السكر بسبعة جنيه واللي راح مابيرجعش!!

• إيه ده.. الشاي مافيهوش سكر.
- لأ فيه معلقة.
• ومن إمتي باشرب معلقة واحدة، ما إنتي عارفة إني بأحبه بتلات معالق.
- لو حطيت لك التلات معالق يبقي معنديش دم.
• نعم!! إنتي بتقولي إيه!!
- إنت مش حاسس؟!
• وضحي كلامك.
- كيلو السكر وصل سبعة جنيه.
• كام؟! سبعة!! من إمتي؟! ليه؟!!
- من زمان، بس كان لسه اللي عندنا ماخلصش، النهارده اشتريت بالسبعة جنيه، قلت خلاص، محدش يحط في الشاي أكثر من معلقة، وكمان مافيش أكثر من كوبايتين شاي في اليوم.
• مش قادر أشربه، مش حينفع.
- يبقي تبطل شاي خالص.
• هو الواحد كل شوية يبطل حاجة، حيفضل لنا إيه!!
- ماتزعلش نفسك هم مش بيقولوا السكر مضر بالصحة!!
• وكمان قالوا إن عندهم وسائل للتحكم في الأسعار وأنهم حيظبطوا السوق.
- مين اللي قال الكلام ده؟
• المهندس رشيد.
- أنا اللي قريته! إن أسعار السكر العالمية هي اللي زادت.
• كلام فاضي، حجة دايما يطلعوها لما الأسعار تزيد.
- ياراجل.
• إنتي نسيتي ولاّ إيه، مش زمان قلتي إن لما الأسعار العالمية بتقل، إحنا أسعارنا بتفضل زي ما هي.
- آه والله.
• شوفي بقي أنا قريت إيه.
- إيه؟
• تصدقي إن كيلو السكر السنة اللي فاتت كان سعره اتنين جنيه ونص، يعني في سنة واحدة زاد ميتين وخمسين في المية.
- حاجة تحرق الدم.
• في أول السنة يعني تقريباً في يناير كده، وصل كيلو السكر لخمسة جنيه، بعدها الأسعار العالمية اللي بيقولوا عليها نزلت بس عندنا مانزلتش، وفضل السعر خمسة جنيه.
- لأ فيه أوقات كنا بنشتريه بأربعة بس وساعات كمان أربعة إلا ربع.
• ساعتها كان مفروض نشتريه باتنين ونص.
- منهم لله.
• المهم بقي لما الأسعار العالمية دلوقتي ارتفعت راحوا رافعين السعر.
- إنت قصدك إيه؟
• قصدي واضح، السعر اللي يوازي الأسعار العالمية دلوقتي هو أربعة جنيه، وعلي أكتر تقدير خمسة.
- لأ مش معقول.
• زي ما بأقولك، ده كمان بالنسبة للمستورد، لكن المحلي بقي حاجة تانية.
- إزاي؟
• المحلي بيتباع بخمسة جنيه في حين إن تكلفة إنتاج الطن ماتزيدش عن تلات آلاف جنيه، يعني مفروض يتباع مش أكتر من تلاتة جنيه للكيلو.
- ياخبر، هو إحنا حنفضل كده لحد إمتي؟!
• لحد ما يلاقوا لنا صاحب.
- وتلاقيهم كمان زي العادة بيبيعوا القديم بالأسعار الجديدة.
• طبعا، عادتهم ولاّ حيشتروها.
- لا والله المهندس رشيد عنده حق، حيظبطوا السوق ويسيطروا علي الأسعار.
• تعرفي، أنا استغربت جدا لما المهندس رشيد قال الكلام ده.
- ليه؟
• أصل رئيس شعبة المواد الغذائية بغرفة القاهرة التجارية كان قال إن قرار وزارة التجارة بتثبيت سعر كيلو السكر بخمسة جنيه مش ملزم لمحلات البقالة والسوبر ماركت.
- يعني إيه؟
• يعني القرار ده طالع للمجمعات الاستهلاكية الحكومية بس.
- إذا كنت إنت لسه قايل المفروض الإنتاج المحلي بيتباع بأربعة جنيه بالكتير، يقوموا لما يحبوا يسيطروا علي الأسعار يبيعوه في الجمعيات بخمسة!!
• ما هو السبب الغلاوة فيه إحصائية طالعة من الجهاز المركزي للتعبئة العامة والإحصاء أن متوسط نصيب الفرد في مصر نزل السنة اللي فاتت من اتنين وتلاتين كيلو في السنة لاتنين وعشرين كيلو بس، يعني قل عشرة كيلو في سنة واحدة.
- ياااه، الواحد بيستهلك كل ده!!
• آه شوفي بقي ده معناه إيه.
- إيه؟
• يعني الأسرة اللي زينا كده، أنا وانتي والولد والبنت بنستهلك سكر بكام في الشهر.
- لو عالشاي والقهوة بس بنشتري بتاع عشرة كيلو كل شهر لو عملت حاجة حلوة.
• وهو إنتي بقيتي تعملي لنا حاجة حلوة أبداً!!
- عشان أوفرلك، إذا كان علي الشاي السكر بس حيكلفنا سبعين جنيه في الشهر، مين بقي يقدر علي كده؟
• الناس غلابة قوي، أنا أعرف واحد لما ولاده يطلبوا منه حاجة حلوة يعمل لهم شاي ويزود السكر فيه ويغمسوه بالعيش.
