بلوتوث

عندك بلوتوث؟
عندى بلوتوث
طيب افتح...
هبعتلك كام مقطع
لا يا عم استغفر الله
يا عم دى مش مقاطع من اللى بالى بالك
دى مقاطع هتنسيك اسمك
واسم لمؤاخذه المدام
وكمان هتنسيك اسم عيالك
استلم بس
يمكن تتحرك
أو تتأثر
أو على الأقل تحس
يلا أنا هبعتهالك
دا مقطع قطر الصعيد
اللى سرق بسمة الغلابة
ولبسهم توب الحداد
بدل هدوم العيد
ودا مقطع العبارة
اللى غرقت باللى فيها
ودا مقطع المراكب
اللى غرقت بالشباب
اللى كانوا مهاجرين
ودا مقطع تانى لنفس الشباب
بس وهما راجعين
بس جثث
ودا المطار
ودى قرية البضايع
والصندوق دا فيه جثة حسن
ودا فيه جثة جرجس
ودا فيه جثة الحلم اللى ضايع
أمال الصندوق الكبير دا إيه؟
دا فيه شهادات الشباب
اللى بكالوريوس طب
واللى هندسة
واللى سياحة وفنادق
واللى دبلوم صنايع
بس خلاص يا عم تعبت
وجسمى كله بيترعش
خلاص مش قادر أتحمل
يا عم استنى بس
هو أنا لسة بعتلك حاجة
دا لسه فيه يجى الف مقطع
لسة بيحمل
وأنا هجيب مساحة لكل دا منين؟
دا الكارت بتاعى يا دوب واحد جيجا
شيل بس على قد ما تقدر
وعلى قد الكارت بتاعك ما يتحمل
المقطع دا بقى بتاع مسؤول مرتشى
ودا بتاع واحد مهم
مع واحدة فى أوضة النوم
أستغفر الله يا عم
دا مش لابس هدوم
و اللى معاه لابسه شيفتشى
والمقطع دا اعتصام
موظو الضرايب العقارية
ودا عمال الغزل والنسيج
ودا مصنع الأسمنت
ودا عمر أفندى
ودا عمال مصنع الحديد
ودول سكان منشية ناصر
ودول سكان الدويقة
ودول الشرابية
ودول الفيوم
ودول المنيا
ودول الأقصر
ودول القناطر الخيرية
ودا مقطع العيانين
اللى محتاجين علاج على نفقة الدولة
ودول مش لاقين علاج؟
لا
مش لاقيين الدولة
والناس الكتير أوى دول مين؟
دول الناس الغلابة
اللى مش لاقيين سكن
ولا أكل ولا شرب
ولا لبس
ولا حتى لاقيين الكفن
خلاص يا عم الكارت اتملى
وبيقولى علشان تكمل
لازم تفضى مساحة
أنا هشيل المقطع اللى فى أوضة النوم
أنا أصلا ما بحبش الإباحة
وابعتلى بداله مقطع لواحد شريف
ياريت كان من عينى
بس مافيش
لو عندك انت ابعتلى
منين يا خفيف
بقولك
ما ألاقيش عندك أغنية هيفا الجديدة
أو حتى مقطع لأبو الليف