سنية.. ومليونية الملوخية!

الولية سنية دي عقلها اتلحس.. سايبه الطبيخ والكنس والمسح وعمالة تتفرج على المظاهرات المليونية اللي بتتعمل كل يوم جمعة.. وياريتها جت على كده وبس..الألعن ان الفكرة شعشت في نافوخها اللي عامل زي دماغ الفيل مع ان عقلها زى عقل العصفورة.
لقيتها في يوم جايه تقول لي.."الراجل اللي اسمه عصام شرف ده ما ينفعش يبقى رئيس حكومة..انا نزلت النهارده السوق ومالقيتش ملوخيه..ازاي الكلام ده!!"..رديت عليها.."عصام شرف هيعمل ايه ولا ايه يا سنية يا حبيبتي.." طبعاً قلت كده بلساني.. لكن جوايا كنت بقول.."دلوقتي بس فهمتي سياسه يا ام عقل تخين"..المهم فوجئت يوم الاتنين والتلات انها عماله بتكلم جارتنا، ولمو ستات الحي واتصاحبوا على ستات بيوت من كل المحافظات عن طريق الفيس بوك..ولما جيت اسألها "بتعملي ايه يا سنيه؟"..ردت وقالت.."بعمل مليونية..للملوخيه!!!"..
مليونية بالأرانب
انا سمعت كده وركبني 600 عفريت.. رحت صارخ فيها "ملوخيه ايه يا ولية..انتي عاوزة الناس تضحك علينا؟"..راحت راده.."تضحك علينا ايه يابو مخ تخين انت..الناس كلها نازلة يوم الجمعة الجاية لمليونية الملوخية..مش عاوز تنزل انت حر.. خليك قاعد مع الأرانب!!"
المصيبة إني يوم الجمعة صحيت من النوم مالقيتهاش، وبعد ما رجعت من الصلاه فتحت التلفزيون لقيت مظاهره مليونية زي كل جمعه.. بس اللي لفت نظري الكلام المكتوب على اليفط زي.."أرانب من غير ملوخيه..زي الصلصة من غير تقليه".."لو ماوفرتوش الملوخيه..هنعمل لكم 100 مليونية!!"..وطبعاً لقيت مجموعة من الستات أقرب لبتوع كمال الأجسام شايلين فيل ضخم ،أقصد سنيه مراتي، وعمالين يهتفوا.."الملوخية ياإما بلاش..طبخة غيرها ماتنفعناش" والولية المجنونة سنية عمالة ترقع بالصوت الحيانى"مش هنمشى...عاوزين ملوخية...مش هنمشى...عاوزين ملوخية.."
تاني يوم بقيت مسخرة الموظفين في المصلحة..كلهم عارفين سنيه..وواحد فيهم لقيته بيقول لي "بقى ياراجل مراتك ما تنزلش مليونية الدستور وتنزل مليونية الملوخية!!"...طبعاً انا اتجننت وبقيت اقول.."يا فضيحتك يا زنكلوني يابن بهيه..كله من عمايل الوليه سنيه"!!
ما صدقت أنسى الموضوع.. جينا تاني يوم والوليه الموكوسه جايه تعمل رز..مالقتش شعريه..راحت راقعه بالصوت الحياني.."يالهووي ي..مفيش شعريه..مفيش قدامي غير حل المليونيه"..مادريتش بنفسي إلا وانا بصرخ واقول.."ارجوكي ارحميني..عشان خاطري يا سنيه"..مش فاكر ايه اللي حصل..فقت بعدها ب 3 ايام على صوت سنيه بتتكلم مع جارتها على المليونية..بصيت لقيت مقشه مكسوره جنبي..فهمت ليه راسي بتوجعني!!
واتكرر الموقف بحذافيره..وعملت سنية مليونيه للشعريه!!!..بعدها بيوم وانا بديها مصروف البيت لقيتها بتقولي.."لايا حبيبي..الفلوس دي مش كفايه..انت عارف البيت بيصرف كام؟ ده كفايه بس المصاريف النثريه"..رديت.."وانا اجيب منين فلوس للمصاريف النثريه".. راحت قايله.."مش مشكله..عصام شرف هيتصرف..الجمعه الجايه هعمل مليونية للمصاريف النثرية."
اخدتها من أصيرها وما تكلمتش.. ونزلت في نفس اليوم بعد ما سحبت فلوس كنت مخبيها تحت البلاطه.. وعلى أول عطفه بعد تاني زقاق اتفقت مع زعيم البلطجيه..اللي لقيته بيقول.."عيب عليك يا أستاذ.. يعني اطلع انا وال 30 بلطجي عشان نضرب شوية نسوان؟!"..رديت "بيتهيألك...دول مش ستات..وخاصة الفيل اللي بيقودهم"..ورحت مكمل.."وآدي يا سيدي 1000 جنيه زياده بس ريحني منهم!!"..
جيت يوم الجمعه وانا في أسعد حالاتي..اشتريت لب وفول سوداني وانا راجع من الصلاه..وقعدت اتسلى وانا باتفرج ع التلفزيون..لقيت منظر ما كنش متخيله ابداً..المذيع واقف مع سنيه وهي ماسكه زعيم البلطجيه من قفاه وبتصرخ فيه وهي بتقول.."انطق بسرعه يا مهبول..انت معانا ولا من الفلول.. مين اللي باعتك يابن المخبول؟"..رحت صارخ وقايل.."رحت في شربة ميه يا زنكلوني يا بن الاصول"!!
