الكهربا.. ورمضان.. والتوقيت الصيفى

بتقفل التكييف ليه؟
- كفاية كده.. بقاله ساعتين.
الدنيا حر موت.
- أنا خايف من الفاتورة.
معلهش خليه كمان شوية، وبعدين دول شهرين فى السنة إللى بنحتاج نفتح فيهم التكييف.
- وإنتى مش عايشة فى البلد.
نعم! ليه بتقول كده؟
- عمالين يقولوا بناشد الناس تقتصد فى استعمال التكييف، وإن الأحمال على الكهرباء كبيرة، خلى عندك شوية وطنية.
وطنية! يعنى ما ينفعش يبقى عندى وطنية إلا لما أشر عرق؟!
- افهمى.. هم بيقولوا كده عشان الاستهلاك بيزيد ويسبب أعطال، تعرفى إن أجهزة التكييف بتستهلك لوحدها اتناشر فى المية من أحمال الكهربا!
يا سلام!
- آه ما الناس كلها دلوقتى عندها تكييفات، واضح إن الحكومة عندها حق، الناس معاها فلوس أهو.
مش الفكرة التجار شطار، بيعملوا تقسيط عشان الناس تشترى، والناس مش مستحملين الحر، هو احنا عمرنا شفنا جو كده، الواحد فاكر زمان واحنا صغيرين، كان الشتا بيبتدى فى سبتمبر.
- فعلا، بس وزير الكهربا بيقول إن سنة ألفين وستة كان عندنا سبعميت ألف جهاز تكييف، عارفه دلوقتى بقوا كام؟
كام؟
- تلاتة مليون.
بس!
- إنتى مستقلياهم، دول أكتر من أربع أضعاف فى تلات سنين.
إنت بتتكلم فى إيه ده إحنا تمانين مليون.
- بصرف النظر، كده كده لازم نقفل التكييف، حد ضامن الفاتورة حتيجى بكام!
على رأيك ده أنا سمعت إنهم حيرفعوا أسعار الكهربا.
- إيه! إمتى؟! مين قال كده؟
وزير الكهربا نفسه.
- والله حرام، كل شوية يزودوا الأسعار، حنلاحق على إيه ولا إيه.
عموما هو ما قالش كده بالظبط، هو قال إن أسعار الكهربا مازادتش من سنة ألفين وتمانية، تفهم من كده إيه، مش إنهم حيزودوها؟
- وهو المفروض الأسعار ترتفع كل سنة ولا إيه، مين فى العالم كله بيعمل كده، وبعدين إزاى يقول الكلام ده، مش إنتى بنفسك كل شوية تقولى الفاتورة زادت.
عشان تعرف وتتأكد إن مش لازم نسمع كلامهم، افتح بقى التكييف، نص ساعة بس الله يخليك.
- مهما كان أنا مقتنع، اللى بيحصل ده غلط، لازم نقتصد شوية فى استهلاك الكهربا ده لمصلحتنا كلنا.
نفسى أروح بيت من بيوتهم، لأ، قصدى قصر من قصورهم، وأشوف كام تكييف شغال طول اليوم، هو الاقتصاد ده علينا إحنا بس؟!
- لأ عليهم هم كمان، وأهو قرروا يخفضوا إنارة الشوارع خمسين فى المية عشان يوفروا.
آه، طب هم يا ريت بس يطفوها بالنهار، توفير إيه إللى بتتكلم عليه، عارف حتكون النتيجة إيه؟
الشوارع حتبقى كحل بالليل، والعواميد زى ما هى منورة الصبح.
- يا شيخة حرام عليكى، الحكاية مش بسيطة زى ما بيتهيأ لك، دول بيعملوا دراسات وأبحاث.
دراسات وأبحاث إيه إن شاء الله!
- الأول عملوا تجربة فى شوية شوارع، واتأكدوا إن المرور ماشى كويس، وكمان عملوا أبحاث ولقوا إن حتى بعد ما يخفضوا الإنارة فى الشوارع خمسين فى المية لسه شدة الإضاءة فى حدود المعدلات العالمية.
بالذمة إيه! ولما هى كده سايبينها طول السنين إللى فاتت عالية قوى كده ليه عن المعدلات العالمية؟
وبعدين يرجعوا يحاسبونا إحنا ويقولوا اقتصدوا!
- آه صحيح، إنتى بتاخدى بالك من حاجات غريبة.
طب بذمتك لما هى دلوقتى فى حدود المعدلات العالمية إزاى الشوارع ضلمة كده!
- مش كل الشوارع.
الشوارع منورة بسبب المحلات مش بأعمدة النور.
- المحلات! دول بيفكروا يقفلوها الساعة سبعة.
سمعت ولسه بافكر ده صح ولا غلط.
- لسه بتفكرى فى إيه، كل دول العالم بتعمل كده.
وهو إحنا زى كل دول العالم؟
- وما نبقاش زيها ليه؟
إنت مش فاهمنى، أنا نفسى نبقى زى كل دول العالم، بس فى كل حاجة، مش نمشى على سطر ونسيب سطر!
- يعنى إنت إيه إللى مزعلك بالظبط؟
أنا باقول إن الناس إمتى حتشترى حاجاتها لما يرجعوا بيوتهم بعد الساعة خمسة، على ما يتغدوا ويريحوا حيلاقوا المحلات قفلت.
