كلام

(1) مش عايز آكل مش عايز أصلي مش عايز اتفرج ع التليفزيون
مش عايز اقرا
مش عايز ارسم
مش عايز اسمع مزيكا
مش عايز اتكلم في التليفون
مش عايز اقعد ساكت
مش عايز انط من الشباك
مش عايز أخرج
مش عايز أخبط راسي في الحيط
مش عايز أعض الارض
مش عايز أنام
مش عايز أفضل صاحي
مش عايز حاجة
مش عايز أكون مش عايز حاجة
مش عايز أموت
مش عايز أعيش
مش عايز أغني
مش عايز أرقص
مش عايز أدبدب بالرجلين
مش عايز أقول مش عايز
مش عايز بلكونة
مش عايز شارع
مش عايز بيت
لكن عايزك .. إنتي
(2)
عايز أتكلم
من غير ماأشرب خمرة
واقول اللي ما قلتوش و انا قاعد ويا صحابي
وماقلتوش لأبويا
واحنا قاعدين ساكتين بنبص لبعض
وماقلتوش لحبيبتي حتي وانا ف احضانها
وماقلتوش للي خالقني
وانا باصص في السقف
وماقلتوش حتي لنفسي
عايز أتكلم زي بقية الناس
أرغي وألخبط في كلامي زي بقية الناس
عايز أتكلم وانا باكل طعمية
وانا باشرب شاي
زي القاعدين علي القهوة
يمكن وانا باهوي وادردش
تخرج من صدري الكلمات المحشورة
(3)
أول حاجة سجاير فوق الطاقة
تاني حاجة مفيش في البيت غيرك صاحي
تالت حاجة الحزن بيتسحب زي القطة
واليأس بيكتم زي الربو
رابع حاجة بيتهيألك إن مفيش غيرك في الدنيا
إنك عمرك ما ح تشوف ابنك تاني
خامس حاجة بتتسلي بالشعر
زي اللي بيتطوق بالحية
سادس حاجة بتخاف
لايطلع لك عفريت
لايعض ف رجلك فار
أما الشيء المحزن في سهر العواجيز
إن الموت الغادر يستفرد بيهم
(4)
الشخص اللي باحبه
اللي ما باحبوش
الشخص المتطفل علي أحلامي
الساكن بيتي غصبن عن عيني
الشخص الساكت طول الوقت
اللي مابيبطلش كلام
الشخص النكرة
اللي مش ممكن انساه
الشخص المتصدر كل العناوين
في الصحف اللي ما اتنشرتش
البطل القومي لكل الاحلام الساذجة
وعدوي الأوحد في الكون
الشخص اللي بيخبط تحت الجلد
عايز يطلع
عايز يتكلم في التليفزيون
الشخص المزعج
اللي لسانه مقطوع
اللي مفيش انسان إلا ويحبه
اللي مفيش انسان إلا ويخاف منه
يكرهه حتي الموت
انا عايز اتحرر م المخلوق ده
عايز اتكلم من غير مايكلبش في كلامي
عايز اضحك من غير ما يشد ف ديل الضحكة
عايز ابكي من غير ما يسخر مني
عايز أمشي في الشارع من غير ما يكعبلني
عايز انام من غير مايكبس علي نفسي
عايز أحب مراتي من غير ما ينام ويانا
عايز أعيش
عايز أتنفس من غير مايحوش الهوا عني
حتي المرايات
بيكشر فيها ف وشي
(5)
أنا مش فاكر شفتك فين
يمكن كنت بتلعب كورة في الشارع مع حتة
يمكن كنت بتشرب شاي علي قهوة ف كوم الدكة
أو كنت بتشرب ينسون مع جدي ف بيتنا
أنا مش فاكر
لكن فاكر إنك راجل نمس
غيرت الشاش علي جرحي وحطيت فيه شطة
أنا مش زعلان منك , بالعكس
انت لطيف جدا , ومهذب أحيانا , وخفيف الدم
لكن مخك طاقق , و ده شيء مايزعلش
الشيء اللي يزعل فعلا
اني مش فاكر شفتك فين
مش فاكر حتي اذا كنت بتتكلم عربي واللا جريجي
احساس متعب .. تعرف؟
انا حاسس اننا عايشين مع بعض
من اول مابدأت اتكلم وأحبي واعض
انت قليل الاصل بشكل مخيف
متفرج ساخر ع العالم وكأنك مش فيه
حتي كلامي مش سائل فيه
بتبص لي وبتضحك وكأني مجنون
بس انا متأكد انك جزء حزين
من كل الايام الحلوة
انك متواطئ مع نفسي عليا
ولو اني ..
مش فاكر شفتك فين .