• اسمي مكتوب؟! - نعم!! فين! • أصل الدكتور عثمان محمد عثمان بيقول إنه يعرف الفقراء بالاسم، تفتكري اسمي عنده؟ - يا راجل بطّل تقول الكلمة دي، لو العيال سمعوك بتقول إنك فقير حيتقهروا ! • ويعني هم مش حاسين!! حاجات كثير بطلنا نجيبها عشان نوفر، لما الطماطم غليت مش قعدنا كثير ما ندخلهاش البيت، والبنت كانت زعلانة، بس فاهمة إن الإمكانيات مابقتش زي زمان، مع إن مرتباتنا زادت. - بس إحنا برضه مستورين والحمد لله • خلاص، يبقي اسمي مش مكتوب - يا أخي فيه ناس مش لاقيين العيش الحاف • ما أنا عارف وحاسس بيهم ، وخايف أبقي زيهم - بعد الشر، ليه بتقول كده !! • انتي مش متابعة إللي حاصل في البلد اليومين دول ؟ - بتتكلم عن إيه ؟ • عن زيادة الحد الأدني للأجور. - متابعة طبعا، وهي دي حاجة تزعلك ؟! • مش الفكرة، شوف الكلام ماشي إزاي.. بيقولك هم عملوا الحد الأدني ربعميت جنيه، وإن الزيادة مش هتشمل الأجور الأعلي.. - آه، بيقولوا لو زودوا الكل الأسعار حتزيد • هو ده إللي مخوفني - إيه بالظبط ؟ • أولا الأسعار بتزيد من غير سبب، ولما يرفعوا الحد الأدني برضه الأسعار حتزيد، يبقي مين اللي هيضيع؟ - مين؟ • إحنا طبعا.. لأن الأسعار بتزيد مرتين وإحنا حنفضل زي ما إحنا، وده معناه إيه؟ - إيه ؟! • إن دخلنا حيقل؟ - إزاي الكلام ده.. قصدك حيقللوا مرتباتنا عشان يرفعوا الحد الأدني ؟! • لأ، ما تفهمي.. علم الاقتصاد بيقول إن التضخم إللي هو يعني الارتفاع المستمر في الأسعار، التضخم ده لما يزيد أصحاب الدخول الثابتة هم إللي بيعانوا.. ليه، لأن دخلهم بيزيد بمعدل أقل من ارتفاع الأسعار، يعني كأنه قل عشان إللي حيقدروا يشتروه حيقل. - صح.. بس لازم تعترف إن الحد الأدني لابد يزيد، والله أنا مش عارفة الغلابة دول عايشين إزاي، والربعميت جنيه دول حيكفوا إيه!! • أنا سمعت الدكتور عثمان وكمان الدكتور بطرس غالي بيقولوا في التليفزيون إنهم عارفين إن المبلغ ده مش هيكفي حاجة بس مايقدروش يعملوا أكتر من كده. - والدكتور أحمد نظيف كمان قال كده، وقال بطلوا تطالبوا بزيادة الأجور. • أنا مستعد أبطل أقول زودونا بس بشرط يعملوا هم حاجة في موضوع زيادة الأسعار دي، يعني الواحد بس يعمل إيه، يسرق. - في البرنامج إللي كان مستضيف الدكتور عثمان محمد عثمان واحد موظف حكومة اتصل وقال إن مرتبه تلتميت جنيه، ولما المذيع سأله بتعمل إيه قال إنه بيشتغل في تلات أماكن، طول اليوم، يطلع من الشغلة ديه يروح لدي.. غلب • والدكتور عثمان قال له إيه؟ - سكت • أصل أنا سمعته بيقول إن أقل موظف في الحكومة مرتبه بيوصل لربعمية وستة جنيه. - آه، قال كده فعلا، بس جت بقي مكالمات كتير قوي كلها من موظفين في الحكومة، إللي لسه متعين وإللي بقاله عشر سنين وأكتر، وكلهم مرتباتهم مش بتوصل لربعميت جنيه. • يا شيخة، وبعدين.. - في الأول كان بيقول أكيد ده الأساسي، وبعدين كلهم قالوا لأ ده الشامل. بقي مستغرب قوي وعمال يبص في الجدول، ويقول مش معقول. • جدول إيه ؟! - جدول المرتبات إللي وافق عليه مجلس الشعب وإللي مكتوب فيه إن مافيش موظف مرتبه أقل من ربعمية وستة جنيه. وكان حيتجنن. • أنا مش فاهم، إزاي يحصل الكلام ده يعني الجدول حاجة، والحقيقة حاجة تانية، ولما الدكتور عثمان مش عارف، مين إللي حيقول لنا. - ما هو المذيع قال عاوزين الدكتور أحمد درويش بس ماعرفوش يجيبوه. • طب وماحدش قاله إن موظفين المحليات إللي عاملين اعتصامات وإضرابات عشان مرتباتهم تسعة وتسعين جنيه، وإنهم مافضوش اعتصامهم إلا لما مجلس الوزراء وعدهم بزيادة المرتبات لتلتمية وعشرين جنيه. - يعني إيه؟ • يعني أقل من ربعميت جنيه أهو، يعني مجلس الوزراء عارف إن الحد الأدني في الحكومة مش بيوصل لربعمية وستة أهو، يعني عاوز حد يشرح لنا اللي مكتوب في الجدول ده بالظبط. - اسمع بس، ما تتحمئش كده، هو قال أن القانون بتاع سنة أربعة وتمانين إللي لسه ما اتعدلش بيقول إن الحد الأدني للأجور هو خمسة وثلاثين جنيه وإن.. • نعم نعم نعم.. هو عاوز حد دلوقتي يعيش بخمسة وثلاثين جنيه!! - لأ يا أخي، ماقالش كده، يا ساتر عليك • طب ما تتكلمي، قال إيه بالظبط - قال إنهم حسبوا الخمسة وثلاثين جنيه سنة أربعة وتمانين تساوي كام دلوقتي لقوها تساوي ميتين وثمانين جنيه. • حسبوها إزاي إنشاء الله؟ - مش عارفة، أكيد ليهم طريقة • أرجع تاني وأقولك علم الاقتصاد بيقول إيه، إن عشان يحسبوها لازم يعملوا مجموعة للسلع الأساسية، ويشوفوا كانت تساوي كام، ودلوقتي تساوي كام - أكيد حسبوها كده • طب أنا راضي ذمتك، تفتكري سنة أربعة وتمانين لما كانت مرتباتنا في حدود الخمسة وثلاثين جنيه دول، كنا عايشين إزاي؟ - زي الفل • مش قدرنا نجيب عربية بالتقسيط، ونعيش وندفع الأقساط من مرتباتنا. - حصل • يقدر واحد لو مش متجوز وبيقبض الميتين وثمانين جنيه بتاعتهم يعمل كده دلوقتي ؟! - لأ طبعا، طب يا ريت بس المبلغ ده يكفيه عيش وفول • يبقي حسابتهم غلط، وإحنا إللي رايحين في الرجلين. - اسمع بس، هو قال إن لو إحنا عاوزين نرفع مستوانا لازم نزود إنتاجنا عشان الناتج القومي يزيد، وإن دي الطريقة الوحيدة عشان نزود مرتباتنا. • يا سلام.. - آه والله بيتهيألي عنده حق، مش كده ؟ ! • عنده حق يا ستي، بس أنا عاوز أسأله سؤال واحد. - إللي هو إيه ؟ • لما إحنا مانزودش إنتاجنا، هم دورهم إيه؟ - مين ؟!! • الوزرا كلهم، مش دورهم برضه يخلونا نزود إنتاجنا - إزاي ؟ • إزاي إيه، هو ده الفرق بين حكومة وحكومة. حكومة تقدر تفتح مجالات وتزود استثمارات. وتعلم الناس وتدربهم عشان يزودوا إنتاجهم، وحكومة تانية قاعدة مستنياهم يعملوا كده من نفسهم. - أيوه يا سيدي هو قال كده برضه • قال إيه ! - قال إن لازم نطور التعليم ونهتم بالتدريب • وبعدين. - قال كده، حتي الدكتور بطرس غالي في برنامج تاني قال نفس الكلام. • وبعدين، حيعملوا إيه يعني. - قالوا ده موضوع تاني مش مجاله دلوقتي وإحنا بنتكلم عن الحد الأدني للأجور. • أومال مجاله إمتي ؟ - ما أعرفش وأنا مالي. متسألهم. • عمرنا ما نتقدم إلا لما المواضيع كلها تتشبك في بعض، مافيش حاجة مفصولة عن التانية. - عندك حق. • أنا بس عاوز حد يقول للدكتور عثمان إن فيه دراسة معمولة في المركز المصري للدراسات الاقتصادية في كلية الاقتصاد والعلوم السياسية جامعة القاهرة بتقول إن الحد الأدني للأجور سنة أربعة وتمانين كان بيساوي ستين في الميه من متوسط نصيب الفرد من الناتج القومي، في سنة ألفين وتسعة الحد الأدني وصل لتلاتاشر في الميه بس من المتوسط ده. - يعني إيه الكلام ده ؟! • هو حيفهم، الدراسة كمان بتطالب بمراجعة الحد الأدني للأجور كل سنتين عشان يقارنوه بالأسعار. - بس الدكتور بطرس غالي قال إن القانون بيقول إن مراجعة الحد الأدني تتم كل ثلاث سنين • وبعدين؟ - بيراجعوه كل تلاث سنين • بيراجعوه ولا وبيرفعوه ؟ - بيراجعوه، زي ما القانون بيقول • يا فرحتي - أنا بس عاوزه أقولك حاجة تانية قالها الدكتور عثمان بس خايفة أحسن تزعل. • قولي قولي، يعني حيحصل إيه أوحش من إللي أنا فيه !! - أصله قال إنهم ممكن يجيبوا عمال من بنجلاديش يقبلوا بأقل من الربعميت جنيه إللي مش عجبانا دي. • إيه ده، تهديد ولأ إيه! - مش تهديد، بس هو قال إن عمال بنجلاديش سعرهم رخيص، وكمان كفاءتهم أعلي من المصريين، وإن ده معناه • معناه تهديد، ماتكمليش، طب إيه رأيك بقي إن الوزيرة عائشة عبد الهادي قالت إن أقل أجر بياخده عامل أسيوي في مصر هو ميتين دولار، ده غير مصاريف السفر والإقامة. - لا يا شيخ • زي ما بأقولك - طب وآخرتها • هي القوطة بكام النهارده - ثلاثة جنيه • إحمدي ربنا - الحمد لله علي كل شيء؟
