البحث واللوك .. في شأن الفيس بوك

نقطة تفتيش
شروط عشان تقرا المقال دا
1- انك متكونش من الناس المثاليين المنطقيين زيادة عن اللزوم اللي بيحسب كل حاجة بالمللي ومبدأ واحد زائد واحد مش يساوي اتنين وبس .. يساوي اتنين بوينت زيرو كمان
2- انك تكون عديت السن القانوني المنصوص عليه
3- انك بتقعد عالفيس بوك كتير عشان يسمحلك انك تشوف الناس اللي حتكلم عنها دي كلها
أبدأ بكلمة .. الفيس بوك له ميزة اللي هي في نفس ذات الوقت أكبر عيوبه .. انه فضيحة بجلاااااااااااااااااااااااااااااااااااااااجل
مين مننا مدخلش عالم الفيس بوك ؟؟ طب مين اللي سأل نفسه هو يعني ايه فيس بوك ... اسمع مني .. الفيسبوك هو أساسا كلمتين .. فيس و بوك .. فيس يعني وجه بالانجليزي .. يعني واجهتك في الموقع دا .. سواء انت حاطط الواجهة دي تعبر عن شخصيتك الحقيقية فعلا و لا صورة مزيفة منك ؟؟ ده بالنسبة للفيس .. أما البوك دا يعني بالانجليزي كتاب .. الكتاب دي اللي بيسجلك اللي بتقوله واللي بيتقال عليك بالحرف الواحد .. وكل دا من خلال اللي احنا نعرفه بالبروفايل الفيسبوكي
البروفايل الفيسبوكي دا يتكون من صورة ... وصور انت بتنزلها .. وحائط .. واستاتس .... المهم احنا كناس فيسبوكيين بنعمل من خلال عناصر البروفايل دا حاجات كتير احنا بنعملها بقصد أو من غير ( عقلك الباطن بيخليك تعملها بدون سبب ) .. وده اللي حنشوفه مع بعض دلوقتي من خلال السطور الجاية .. واتحدى اذا مفيش انسان فيسبوكي تخلو تصرفاته من تلاتة منهم عالأقل
الاستاتس
مش حقعد أترجملك كل شوية .. أكيد انت عديت على تانية اعدادي وبقيت عارف ان استاتس يعني حالة .. انت حالتك ايه .. بتفكر في ايه .. ايه الجملة اللي بترن في عقلك دلوقتي السؤال بقة .. ليه بنحط الاستاتس؟؟؟
خلينا نتفق كده من الأول ان السبب الرئيسي والأول والأوحد للستاتس هو الحصول على أكبر قدر ممكن من اللايكات والكومنتات ( ومحدش ينكر ) .. بتتنوع بقى نوع الكومنت دا حسب نوع الاستاتس اللي حضرتك حاططها .. واللي بتتنوع في الأنواع العشرة الجايين
1- شوف كام واحد حيعبرك
ودي بيكون استاتس الهدف منها للي كاتبينها انك تشوف كام واحد انت بتهمه وأمرك يعنيه من الأساس ولا لأ .. بتبدأ ب مثلا .. أنا مخنوق .. أنا مضايق .. عشان حد يحن عليه ويقوله مالك ؟؟ وساعات تلاقي واحد يكون كاتب كايس باثولوجي كاملة ... تحسه ان خلاص ازاي مشدهوش عالعناية المركزة ساعتها .. عشان يشوف كام واحد حيقوله ألف سلامة عليك يا حبيبي .. ولو في زرار اسمه كراي ( يعني عياط ) جنب زرار لايك .. كان ناقص الناس حطيتهوله ... واحد تاني يعمل فكيك ويقولك .. أنا حنتحر .. أنا حموت أي قلبي قلبي عشان واحد يقوله لا متموتش وشغل أفلام عربي كده .. ايه الخطوة بعدها .. انا مت .. أو غطوني وصوتوا .. أو إنا لله وإنا إليه راجعون ... نفسه بقة الفيسبوك كله يقلب صوان وسعيكم مشكور يا معلم .. إلا العزا فين صحيح عشان نيجي نقوم بالواجب؟؟؟؟؟؟
2- شوف كام واحد قاريك
ودي بتكون حاجة كده شبه المجاز المرسل بتاع المرحومة مادة اللغة العربية ... جملة بيكون قصد اللي كاتبها هو توجيهها لحد معين الجملة اللي كاتبها كاستاتس قد تحمل معاني الحب والأشواق كأغاني الوله والعشق وخلافه .. أو القصد بيها هو التهديد أو التلميح له بحاجة .. أو يكتب الاستاتس بطريقة فيها زيمة ( ثيم ) بينه وبين صحابه هما بس اللي فاهمينها .. يبقة كده ضرب كتكوتين بحجر .. منه يشد كومنتات من صحابه اللي فاهمينه .. ومنه يشد كومنتات من الناس التانية اللي حتسأل وتحاول تفهم عن معنى الكلام دا من الأساس .. وهو الهدف الاسمى من كتابة أي استاتس زي ما قلنا من شوية
