عاوزين شعب جديد!!

* بطلى لف ودوران، واتكلمى على طول.. فيه إيه؟
- طب اوعدنى أنك حتاخد المسألة ببساطة.
*تانى حتلفى وتدورى، لو ما اتكلمتيش دلوقتى حأسيبك وأمشى، ومش عاوز أسمع.
- طب خلاص خلاص.. أصل أنا عرفت هم بيعملوا كده ليه.
* مين دول.. وبيعملوا إيه؟
- الحكومة يا أخى، ودكتور بطرس غالى.. عرفت ليه مصممين على حكاية الإقرارات بتاعة الضرايب العقارية.
* صحيح!! واضح إنها بلوى كبيرة عشان كده مترددة تقولى لى.
- من ناحية بلوى، هى بلوى.. بس يمكن أكون بأبالغ، لكن لأ، أكيد حتيجى على دماغنا.. من الأول وأنا بأقولك الموضوع فيه إن.
* اتكلمى بقى أبوس إيدك.. قلبى حيقف.
- بعد الشر عليك.. الحكاية بقى يا سيدى كلها عشان بطاقة الأسرة.
* قصدك اللى بيقولوا عليها البطاقة الذكية.
- هى دى.
* وإيه العلاقة بين البطاقة والإقرارات؟
- أصل البطاقة دى معمولة عشان خلاص حيحولوا الدعم لفلوس، وحيبتدوا بالسلع الغذائية، بدل ما يدعموا العيش حيدونا فلوس، وبدل ما ناخد سكر ورز وزيت وشاى على بطاقة التموين برضه حناخد فلوس.
* ما أنا عارف، وبقالى سنة ونص بأحاول أرجع بطاقة التموين وفشلت.. بس اللى مش عارفه حيعملوا الحكاية دى إزاى.
- هم قالوا إنهم حيبتدوا بالسلع التموينية عشان سهلة، يعنى البطاقة اللى بتاخد اتنين كيلو سكر، واتنين كيلو رز، ونص كيلو زيت، وباكو شاى.. بيقولك دى بتدفع عشرة جنيه وخمسة وسبعين قرش، لكن تمن الحاجات دى فى السوق خمسة وعشرين جنيه، يقوموا يدوهم الفرق يعنى حوالى خمستاشر جنيه.
* وإيه علاقة ده بالإقرارات؟!
- استنى بس، نيجى للعيش، بيقولوا إيه بقى.. إن كل واحد بياكل تلات ترغفة فى اليوم.
* جابوها إزاى دى.. الكلام ده لو فيه غموس يشبع، لكن الواحد بيديها طبق فول صغير، وياكله برغفين على الأقل على الفطار عشان يسد جوعه، ولسه الغدا والعشا.
- هم حسبوها كده، المهم الرغيف المدعوم سعره خمس قروش، والرغيف اللى مش مدعوم بيتباع بعشرين قرش.
* فين الرغيف اللى بالسعر ده دلوقتى، أقل سعر التلات ترغفة بجنيه.
- مش أنا اللى بأقول كده، هم اللى بيقولوا، فحسبوها بقى إن الفرق خمسة وأربعين قرش فى اليوم يعنى كل واحد يدوه فى الشهر تلاتاشر جنيه ونص دعم للعيش.
* يا حلاوتهم، من الأول الحسبة غلط، وبعدين لما يعملوا كده الأسعار حتزيد، عشان السوق حيبقى عرض وطلب ساعتها حيعملوا إيه.. حيزودوا الدعم النقدى ولاّ حيستعبطوا.
- الله أعلم.. بس يعنى تاريخهم معانا بيقول إنهم حيستعبطوا.
* أنا من الأول قلت اللى مش حيبقى عنده بطاقة تموين فى البلد دى حيضيع، لازم أتصرف وأشوف طريقة أعمل بيها البطاقة.
- ما تتعبش نفسك.. مش حتعرف تعملها.
* ليه بس؟!
- إذا كانت أم سيد مش عارفة تعملها.
* أم سيد!!
- بقالها عشر شهور مقدمة فى مكتب الشئون الاجتماعية عشان تعمل البحث الاجتماعى ومش بيردوا عليها.
* هى دى المشكلة.. البحث الاجتماعى.. مش ده معناه شهادة فقر؟!
- بيتهيألى كده.
* طب ما هى أم سيد دى أغلب من الغلب، ليه مش راضيين يدوها البحث الاجتماعى.
- فى الأول قالوا لها ما عندناش أوامر نعمل بحث اجتماعى لحد، وبعدين ابتدوا يقولوا لها فوتى علينا بكرة.
* خلى بالك، أنت لسه ما قلتيش حاجة على الإقرارات.
- اتفضل.
* إيه ده؟
- ده جرنال قديم لقيته وأنا بأوضب، مش عارفة إزاى عينى وقعت عالخبر، ربنا أراد إنى أكشفهم، بس يا خسارة، بعدما قدمنا الإقرار.
* الدنيا ضلمت.. عينى بقى عليها سحابة سودا، اقرى لى وقولى فيه إيه الجرنال ده.
- مكتوب إنه تقرير حكومى، من نوفمبر اللى فات، تصور!!
* اقرى المكتوب.
- إن عدالة الدعم النقدى تستوجب حصر جميع المواطنين وتحديد الفئات المستحقة للدعم وتحديد نسب متفاوتة لمنح الدعم النقدى طبقاً لحالات الأسر.