بقلم عمرو عكاشه
------------------------------------------------------------------------
المحروس.. مطلوب الجمعه!
الناس عماله تشجع للنزول الجمعه الجايه عشان مفيش تغيير..بصراحه انا مش حاسه بتغيير..المحروس جوزي زي ماهو ماتغيرش..الشارع بزبالته زي ما هو..المواصلات بقرفها زي ماهيا..الشغل برتابته زي ما هو..حتى المرتب شويه زي ما هو..والاسعار مولعه زي ما هيا..ده غير اننا مبقناش نخرج بالليل من الخوف..والمحروس ركب ترباسين جداد لباب الشقه..وبقينا نقفل على نفسنا من جوه بالمفتاح والترابيس.
بصراحه محتاره وقلت اعرف المحروس ناوي على ايه..قلت أأرره من غير ما ياخد باله..سألته باستعباط اذا كان وراه حاجه الجمعه.. بص لي من تحت النضاره وقال لي: آه..رحت بسرعه سألته وراك ايه..قال لي: بتسألي ليه؟..قلت بمياصه: لأ..قول انت الاول..قالي بمياصه هو راخر: لأ..جيبي من الاخر..قلت في عقل بالي أعمله صدمه ساعتها اكيد هيقر..رحت بسرعه قايله: "انت نازل التحرير الجمعه؟"..بس ابن الاروبه ولا الهوا ولا كأني قلت حاجه..رد عليا ببرود: وانت مالك!
سياسة النفاق
عرفت اني مش هاعرف اخد منه حق ولا باطل قلت اتصنت عليه..هاموت وأعرف هينزل ولا لأ..ومكدبش عليكم الموضوع ده بقى شاغلني اكتر من النزول نفسه..جاله تليفون وشكله من ناس صحابه في المصلحه..اتسحبت وسمعته بيقول: "لا يا مصطفى يا حبيبي..لازم ننزل عشان نضغط عليهم..الراجل مبرطع في شرم وبيطلع لنا لسانه..بذمتك انت عمرك فكرت تروح شرم..مين يا اخي يقدر على مصاريف شرم..ناس لايصه وناس برده هايصه..ربنا يتوب علينا بقى".
مصدقتش اللي سمعته!! بقى المحروس يطلع منه ده كله والله عداه العيب المره دي..حسيت كده اني مكسوفه من نفسي ازاي كنت محتاره والراجل في جمله واحده حط النقط ع الحروف.
مفيش دقايق وجات له مكالمه تانيه..لقيته بيقول: "ايوه يا حاج..كلامك كله مظبوط..دي ناس عايزه تخرب البلد..مليونيات ايه بس وكلام فارغ ايه..خلينا نشوف اكل عيشنا"
مصدقتش نفسي..وملقتش نفسي غير قدامه وهو بينهي المكالمه ومتنرفزه وبقول له: "لأ قولي هنا..انت مع مين بالظبط..نازل ولا مش نازل؟!!" قال لي بكل برود: "ومالك متزربنه كده ليه يا وليه..ده بيسموه في علم الاجتماع يا هبله سياسه..هم مال أهلهم هانزل ولا مش هانزل..دي قضيتي لوحدي"..رديت عليه وانا مبلمه: "لا يا سيدي..ده اسمه نفاق..انت لازم يكون عندك رأي وتقوله"..رد عليا بنفس البرود اللي يفرس: "يا هبله..دي سياسه اش فهمك انت..انت لسه في كيجي وان"!!
جت الجمعه..والمحروس فطر وحلا وقعد يقرا شويه الجرنان..وبعدها نزل بدري عشان يصلي الجمعه..قلت ابص عليه من الشباك يمكن مش هيصلي جنبنا أو يمكن بعد الصلا هيطلع ع التحرير ويضحك عليا.
وهو في طريقه للجامع..لقى زمايله في الشغل بينادوا عليه..وقف وبص وراه..لقاهم بيقولو: "رايح فين يا محروس..الطريق من هنا..احنا قلنا نيجي ناخدك معانا للتحرير"..بهدوء غير المحروس اتجاهه وقبل ما يتحرك خطوه لقى اللي بينادوا عليه من الناحيه التانيه..مجموعة ناس ومعاهم كام شيخ بيقولوله: "رايح فين يا محروس..الجامع من هنا..احنا قلنا نيجي ناخدك معانا"..!
المحروس بدأ يصب عرق وبهدوء غير اتجاهه ناحيتهم وقبل ما يتحرك نادوا عليه بتوع التحرير: "ايه يا عم محروس..انت مش سامعنا ولا ايه..فكك من الناس دي..التحرير من الناحيه دي"..ردوا الناحيه التانيه: "محرووووس..فكك من العلمانيين دول وتعالى..كما عزمت فتوكل على الله"..المحروس بقى عرقه يزيد..وواقف مبلول مش عارف يعمل ايه..والناحيتين بدأوا يتنرفزوا ويقولوا: "ياللا يا محروس متضيعش وقت..مش ده كلامك"..
مفيش دقايق ومسكوا كلهم في المحروس..دول يشدوه من الناحيه دي ودول يشدوه من الناحيه التانيه..لغاية ما بقت هدومه حتت..وكلهم يزعقوا ويقولوا: "قلهم يا محروس انك جاي معانا"..وهما ماسكين فيه ومش سامعينه اصلاً..المحروس قعد يعيط ويقول لدول "ازاي معاكم بس وانا من غير هدوم"..ويبص للتانين ويقول: "ما خلاص...انا مش متوضي"!!!
بقلم رانيا صالح