- يشتروا يوم الإجازة الجمعة أو السبت.
ما هى الدنيا ساعتها حتبقى زحمة قوى.
- شوية بشوية حيتعودوا.
ما أنا باقول كده برضه، وباقول كمان هى الناس معاها فلوس تشترى!
- طب إديكى بتردى على نفسك.
شوف أنا مقتنعة إن المحلات تقفل بدرى، أهو أرحم من أننا نقفل التكييف فى الحر ده، لكن يمدوها شوية، يخلوها تمانية أو حتى تسعة.
- المصريين يموتوا فى الفصال، ولو قالوا تسعة حتقولوا عشرة.. وفى الآخر يبقى ما عملناش حاجة.
أنا بس باقول إن الناس غلابة.
- مين دول إللى غلابة؟
أصحاب المحلات دول مش لما يقفلوا بدرى كده حالهم حيقف أكتر ما هو واقف.
- أصحاب المحلات غلابة! طب اسكتى اسكتى.. أومال إحنا نبقى إيه؟
بلاش أصحاب المحلات.. طب العمال إللى بيشتغلوا فى المحلات دى حيعملوا إيه؟
- عادى، إنتى قصدك إيه؟
قصدى إن أكيد مرتباتهم حتقل عشان فترة شغلهم حتبقى أقصر، أنا كمان أعرف إن فيه موظفين كتير بيشتغلوا فى المحلات بالليل عشان يزودوا دخلهم.
- كل حاجة عقدتيها، يعنى يعملوا إيه!
أنا باتكلم بالمنطق، مش حينفع نقفل التكييف لما الجو يبقى نار كده، ولسه لما ييجى رمضان، يشوفوا هم طريقة يزودوا بيها طاقة الكهرباء.
- بمناسبة رمضان شفتى القرار بتاع التوقيت الصيفى.
ماله؟
- تهريج.
بس كنا متوقعينه.
- لكن ما كنتش فاكر إنهم حيلغوه فى رمضان وبعدين يرجعوه لما الشهر يخلص، يعنى هى جت عالعشرين يوم إللى حيبقوا فاضلين فى سبتمبر!
آخر لخبطة.. حد يقول إنهم يغيروا التوقيت أربع مرات فى السنة.. مين بقى فى العالم بيعمل كده!
- محدش، بس القرار لما طلع قالوا إن من حق مجلس الوزرا تقديم أو تأخير الساعة وفقا لما يطرأ من ضرورات ومتغيرات.
آه، وطبعا رمضان من الضرورات والمتغيرات اللى طرأت فجأة
. - هو صحيح ساعات الصيام هى هى، بس أنا باقول لما الواحد يفطر الساعة سبعة أرحم من الساعة تمانية، خصوصا فى الحر ده. پ ما هم عارفين من سنين إن رمضان جاى فى أغسطس كانوا لغوا التوقيت الصيفى ده خالص، نفسى أفهم هم مصرين عليه ليه!
- بيقولوا عشان بيوفر كهربا.
برضه! يعنى إحنا حنقتصد فى استخدام التكييف، ونخفض نور الشارع خمسين فى المية، ونقفل المحلات الساعة سبعة، ونرجع التوقيت الصيفى بعد رمضان عشرين يوم.. كل ده عشان نوفر فى الكهربا؟
- آه.
وبعد ده كله حيزودوا الأسعار؟!
- آه.
والله الحكومة الذكية بتاعتنا دى غلبانة قوى! - بس تعرفى أنا مرة قريت إن التوقيت الصيفى ده مفروض يتعمل فى الدول البعيدة عن خط الاستواء عشان ساعات الليل فيها طويلة قوى، لكن عندنا مش مهم خالص، عشان ساعات الليل زى ساعات النهار.
أنا كمان سمعت واحد فى وزارة الكهربا بيقول إن التوقيت الصيفى ده مش بيوفر فى الكهربا إلا نص فى المية بس.
- حلوين.. بس أنا اللى غايظنى إن بقالنا سنين نتكلم فى موضوع التوقيت الصيفى ده، وكل الناس مش عاوزينه، والحكومة بتاعتنا مصممة عليه.
مش مصممة عليه، مصممة تعكنن علينا.
- مع إنهم عارفين إن ده بيعمل لخبطة فى مواعيد الطيارات وكمان بيقولوا بيلخبط أنظمة الكمبيوتر والبنوك.
يعنى إنت رأيك برضه إنهم يلغوه خالص؟
- لأ، أنا رأيى إنهم يلغوا التوقيت الشتوى.
إزاى تقول كده؟ إذا كان التوقيت الشتوى هو الأصل.
- افهمى، إذا كان الهدف إنهم يطولوا النار ويوفروا فى الكهربا يبقى الشتا أولى عشان المغرب فيه الساعة خمسة، يعنى بدرى قوى.
باقولك إيه، وطى صوتك أحسن حد من الحكومة يسمعك!
- يا ريت يسمعونى.
كفاية علينا اللخبطة اللى إحنا فيها.
- هو إنتى خايفة من إيه؟
خايفة تعجبهم الفكرة، فيخلوا التوقيت الصيفى فى الشتا، والتوقيت الشتوى فى الصيف!
- والله يعملوها.؟