سكك حديد فرست كلاس

* تعرفى، أنا مرتاح قوى لإن وزير النقل استقال، إنتى مرتاحة زيى؟
- نعم، بتقول إيه؟!
* سرحانة فى إيه؟
- مش سرحانة، تعالى اقرأ مكتوب فى الجرنال النهاردة بعد تلات أيام بس من حادث العياط حصل إيه.
* خير.
- عربية قطر مطروح خرجت عن القضبان، وسواقين قطارات الشرقية عاملين إضراب لإن أجهزة التحكم عطلانه وكمان مافيش أجهزة لاسلكى. إنت كنت بتقول إيه؟
* ولا حاجة، خلاص. بس برضه حاجة كويسة إن الوزير استقال، لإن ده اعتراف منه بالمسئولية
- عندك حق، بس بصراحة أنا شايفة إن عليه مسئولية تانية، مش المسئولية السياسية لوحدها.
* قصدك إيه؟
- شوف، كل الناس مش عاجبها إن معظم الوزرا رجال أعمال لأن تفكيرهم ماشى فى سكة تانية بعيدة عن الناس الغلابة.
* أنا بأكلمك فى إيه وإنتى بتتكلمى فى إيه؟
- إفهم اللى عاوزه أقوله، الوزير قبل ما يستقيل عمل تعويض كبير للضحايا بتوع الحادثة، مين اللى حيدفع التعويضات دى؟
* تعويضات إيه، هى فلوس الدنيا كلها تعوض الروح اللى ماتت؟
- جاوبنى بس مين اللى حيدفع؟
* الوزارة طبعا، يعنى وزارة النقل.
- منين؟
* من ميزانيتها.
- يعنى إحنا اللى دافعينها، مش الميزانية دى جاية من الضرايب؟!
* أمال إنتى عاوزه مين اللى يدفعها؟
- الوزير، ربنا يزيده رجل أعمال كبير ما أعتقدش إن مبلغ التعويضات ده يسبب له أزمة، ساعتها يبقى رجال الأعمال لهم لازمة فى الوزارة.
* بطلى تتكلمى عن التعويضات،، الناس ماتت، الله يرحمهم ويصبر أهاليهم. المهم الحوادث دى تقف بقى.
- عمرها ما تقف طول ما إحنا ماشين بنفس الطريقة. طب ممكن تقولى رئيس هيئة السكة الحديد ، إيه الفرق بينه وبين الوزير، ده يمكن هو مسئول أكتر.
* ماهم شالوه..بس بعد ما حول أربعة وثلاثين موظفاً للتحقيق
- تلاقيهم يا حرام موظفين صغيرين.
* لا قال ، فى حوار فى الجرنال، للعلم فيهم درجات وظيفية عليا لأننا مش بنفرق بين كبير وصغير فى المسئولية.
- أنا معاك، بس إنت تعرف إن هيئة السكة الحديد دى كل شوية يغيروا رئيسها، يعنى فى الكام سنة اللى فاتوا جابوا ييجى خمس ست رؤساء.
* طب عاوزه إيه؟
- عاوزه أقول إن المشكلة الحقيقية موجودة فى الهيئة دى، من زمان، كل الحوادث دى بتحصل وناس تتغير والحال هو الحال. لأن اللى بييجى بيمشى بنفس الأسلوب.
* ما هم بيقولوا إن الخطأ البشرى وارد.
- ماشى، طب لما الخطأ البشرى ده يفضل يتكرر بنفس الطريقة طول السنين دى مش لازم المسئول يدور عليه؟
* ما هو أكيد بيدور.
- يعنى دلوقتى بيقولوا إن عامل الإشارة زوغ ومات فى الحادثة، حد يقول إن عامل واحد الله أعلم مؤهله إيه أو إيه نوع التدريب اللى أخده، حد يقول إن يبقى لوحده مسئول عن إشارات القطر، طب إفرض مات فى مكانه بالسكتة القلبية أو حصلت له أى حاجة.
* عندك حق.
- زمايله قالوا إنه مازوغش وإن فيه شهود شافوه بيحاول ينزل ركاب القطر قبل ما تحصل الحادثة. قاموا قالوا إيه! إن مراقب الحركة برضه ساب مكانه من غير مايقول للمشرف. أرد عليهم بنفس الكلام.
* يعنى عاوزاهم يعملوا إيه؟
- ما أعرفش، هم أدرى. يشوفوا فى كل سكك حديد العالم بييحصل إيه ويعملوا زيهم. دى حاجة بتحصل فى كل الحوادث.
* أنتى عارفة إن الرئيس اللى مشى ده كان مرة قال أنه مش حيقدر يسيطر على تلاتة وسبعين ألف عامل فى السكة الحديد.
- إمتى قال الكلام ده.
* من كام شهر كده، وقال إن كل اللى يقدر يعمله هو التدريب وسياسة الثواب والعقاب.
- يبقى خلاص هو مش غلطان. الغلط على اللى سابه فى موقعه بعد ما قال وأقر واعترف إنه مش حيقدر يسد فى مكانه.
* ما قالش كده، ليه بتحورى الكلام.
