الحاج أحمد يبحث عن عمل: "السادة الكرام.. حد عايز بواب نوبي"

"السادة الكرام حد عايز بواب نوبي بفيلا"، لافتة رفعها الحاج أحمد توفيق، الذي فقد عمله من 3 سنوات ويعول أسرة مكونة من 3 أولاد، ويأمل في الحصول على عمل.
الرجل النوبي، صاحب ال63 عاما، لديه ابنتان 28 عاما و21 عاما وولد 23 عاما، وتعاني الكبرى من هشاشة عظام ولا يستطيع الصرف على علاجها: "كنت شغال في الدقي بواب في فيلا وأصحابها باعوها، وحاليا بدور على شغل، وظروفي صعبة جدا عشان كده كتبت اليفطة دي، وبقيت أنزل الشارع يمكن حد يشوفلي شغل ".
يضيف الرجل النوبي، ابن قرية قورتة تاني: "محتاج شغل مستقر لأن سني كبر وعندي القولون ومش بستحمل ظروف الشغل العنيفة للأسف، وسايب الشغل بقالي 3 سنين وحاليا بشتغل باليومية، أمسح سلم أو أنضف شقة وكده".
عن مساعدات الجمعيات النوبية له، علق الحاج أحمد ل"الوطن": "رحت الجمعية النوبية التابع لها وادوني 250 جنيها في الشهر، وقالولي تعالى نضف كل أسبوع الجمعية بس طبعا دول مبياكلوش عيش وهصرف على عيالي وبيتي إزاي بالفلوس دي، فلما طلبت منهم يدوني فلوس عشان المواصلات لأن مش معايا، رد عليا رئيس الجمعية: إنت عايز فلوس فلوس كل شوية".