- طب أنا عاوزة أسألك سؤال مادام إن سعر السكر المستورد أغلي من المحلي، ليه مانزودش زراعة القصب والبنجر عشان نزود إنتاجنا ويكفينا؟!
• لا.. ده كلام كبير قوي وأنا ماأحبش أتكلم في السياسة.
- سياسة إيه، مش خلاص بطلنا نزرع قمح، وبطلنا نزرع قطن، أمال بنزرع إيه؟
• بنزرع كل حاجة، بأقولك بطلي كلام في السياسة.
- لأ بجد، أنا مش فاهمة.
• أفهمك.. إحنا بنستهلك في السنة اتنين مليون وسبعميت ألف طن سكر.. إنتاجنا اتنين مليون بس والفرق ده هو بس اللي بنستورده، يعني بنزرع أهو، المشكلة اللي بيقولوا عليها إن الإنتاج العالمي قل بسبب قلة الأمطار عشان كده السعر زاد.
- كلام فاضي، مادام إنتاجنا كبير كده وبنستورد أقل منه مش معقول ننام ونصحي نلاقي السكر زاد عشان المطر قل.
• في دي عندك حق، المفروض إن إحنا لسه عندنا مخزون كبير من إنتاجنا المحلي، وبيقولوا أنه يكفي السوق المحلية كمان تلات أربع شهور، يعني مافيش أي مبرر نرفع السعر بمجرد ماعرفوا إن الأسعار العالمية زادت.
- ده أنا كمان قريت واحد بيقول إن السكر عمره ماحيرجع لأربعة جنيه تاني.
• ما هو عشان الإنتاج قل زي ما قلت لك.
- طب بس يستبشروا خير، يمكن المطر يزيد السنة دي والمحصول يزيد معاه.
• علي الله، ولو إني ماأعتقدش.
- ليه بس!!
• أصلهم كمان بيقولوا إن مصانع السكر بتخسر نتيجة الخساير اللي بيتعرضوا لها.
- خساير!!
• آه.. بيقولولك إن الدكتور نظيف وعد شركات السكر الشهر اللي فات إن الحكومة حتخفض سعر الطن لأربع تلاف وخمسميت جنيه، بس ماحصلش وطلع لغاية خمس تلاف وتمنمية، وده سبب خسارة كبيرة للشركات وكمان زيادة في الأسعار بشكل كبير لغاية ما توصل للمستهلك.
- أنا خايفة الأسعار تزيد كمان، أصلي سمعت إن الكيلو حيوصل تمانية جنيه.
• فال الله ولا فالك، أهو الكلام ده اللي بيخلي التجار يرفعوا السعر من غير ما يخافوا.
- كلام إيه؟
• كلامك.
- كلامي أنا هو السبب في زيادة الأسعار!!
• أيوه، الإشاعات اللي بتطلعوها دي، لما الناس كلها تقول السعر حيزيد ويوصل لتمانية جنيه، لما التجار يعملوها يبقي عادي.
- هو أنا اللي بأقول، ده كلام مكتوب في كل الجرايد واللي قايلينه مسئولين وأصحاب شركات، ومش بس كده ده كمان مكتوب إن السكر اختفي وإن الناس بتدور عليه في المحلات وتغلب علي ما تلاقي محل عنده سكر.
• كمان، يبقي خلاص.
- خلاص إيه؟
• دي لعبة بيلعبوها اللي محتكرين السكر في البلد.
- هو فيه كمان محتكرين للسكر.
• بيقولوا كده.
- بيقولوا إيه؟
• إن شركات الإنتاج بتوزع السكر علي مجموعة صغيرة من كبار التجار، عشان كده بيقدروا يتحكموا في السوق.
- عالعموم أنا قررت اشتري السكر من الجمعية عشان سعره أقل، صحيح يعني لونه غامق شويتين، وريحته مش قد كده، بس علي الله ألاقيه.
• حتلاقي، أنا قريت أنهم كل يوم بيطرحوا عشر تلاف طن في المجمعات الاستهلاكية، صحيح إن فيه واحد قال إن فيه تجار كبار بيشتروها عشان يبيعوها بالغلا ويكسبوا بس أنا بقي بيتهيألي إن دي إشاعة.
- إنشاء الله تبقي إشاعة.
• الشاي برد، ماتقومي تعملي لي كباية تانية وتزودي فيها معلقة سكر.
- أبدا، ده يبقي حرام، خاسخنها لك وتشربها بمعلقة واحدة.
• لأ، سخينيها زي بعضه، بس حأشربها بمعلقتين.
- ماشي، بس مافيش شاي بعد الظهر.
• ياشيخة حرام عليكي، ماتزويدهاش، ده أنا مدير وإنتي موظفة كبيرة، يعني أحسن من غيرنا كتير.
- أحسن من غيرنا الحمد لله، بس بسبب إني بأعمل كده، بآخد بالي من كل حاجة، عشان كمان الوزرا بتوعنا مايقولوش حاجة.
• حيقولوا إيه يعني؟
- حيقولوا إن إحنا مبذرين، وإن إحنا السبب في زيادة الأسعار، والسبب في قلة المطر اللي سبب قلة المحصول.
• علي رأيك، هاتي الكباية، حأشربها.
- باردة وبمعلقة واحدة.
• آه، يعني هي جت علي دي، ياما شربنا.