* عادى.. كلام إنشا.
- لسه، ما تقاطعنيش.
* حاضر، كملى.
- والاستفادة من الحصر الضريبى للعقارات من خلال الضريبة العقارية، ووضع ذلك معياراً لتحديد الفئات المستحقة والمبالغ المطلوب دفعها لهم كفرق للدعم.
* ........
- والنبى ما تزعل نفسك.. حسك بالدنيا.
* مش قادر آخد نفسى.
- يا ساتر يارب.. اشرب.. قول بسم الله الرحمن الرحيم.
* بسم الله الرحمن الرحيم أشهد أن لا إله إلا الله العفو من عندك يارب.. كان قلبى حاسس.. ياريتنى سمعت كلامك لما قلتى بلاش نقدم الإقرار.. بس خفت.. الغرامة كبيرة قوى.
- خلاص.. اللى حصل حصل.. كده كده كنا أكيد حنقدم الإقرار، مش هى دى المشكلة.
* إزاى بس؟! مش كفاية حندفع ضريبة، كمان حنتحرم من الدعم!!
- اللى عاوزه أقوله، إن مثلاً، واحدة زميلتى مرتبها زى مرتبى، وجوزها مرتبه زى مرتبك، ويمكن أكتر، بس ساكنين فى شقة إيجار.. ليه هم ياخدوا دعم وإحنا لأ.
* كلنا غلابة ومش حنقدر على أى زيادة فى الأسعار، ليه مش قادرين يفهموا
- كل ده عشان الدكتور بطرس غالى عاوزنا نبيع الشقة.
* الظاهر مافيش حل تانى.
- وأنت فاكر لو بعنا الشقة حتفرق معاهم، خلاص إحنا اتسجلنا عندهم وعمرنا ما حنشوف منهم حاجة.
* إزاى.
- هم دلوقتى شغالين، بيعملوا قاعدة بيانات، خلّصوا بطاقات لحداشر ونص مليون أسرة، وقالوا إن مش فاضل غير خمسة مليون أسرة بس، يعنى عرفوا مين اللى حيطلعوا له بطاقة ومين لأ.
* كل دول وإحنا مش فيهم؟! حرام، والله حرام.
- المهم إنهم شغالين دلوقتى فى عشرين محافظة وقربوا يخلصوهم وقالوا إن على آخر السنة حيكونوا كمان خلصوا تسع محافظات تانية فيهم القاهرة والجيزة.
* يعنى لسه عندنا وقت.. نقدر نعمل حاجة.
- حاجة زى إيه؟
* أى حاجة.. أصلى سمعت إن الدكتور نظيف قال إنهم حيستغلوا بطاقة الأسرة الذكية دى فى تقديم خدمات كتير غير التموين.
- إحنا ضعنا خلاص.. بكره يقولوا حنشيل الدعم من كل حاجة.
* عارفة ده معناه إيه؟
- أكيد بلاوى كتير.
* عندك الكهرباء مثلاً.
- يا حوستى، ده الفاتورة وصلت سبعين جنيه حتزيد تانى؟!
* أكيد، وتلاقيهم كمان حيشيلوا الدعم اللى عالأدوية.
- ما هى دى خلصت خلاص.
* من إمتى؟
- مش بيعملوا القانون الجديد بتاع التأمين الصحى!!
* يعنى إيه الكلام ده، فيه حكومة تعمل كده، تشيل ايدها من كل حاجة بالطريقة دى!!
- ما هم مزنوقين.
* إذا كانوا مش عارفين يعملوا إيه يمشوا، يقولوا مش عارفين ويسيبوا غيرهم يشتغل.
- ومين قالك إن غيرهم ده حيعرف يشتغل.
* فيه ناس كتير بتقول أفكار حلوة، بس مافيش حاجة عاجباهم.
- زى إيه؟
* مش قالوا مرة إن الدعم بتاع العيش بيروح لغير المستحقين.
- على طول بيقولوا كده، وهو ده سبب أنهم حيدوا الدعم نقدى.
* هم بيقولوظا إن الأغنيا بياكلوا الرغيف المدعوم، وده مش حقيقى، المشكلة إن الدقيق المدعوم هو اللى بيتسرب بياخدوه الأغنيا ويعملوه جاتوه.
- هى هى.
* لأ.. مرة واحد قالهم تدوا الدقيق للمخابز، وبعدين انتوا اللى تشتروا العيش وتبيعوه، وبكده يضمنوا إن الدقيق كله اتعمل عيش، بس هم مش عاوزين وجع دماغ.
- ما هى حاجة صعبة برضه، وممكن يحصل فيها نفس المشاكل.
* أهو كده.. الحكاية كلها سببها الفساد، السرقة، الحرامية.. يبقى يحاربوا كل دول، مش يحاربونا إحنا.. الغلابة!!
- بالمناسبة.. أنت عارف صرفوا كام لغاية دلوقتى على البطاقة الذكية دى.
* كام؟
- مية أربعة وستين مليون جنيه.
* بتوع إيه دول؟
- بيشتروا بطاقات خام، والأجهزة اللى بتصدرها، والأجهزة اللى بتقراها.
* آآه.. مش تقولى كده من الأول.. عليه العوض ومنه العوض.