بالفيديو.."فيديو 7" يرصد قنبلة موقوتة تهدد الشارع المصرى بثورة جياع.. عمال السياحة يبكون أيام مبارك.. اشتباكات كورنيش النيل عطلت أرزاقهم.. ويتوعدون مرسى: احذر من ساعة الصفر

رصدت كاميرا "فيديو 7 قناة اليوم السابع المصورة"، حال أصحاب المراكب النيلية وقائدى الحنطور والباعة المنتشرين على كورنيش النيل، والذين أكدوا أن حالهم أصبح موقوفًا لاسيما فى ظل استمرار الاشتباكات بين قوات الأمن والمتظاهرين.
وأثناء تجول الكاميرا، وجدنا مجموعة من العاملين على المراكب النيلية، يلتفون حول موقد نيران للتدفئة، فجلسنا معهم، وسألناهم عن أحوالهم فردوا: "إحنا موقوف حالنا من ساعة الضرب وموقوف حالنا من ساعة ما مرسى مسك أساسًا، مش لاقيين نأكل ولا نأكِّل عيالنا وأغلبية البلطجية بييجوا يفتشوا الناس اللى بتنزل على الكورنيش، ومفيش حكومة ولا أمن، وإحنا فاض بينا وقريب أوى هيبقى لينا رد فعل فى البلد دى، بس رد فعل كبير لو المشاكل دى ما اتحلتش".
وأضاف آخر: "أول الحكومة ما بتشتغل بينزلوا يكسرلونا مراسينا، بس احنا عايزينها تشتغل وكله يأكل عيش، عايزين البلد حالها ينصلح زى الأول.. أنا معايا خمس صنايعية شغالين عايزين 200 جنيه يوميات، أغلبهم متجوزين ومعاهم عيال، رد فعلنا هيكون اليومين الجايين، لو الحكومة ماشفتش حل، وهيكون رد فعلنا أكبر من اللى بيحصل ده، وهننزل بعيالنا وأسرنا، واللى بيحصل فى البلد مش هييجى حاجة جنب رد فعلنا عشان احنا خلاص جعنا".
وقال آخر: "أنا راجل متجوز ومعايا ابن عمره سنة ونص ومش لاقى مصاريف، باجى الشغل زى ما بروح، لكن زميله قاطعه وقال: "إحنا كنا بنفكر نلم نفسنا وكل المراكبية متفقين على ده النهارده، نلم نفسنا وننزل نفض الكلام اللى بيحصل ده لو الحكومة ما حلتش القصة دى، بنطالب الداخلية تنزل ونشوفها، وإذا كان الحل إن رئيس الجمهورية يمشى فيمشى، وإذا كان الحل مع رئيس الوزراء فيشوفوا حل، عشان إحنا خلاص جبنا آخرنا".
وتابع: "النهارده الكورنيش واقف 6 ساعات الناس بطلت عربياتها وفضلت واقفة، والبلد كلها واقفة، ميكروباص حلوان أجرته بخمسة جنيهات، الناس هتركب منين، والحكومة ولا بتساءل، استغلال السواقين واستغلال الناس كلها لبعضها ومابقيناش عارفين نجيب أى حاجة ولا علبة السجاير، ولا بقينا نعرف نمشى بفلوس حتى اللى فى البيت مش سايبلهم أى مصاريف، فبنطالب الحكومة تشوفلنا حل عشان احنا خلاص قربنا نوصل لساعة الصفر، هى وصلت خلاص بس كاتمين فى نفسنا وبنقول يارب يحلها من عنده".
أما بائع الحمص فقال جملة واحدة وكررها: "والله حرام يا باشا والله حرام"، وأشار على عربة الحمص بحسرة وقال "أهى فاضية بكراسيها" واستكمل: "عاين بنفسك وقف الحال، والله أيام مبارك كانت عشرة على عشرة، أما دلوقتى السياحة اتضربت وكل حاجة اتضربت، آدى الله وآدى حكمته".
وأضاف بائع الشاى: "النهارده والطريق واقف كنا بنبيع للعربيات فى الشارع، بسعر أقل من اللى بنبيع بيه علشان مافيش شغل".
وأكد الحاج عبد الفتاح على كلام زملائه قائلًا: "وقف حال للسياحة وقف حال من كله، وبصراحة مرسى ده ماعملش حاجة من يوم ممسكها، وأنا مابخفش غير من اللى خلقنى، معملش ولاحاجة أن ماكانش كفء يسيبها لغيره، البلطجية فى كل حتة والأسعار غليت ومش لاقين أى حاجة".
وقال سيف المراكبى: "والله اللى بيحصل فى البلد ده مشكلة الناس بحالها، ومن ساعة الثورة فى بيوت اتخربت كتير، وناس اتبهدلت كتير، ومن الآخر مرسى ده مش نافع، وبالنسبة للشغل أهو المركب واقف ومفيش زباين".
وأضاف ريفو سائق الحنطور: "الظروف وحشة أوى، كل اللى على باب الله تعبوا الأيام دى، وكده مايرضيش ربنا اللى البلد فيه، وإحنا ناس عندنا عيال وملناش شغلة غير دى، فياريت يعنى المسئولين يحسوا بالناس الغلابة، الناس اللى رزق يوم بيوم، اليوم اللى مابيجبش فيه فلوس ولا باكل ولا أنا ولا عيالى، نفسنا فى يوم من الأيام اللى كان فيها استقرار، أقول للرئيس مرسى، حس بالناس الغلابة عشان احنا بقينا صفر، وفينا اللى عنده عيال بيعلمهم، والمظاهرات واللى بيحصل ده بيصب على دماغ الأرزقية، مافيش حركة مافيش سياحة، ومن حقهم يخافوا عشان مافيش أمان فى البلد، هيا فين السياحة دى انقرضت من البلد".
وقال الحاج محمد علام الذى يعمل فى السياحة النيلية منذ عام 1992: "سياحة البلد "خربانة" وزى مانت شايف، كل دى مراكب نايمة أصحابها مش لاقيين ياكلوا وأنا واحد منهم، ولا الضرايب ولا المسطحات سايبانا فى حالنا، أقول للريس ربنا يصلح حالك ويهديك علينا، واللى بيحصل دا لا هو حرية ولا ديمققراطية، ولا احنا عارفين مين ماشى ورا مين، قاعدين نسمع الإخوان والمعارضة والحكومة، أنا معايا مركبين شغال عليهم 6 صنايعية مش لاقى أديهم أجرتهم، مافيش شغل، هانجيب منين، لكن لو فى عدل وحرية واجتماعية زى ما بيقولوا هيبقى فى شغل، لكن السياحة هتيجى فين فى الدمار اللى فى كل حتة ده، دمار فى التحرير ودمار فى المنصورة ودمار فى بورسعيد، ودمار هنا ودمار هناك هيجى منين الشغل بقى، لما الحكومة تصلح حالها يبقى الشغل يجى ...وهو ده حاصل فى البلد كلها.
لمزيد من الفيديوهات زوروا "فيديو 7"