- الكلام مالوش معنى غير كده، إنت عارف إن الوزير جاب لهيئة السكة الحديد مستشارين من إيطاليا بقالهم خمس سنين، وكمان مكتب استشارى أمريكى، شوف كلفوا كام دول وإيه النتيجة اللى كسبناها.
* يا خبر، كل دول مش عارفين يديروا السكة الحديد!! هى الحالة فيها مستعصية للدرجة دى؟!
- أديك قلتها، أنا حأقول لك المشكلة الحقيقية .
* حتفتى فى دى كمان، سمعينى.
- المشكلة إن الناس دى كلها بتفكر بطريقة كلاس.
* نعم، كلاس، إيه الكلمة الغريبة دى؟
- كلاس، يعنى راقية.
* وإيه التفكير الراقى اللى مش عاجبك!
- يعنى بلد الغلابة فيها مش لاقيه اللقمة الحاف ييجى الوزير يقول خطة طموحة وعاوز يعمل قطر سريع، مش عارفة اسمه رصاصة ولا صاروخ، عشان يروح من القاهرة لإسكندرية فى ساعة ونص بدل ساعتين.
* ودى حاجة وحشه؟!
- مش وحشه بس الأول يصلح القشاش والمزلقانات والمحطات. دى الناس بتركب فوق بعضها ومش بتلاقى حمام، لو واحد إتزنق يموت.
* ما هم جابوا الجرارات الجديدة إيشى أزرق وإيشى أصفر.
- بالظبط، ده برضه يدخل فى طريقة التفكير الكلاس اللى بأقولك عليها، عاوزين نقول إحنا عندنا جرارات بتشتغل بالكمبيوتر، يقوموا يجيبوها ويشغلوها من غير ما يدربوا السواقين عليها. وأدى النتيجة الجرارات دى هى السبب فى الحادثة.
* بيقولوا السواقين بيقفلوا أجهزة التحكم.
- ليه! ما سألوش نفسهم ليه السواق بيقفل رغم إنهم عملوا عقوبات خصم خمستاشر يوم من المرتب وإيقاف ستة شهور عن العمل، محدش سأل نفسه ليه السواقين بيعملوا كده.
* أكيد . بس..
- طب أنت اللى لا ليك فى القطارات ولا حتى بتركبها تفتكر ليه السواقين بيعملوا كده، غلاسة وخلاص. ولا فيه سبب.
* ما هى حاجة من اتنين يا إما مش عارفين يشغلوها يا إما.. مش عارفين يشغلوها.
- يعنى مش متدربين عليها، مش فاهمين فيها حاجة.. إنت نسيت أول ما الجرارات دى جت السواقين عملوا إضراب وبعتوا كمان بلاغ للنائب العام وقالوا إن الجرارات دى حتتسبب فى حوادث وكوارث.
* فاكر إنهم قالوا إن الجرار ما فيش فيه باب عشان يخرجوا منه لو حصلت مشكلة، وجابوا لهم واحد من أمريكا يعلمهم يخرجوا من الشباك، أنا فهمت دلوقتى قصدك من التفكير الكلاس.
- عارف التفكير الصح يبقى إيه؟!
* قولى ولو عجبنى كلامك حارشحك تمسكى الهيئة.
- كل الحوادث - أو معظمها - سببها المزلقانات، صح!!
* صح، رئيس الهيئة كان قال إن المزلقانات قنبلة موقوتة ومشكلة مزمنة.
- طب عمل فيها إيه.
* مش عارف، بس هو قال إنه عنده ألف ميتين واحد وستين مزلقان، عشان يصلحهم محتاج كبارى علوية وكبارى مشاه، يعنى فلوس كتير قوى، الكوبرى العلوى يتكلف خمسة وعشرين مليون جنيه، والمشاه تلاته مليون.
- عمل منهم كام واحد؟
* بأقولك مش عارف.
- طيب أنا أقولك، هم قالوا إنهم صرفوا خمسة مليار جنيه على تطوير السكة الحديد، رغم إنه فيه ناس بيقولوا لأ دول سبعة مليار، المهم لما المزلقانات قنبلة موقوتة مش يبقى الصح إن الرئيس الجديد للهيئة يبتدى التطوير من عندها.
* دول كتير قوى.
- ما هو كمان الكلام مش منطقى، هى كل مزلقانات العالم عليها كبارى علوية وكبارى مشاه. لأ طبعا اللى فيها مشكلة بس.
* طيب وبعدين.
- وبعدين يدخل على الخطأ البشرى. التدريب طبعا مهم، مهم جدا، بس كمان اللى أنا شايفاه إن عنده مشكلة تانيه وهى العدل.
* بتاع إيه ده؟
- بتاع التفكير الكلاس.
* برضه.
- الشكوى اللى دايما أقرا عنها إن السواقين مظلومين فى الحوافز والمكافآت وقصادهم مهندسين وموظفين كبار بياخدوا مبالغ مهولة.. وحنروح بعيد ليه. تفتكر بتوع إيطاليا وأمريكا اللى ما عملوش حاجة دول بياخدوا كام؟
* مش عاوز أعرف، وكفاية بقى كلامك بيوجع قوى.