مش كفاية كده بقي يا حبيبي؟ كفاية إيه يا بابا؟!! كفاية مظاهرات ومليونيات البلد حالها وقف. يعني حضرتك رأيك إن اللي واقف حال البلد هو المظاهرات؟ طبعا.. لما كل واحد يسيب شغله ويعمل مظاهرة يبقي فين الإنتاج؟ كل واحد إزاي هو حضرتك بتتكلم عن المطالب الفئوية ولا عن مليونيات يوم الجمعة. عن كله يا ابني ما ينفعش كده. طب هدي نفسك شوية وتعالي نتكلم عن كل حالة لوحدها. كله مرتبط ببعضه. بالراحة شوية تعالي نتكلم عن المظاهرات اللي ليها مطالب فئوية. أيوه.. لما كل الناس تسيب شغلها وتطلع تقف تطلب زيادة في المرتبات حيجيبولهم منين إذا كان الشغل واقف. - مش كل الناس يا بابا هي المظاهرات دي أد إيه؟ زي ما تكون يدوا فرصة شوية هو فيه حاجة بتتحقق كده بين يوم وليلة؟ أنا عاوز أقولك بس إن لو فيه كل يوم مظاهرة أو اتنين عاوزين مطالب فئوية مش معني كده أن شغل البلد كله واقف معظم الموظفين والعمال في شغلهم بيعملوا اللي عليهم والكلام اللي بيتقال ده مبالغة. مبالغة!! لأ ماتقولش كده. ليه؟ لما يبقي عندك أكثر من عشرين مليون موظف وعامل ما بين قطاع خاص وحكومة وقطاع عام يطلع منهم مية ولا ميتين واحد يتظاهروا يبقي دول اللي موقفين حال البلد. ميتين إيه والمليونيات اللي شغالين عليها. لأ ده موضوع تاني وإحنا اتفقنا حنتكلم عن كل موضوع لوحده. ما هو قصدي يعني هم المية والميتين دول مش بيوقفوا حال المكان اللي بيشتغلوا فيه؟ أكيد. طب إيه؟ يوم يابابا يوم واحد مش مشكلة. إزاي تقول كده يوم زي يومين والحكاية بتكرر وكمان لما عمال في أماكن تانية يسمعوا إن فيه مظاهرات هنا أو هناك بيعملوا زيهم وحال البلد يقف. يابابا من فضلك بطل الكلمة دي شوية. كلمة إيه؟ حال البلد اللي وقف أنت بتكررها من غير ما يكون لها معني. إيه قلة الأدب بتاعتك دي أنا كلامي مالوش معني!! هو عشان عملتوا ثورة خلاص مالكوش كبير مش حتحترم حتي أبوك. مش قصدي حقك عليا أنت عارف إني ما أقصدش. أومال قصدك إيه؟ - قصدي أن الكلام بيتقال رغم أنه مش حقيقي بيتقال عشان الناس تصدقه ويتهيألها أن المظاهرات دي واقفة حال البلد. أديك أنت اللي قلتها أهو. اسمع يابابا لو البلد حالها واقف يبقي السبب هم مش إحنا. هم مين؟ اللي بيديروا البلد الحكومة والوزرا يبقوا مش عارفين يقوموا بالمطلوب والمفروض يقوموا بيه ولو فعلا مش عارفين يبقي يمشوا يعترفوا ويمشوا. نعم!! أنت عاوز الحكومة تمشي مش عصام شرف ده أنتوا اللي طلبتوه دلوقتي بتقولوا يمشوا. لأ مش بأقول كده. قلت لسه قايل. أنا قلت، لو البلد حالها واقف زي ما بيقولوا يمشوا. يعني إنت عاوز تفهمني أن المظاهرات الفئوية دي مش مأثرة خالص. حتي لو مأثرة بس برضه الحكومة هي السبب. تصدق أنك ملاوع مرة تقول ملهاش تأثير وبعدين لما أزنقك وأقولك أن ليها تأثير تعترف وتقول أن الحكومة هي السبب في إيه إن شاء الله. مافيش حاجة واضحة مافيش حاجة اتغيرت. مالك عامل كده ليه أنت بتكلم مين؟ بأكلم نفسي. هو أنا طوبة قدامك مش بنتكلم مع بعض. بأقول إن كأن مفيش حاجة اتغيرت أكثر حاجة مجنناني أن بعد الثورة العظيمة دي مافيش حاجة اتغيرت. إزاي تقول كده. نفس التصرفات، نفس ردود الأفعال نفس التصريحات. مالك يا حبيبي أنا مش فاهم. أنا كمان مش فاهم قبل الثورة كان الوزير من دول يقعد بالليل يتفرج علي برامج التوك شو عشان يردوا علي اللي بيتقال فيه وخلاص، هو ده بالضبط اللي بيحصل دلوقت. لو ردوا مش عاجبكم ولو ماردوش برضه مش عاجبكم. يابابا اللي عاوز أقوله إن الرد بالشغل المفروض إن عندهم خطة ماشيين عليها لكن إن ردود أفعالهم تتحدد حسب اللي بيتقال في البرامج زي ما كان بيحصل قبل الثورة يبقي مافيش حاجة اتغيرت لما كل خططهم ونواياهم تبقي سرية مش مفروض نعرفها يبقي مافيش حاجة اتغيرت لما أي واحد يقول رأي مخالف يعتبروا مش مقدر وقليل الأدب يبقي مافيش حاجة اتغيرت. وهو ده اللي بيحصل دلوقتي؟ - وأكثر، الوجوه القديمة اللي الناس رافضاها لسه في مكانها.. المتهمين بقتل المتظاهرين بيخرجوا من المحاكمة علي أشغالهم.. بيحصل ولا لأ؟ يعني بيحصل بس مش قوي. وهي الثورة قامت عشان كل حاجة تفضل زي ما هي؟ بأقولك مش قوي. يعني الثورة قامت عشان مش قوي دي. بالتدريج يا حبيبي واحدة واحدة. ما هو ده بالضبط الفرق بيننا وبينكم. بيننا وبينكم !! قصدك مين؟ يعني أنا مع الحكومة ضدكم؟ مش ضدنا بس قصدي. أنت فاكر إنكم إنتم اللي قمتم بالثورة دي لوحدكم لأ اصحي صحيح الشباب هما اللي بدأوا الثورة بس لولا أن إحنا كلنا نزلنا معاكم ما كانتش الثورة نجحت. طبعا عشان كده مستغرب إن رأيك مش زي رأيي. بص يا حبيبي أنت لسه صغير ودي سنة الحياة الشباب حامي فاكر إن كل حاجة ممكن تتغير بين يوم وليلة لكن إحنا عندنا خبرة وعارفين إن كل الأمور ممكن تتغير بس بالتدريج. مش صحيح يا بابا. إيه هو اللي مش صحيح؟ إحنا عارفين ومتأكدين إن فيه حاجات تتحقق بالتدريج لكن برضه عارفين ومتأكدين إن فيه قرارات لازم فيها الحسم وعشان كده بنطلع المليونيات بتاعة يوم الجمعة. كويس أنك وصلت للمليونيات ممكن تفهمني لازمتها إيه دلوقتي. بعد كل اللي قلته يابابا لسه بتسأل!! هو أنت قلت حاجة. يابابا!! اللي أعرفه أنكم عاوزين سرعة محاكمة رموز النظام السابق. صح. طب ما هم بيتحاكموا. بيتحاكموا علي إيه علي الفلوس اللي سرقوها طب والدم، الشهدا اللي ماتوا، الناس اللي اتعذبوا قبل الثورة الحقوق اللي ضاعت..الشعب اللي عاش في الفقر والجهل والمرض وبعد ده كله بيحسسوا عليهم المفروض المحاكمات تبقي علنية. أنا معاك بس الموضوع ده صعب. ليه؟ عشان إجراءات الأمن.. لما بيحبوا يأمنوا بيعرفوا زي ما بيحصل مع حبيب العادلي وعموما بلاش دي ينقلوا المحاكمات في التليفزيون زي صدام حسين المهم الأول يبتدوا أكثر من ثلاث شهور دلوقتي تحقيقات ولسه يا دوب قضية ولا اتنين. أهدا يا حبيبي بالراحة في موضوع المحاكمات ده أنا معاك تعرف ده أنا أكثر منك كمان. إزاي؟ أصلي متجنن. من إيه؟ مش مبارك ده مسجون؟ قصدي يعني هو عيان وفي المستشفي صحيح بس مسجون. طبعا. يعني لما حد يحب يزوره لازم ياخد تصريح. أكيد. يبقي إزاي مراته قاعدة معاه كل يوم وكمان زوجات ولاده وولادهم بيروحوا له إيه الكلام الفاضي ده. شفت؟حاجات تجنن وغيرها كثير لما يبقي فيه مطالب إن الانتخابات تتأجل ويتعمل الدستور الأول ودول كأن مافيش حد له رأي تقول إيه. ما هم بيعملوا حوارات ومش كل الناس بتقول الدستور الأول. يابابا حوارات إيه بلاش والنبي حكاية الحوارات دي أحسن مش حنخلص النهاردة. قصدك إيه؟ قصدي إن أهم مكاسب الثورة في خطر. اللي هي إيه؟ الحريات النغمة اللي ماشية في البلد تقلق. تقلق يعني إيه؟ - كل واحد يتكلم بيحولوه للمحاكمة العسكرية.. حتي القضاء. حتخوني ليه. ما تخافش إحنا موجودين. إنتم مين؟ إحنا شباب الثورة مش حنسمح إن ثورتنا تتسرق وحندافع عنها وعن بلدنا وعن شعبنا وعن حريتنا. ربنا يوفقكم يا حبيبي.