
- إن الوزير يترشح ويدخل نائب فى المجلس، يعنى يبقى رقيب على نفسه!!
* وهو حيفضل طول عمره وزير، ده بيعمل حساب المستقبل، بس أهو واضح أنه ينفع.
- يعنى ده بيحصل فى كل البلاد.
* ماأعرفش، كفاية بقى، خلينا نتخمد، عندنا شغل الصبح.
- استنى بس عاوزين نوصل لنتيجة.
* إيه الوطنية اللى نزلت عليكى مرة واحدة دى؟
- مش أنت اللى دايما تقول أننا لازم نعمل خطة عشان العيشة بقت صعبة.
* والخطة اللى وصلت لها واللى حتخلينا نعرف نعيش، أننا نعمل بطاقة انتخابية.
- أيوه.
* حاضر، بكره أروح أسأل، عاوزه حاجة تانية.
- عاوزه فلوس.
* نعم، حرام عليكى.. نامى بقى.
- بجد الفلوس اللى معايا خلصت، أصل فاتورة الكهربا..
* مش عاوز أعرف، بكره قولى لى فاتورة الكهربا كام خلينى أعرف أنام.
- طب آخر سؤال.
* الصبح.
- تفتكر عضو مجلس الشعب بيقبض كام؟
* هو أنتى اتعشيتى إيه النهاردة؟
- أصل جت لى فكرة جديدة.
* قولى وخلصينى.
- طب جاوب على السؤال الأول.
* معلوماتى أنهم مش بياخدوا فلوس كتير، لكن كام ماأعرفش.
- إزاى الكلام ده! ياخسارة.
* مش عارف، بس عاوزه تقولى إيه.
- أصل كنت فكرت أنك، قصدى جت فكرة أنك راجل كويس وبتفهم وعندك أفكار حلوة وحاسس بهموم الناس، فقلت فيها إيه لو ترشح نفسك لمجلس الشعب، مش برضه عشان ترشح نفسك لازم يكون عندك بطاقة انتخابية؟!
الحمد لله، نامت.. وبتحلم كمان.