• اتأخرنا قوي ولا لسه في وقت؟ علي إيه بالظبط؟! • علي الانتخابات نعم!! • هو التقديم إمتي؟ باين الحالة اشتغلت، أجيب لك كوباية مية؟ • انت نسيت ولا إيه، مش اتفقنا إنك هتنزل الانتخابات!! إمتي حصل الاتفاق ده؟ • من كام شهر كده. ياشيخة!! • إزاي نسيت! حتي ساعتها اتفقنا إن لو أنت مانزلتش أنا اللي حنزل. بالذمة ده وقت تهريج. مش حاسة باللي إحنا فيه، بدل الفراغ اللي إنتي عايشة فيه تعالي شوفي لنا حل. • حل لإيه؟ مالك عامل كده ليه؟! القوطة بقت بتلاتاشر جنيه. • آه.. حاجة تحرق الدم، والبت ولا كأنها عايشة في البلد كل يوم تسأل فين القوطة.. فين القوطة.. طول عمرها بتحب القوطة وكنا بنقول الحمد لله علي كده مش أخوها اللي عاوز مانجة وبيزعل قوي لما أقوله غالية. • اهي القوطة بقت أغلي من المانجة طب بدل الهزار البايخ بتاعك ده قولي لي أعمل إيه، كل حاجة غليت وأنا مكسوف قوي من بنتي اللي كل طلباتها شوية قوطة ومش عارف أجبها لها. • ما هو عشان كده أنا افتكرت أننا قررنا أنك ترشح نفسك في الانتخابات. تاني!! • تاني وتالت، ماهو ما ينفعش نقعد ساكتين علي طول كده وكل شوية حاجة تغلي لما خلاص قربنا نبيع هدومنا. ولما أنا ارشح نفسي في الانتخابات إيه اللي حيتصلح بقي؟! • كل حاجة. إزاي يعني؟! • لازم مجلس الشعب ده كله يبقي ناس مننا.. زينا.. حاسين بينا وقلبهم علينا، ساعتها كل حاجة حتتغير. واللي زينا ومننا دول حينجحوا إزاي؟! • الناس حتختارهم. بيتهيألك، الانتخابات دي موضوع كبير قوي، محتاج فلوس ودعاية وتربيطات واتفاقات وحاجات كتير اللي زينا مايعرفوهاش. • اسمع بس أنت ناس كتير في الشارع يعرفوك، تنزل وتقعد معاهم، وأول ما تقول لهم حارخص لكم القوطة كلهم حينتخبوك. يعني أكذب عليهم. • ليه، ما أنت فعلا لما تنجح ممكن ترخص كل حاجة. مالك واخدة كل حاجة ببساطة كده. • مش الفكرة، أنا بأقول إننا لازم نكون إيجابيين أنت راجل مدير كبير وفاهم كويس في كل حاجة. نبتدي الأول وبعدين الأمور حتمشي، أنا حاسة انك حتنجح. وحاجيب فلوس منين عشان الدعاية والجولات ورسايل الموبايل. • إيه رسايل الموبايل دي؟ رسايل نبعتها للناس عشان نقول لهم ينتخبوني. • لأ خلاص، ماهي الرسايل دي اتمنعت. إحنا حنركز بس علي اللقاءات مع الناس، تروح القهاوي وتتكلم مع اللي قاعدين، وأنا حاساعدك وأنزل أزور الستات في بيوتها. بأقولك إنتي مش فاهمة حاجة، لو الحكاية كده ماكنش حد غلب. • طب اسمع، أنا عرفت أن فرصتك ممكن تبقي أكبر لو نزلت عمال أو فلاحين، نبتدي من هنا، روح قدم ورقك علي إنك عامل. أبتديها تزوير من الأول، يبقي عمري ما هنفع الناس ولا أعمل اللي أنا نازل الانتخابات عشانه. • تزوير ليه؟ عشان أنا مش عامل. ومعايا مؤهل عالي. • هو العامل لازم يبقي مؤهل متوسط؟! لازم يبقي ابتدي حياته العملية عامل، يعني بيشتغل عمل يدوي أو ذهني في الصناعة أو الزراعة أو الخدمات، وبيعتمد علي دخله من العمل ده، وممكن يكون أخد المؤهل بعد كده. • بس أنا باسمع عن ناس كتير بينزلوا عمال وهم مؤهلات لواءات شرطة سابقين، ومحامين ووزرا كمان، ومش بس كده، أنا لسه قارية في الجرنال إن واحد سقط في الانتخابات اللي فاتت لما حب ينزل السنة دي غير صفته من فئات إلي العمال عشان ابن المحافظ نازل فئات، تسمي ده إيه!! قولي إنتي. • أنا قلت اتشائم لما سقط وقال يغير. يعني هو فئات أصلا ولا عمال. • مش عارفة أنا قلت يمكن أي واحد حر يختار الصفة اللي هو عاوزها. لأ العامل زي ما قلت لك، والفلاح هو اللي الزراعة شغله الوحيد ومصدر رزقه، ويكون عايش في الريف وزمان كان مفروض مايكونش عنده أكتر من عشرة فدادين، بس دلوقت مش عارف. • يعني هم بيعرفوا إزاي؟ بيجيبوا شهادات تثبت إنهم عمال أو فلاحين. • مين يعني اللي بيديهم الشهادات دي؟ العمال بيجبوها من الاتحاد العام لنقابات عمال مصر. يروح لهم وياخد منهم شهادة إنه في نقابة عمالية، وساعتها ياخد صفة عامل. • يعني كل العمال لازم يبقوا في نقابة، ما في عمال كتير مالهمش نقابات. آه بس هي كده. • طب والفلاح. برضه بيجيب شهادة حيازة أرض زراعية. • بس كده. بسيطة بسيطة إزاي يا فالحة. • أكيد فيه طرق يعني، ماهي الأوراق عندنا سهلة. برضه عايزاني أزور!! • بلاش، عندك حق ماينفعش نبقي زيهم واحنا عاوزين نصلح اللي عملوه خلاص انزل فئات. ساعتها عمري ما حنجح عشان دي كل اللي نازلين عليها وزرا ورجال أعمال فلوسهم كتير. • هو ليه يعني فرصة العمال والفلاحين أكبر من فرصة الفئات؟ عشان الدستور بيقول إن لازم المجلس يكون فيه خمسين في المية عمال وفلاحين، عشان كده ممكن الدايره ينجح فيها اتنين عمال أو فلاحين لكن واحد بس فئات. • ما أنا برضه سمعت أنهم عاوزين يلغوا الخمسين في المية عمال وفلاحين دي. أنا كمان سمعت ناس كتير بتتكلم في الموضوع ده، بيقولوا مالهاش لازمة دلوقتي. • وأنت رأيك إيه؟ شوفي، لما اتعملت نسبة العمال والفلاحين دي كان سببها إيه، إن النسبة الأكبر من الشعب هم العمال والفلاحين وكان لازم يبقي فيه ضمان لتمثيلهم في البرلمان عشان حقوقهم ماتضعش. • وبعدين. بس، عاوزه إيه تاني؟ • عاوزه أعرف رأيك. ماشي، أولاً النسبة دي منصوص عليها في الدستور يبقي لازم نلتزم بيها يا إما يغيروا الدستور بقي، وهم بيقولوا تغيير الدستور ده مش لعبة ومش كل شوية حنغير. • وإيه كمان؟ وكمان العمال والفلاحين دلوقتي ضايعين، مش بتشوفي كل يوم والتاني وقفات واحتجاجات عشان العمال مش واخدين حقوقهم. مش الفلاحين بيصرخوا إن التجار بياخدوا منهم المحصول برخص التراب ويكسبوا من وراهم. • يعني العمال والفلاحين حقوقهم ضايعة يعني لازم نضمن لهم تمثيل في المجلس، زي الدستور ما بيقول. صح، إنتي عارفة إن فيه إحصائية في وزارة القوي العاملة بتقول إن نسبة الفئات بين المصريين واحد وتلاتين في المية، والفلاحين ستة وعشرين في المية، والعمال تلاتة وأربعين في المية!! • إيه ده، يعني العمال والفلاحين حوالي سبعين في المية من الشعب!! آه، بس المشكلة إن الخمسين في المية اللي في المجلس مش عمال ولا فلاحين. • يعني النسبة موجودة، لكن العمال والفلاحين مش موجودين. عليكي نور. • ماهم بقي يا إما يلغوها، يا إما ينفذوها. وإنتي إيه رأيك؟ • رأيي... رأيي إن عضو مجلس الشعب ده لازم يمثل الشعب سواء كان فئات أو عمال أو فلاحين، بس برضه أبقي عارفة هو إيه بالظبط، تفتكر يعملوا إيه؟ أولاً اللي يغير صفته يبقي متلاعب وتسقط عضويته، ثانياً يبقي فيه شروط واضحة ومش سهلة عشان المرشح ياخد صفة العامل أو الفلاح. • لسة ثالثاً. إيه؟ • اللي يثبت إنه زور في الصفة لازم يتعاقب ويتحبس لأنه زور، ويتمنع خالص إنه يرشح نفسه تاني في أي انتخابات. أحسن كلام قولتيه النهارده. • خلاص يبقوا يبتدوا بكل اللي رشحوا نفسهم في ألفين وخمسة بصفة وبعدين غيروها السنة دي. ده أنتي أحلامك وسعت قوي. • بس مش عارفة أحقق أهم حلم. بتاع إيه؟ • أنت ترشح نفسك وتنجح. خلاص، رشحي نفسك إنتي. • إذا كنا مش ضامنين نجاحك، يبقي أنا اللي حانجح. ماهي فرصتك أكبر. • قصدك إيه! الكوتة. • عندك حق. دي فكرة هايلة. عشان تعرفي إني بعرف أفكر. • بس هي الكوتة دي فيها عمال وفلاحين برضه؟ طبعاً. • يا خسارة تبقي باظت. وباخت، أنا عندي فكرة أحسن. • قول بسرعة. أنا سمعت إنهم حيبيعوا القوطة في المجمعات بأربعة جنيه ونص، إلبسي وتعالي نروح نلحق لنا إنشا الله كيلو، البنت كلت وشي .