3- سيح يا معلم
نقطة تانية لازم نتفق عليها برضه من الأول هي أن الفيس بوك هو أكبر فضيحة عرفها التاريخ .. أكبر من فضيحة واترجيت نفسها .. انت اكتب بس مثلا عن موقف حصل لواحد صاحبك .. واحدة شرشحته ... اتسرق .... منظرة وهو خايف كان عامل ازاي .... زلة لسان كده بنعرف احنا المصريين أوي نصطاد الحاجات دي ... يا نهاااااااااااااااااااااااااااااااااااااااار أزرق .. صاحبك دا خلاص .. العالم كله عرف فضيحته .. صاحبك دا يروح يعمل ماتش اعتزاله من الفيس قبل ما الموضوع يتنقل ويتشير ويكبر .. وتكبر الفضيحة أكبر لما المفضوح دا يلاقي الرسالة دي
Folan tagged you in a post
الكلمة دي بيخلي الواحد يجري يشوف مين اللي عبره ... وهوب يا معلم يلاقي .. النهاردة واحنا ماشيين في المكان الفلاني فلان حصل كذا وكذا .. متشوفوش بقى شكل صاحبنا كان عامل زي ال............................ هههههههاهاهاهاههاهاهاهاهاهاههاهاهاههاهاهاهاهاهاهاه ..... بس ... في فضيحة أكبر من كده؟؟
4- Aimless status
وهي ستاتس بلا معنى واضح أو هدف واضح كسابقاتها .. إما مثلا أن تكون أغنية غير مكتملة الشطر .. وتكون غالبا لا علاقة لها بأحداث جارية حتى لكاتبها نفسه .. زي مثلا : اللي أمه تملي بتدعيله .. تدعيلووووو . وبس .. عشان في حد يحط كومنت تكملة الأغنية دي .. وفي اللي حيسأل .. وفي اللي مغمض حيقول جامدة يا مان ... وبكده يكون حقق الهدف المنشود ... ابتزاز الكومنتات واللايكات من الآخرين. أو بعضها جمل ملهاش معنى أصلا زي مثلا : شيييييييييربخ .. شييييييييييييربخ .. زررررررررررررررررررررررررر
حد حيدق وراه ويروح يبحث عن أصل وهدف الكلام ده ؟؟؟ لايك يا عم .. واللي حيكتبلك ضحكة ومش بعيد كمان يستأذنك انه يسرقها ويحطها كمان ... أي خدمة يا معلم ... أو اللي حيدق معاك حيفتح معاك باب نقاش حوالين الكلمة دي .. وانت تكمنت وغيرك يكمنت وغيره يشترك .. وغيره يفتي .. وهوبا تلاقي بروفايلك قلب منتدى .. اشطة أويييييييييييييييييييييييييييييي
5- اعرف صاحبك وعلم عليه
الصديق مش وقت الضيق وبس .. الصديق الحقيقي هو اللي معاك في الضيق والسعة والفرح والحزن وأي حالة من حالاتك . . طب حالتك دي حتختلف ازاي ... وانت لسه حتستنى ان حالتك تتغير عشان تتأكد ان صاحبك دا صاحب حقيقي ولا فالصو .. لا غيرها انت يا صاحبي بنفسك .. قول ازاي ... تخيل مثلا في يوم تخلي الاستاتس ( ان ريلايشن شيب ) .. شوف كام واحد حيدخلك ويكمنت ويحقق الهدف اللي بالي بالك .. وتعالى بقى كده في مرة وارزع الضربة القاضية
engaaaaaaaaaaaaaaaaaaaaaaaaaaaaaaaaaged
شفت بقة الزلزال الرهيب اللي حتعمله الكلمة دي .. فاذا صاحبتك عملتلك ريموف فاعرف انها كانت حاطة عينها عليك وانت زحلقتها يبقة بالسلامة .. أما اذا واحد صاحبك هو اللي عملك ريموف .. فده معناه ان صاحبك كان حاطط عينه على نفس البنت .. يبقى صاحبك دا شكرااااااااااااااااااااااااااااااااااااااااااااااااااااا ... حركة كده تكشفلك مين اللي مخلص ليك ومين اللي غير كده .. من الآخر الحكاية دي حتطلعك يا معلم على حد .. يا متعلم عليك
6- عيش الدور
أيا كان الدور اللي انت حتعيشه ده ... سواء دور واحد حكيم زمانه .. ويقعد يحطلك في حكم ومقولات ومأثورات كل ساعة وكل دقيقة وغالبا بيحرص انها تكون لعالم أجنبي كأن علماء العرب خلصوا .. أو استايتسات بالانجليزي كلها نظرا لما يسمى بعقدة الخواجة .. بس عشان الناس ترضي عطش اللايكات والكومنتات اللي هو داخل الفيس عشانها أساسا . . . يشمل برضه الحكاية دي ناس كمان .. ومن غير زعل .. اللي يكتب آية قرآنية من غير ما هو نفسه يحاول يقف على معانيها .. ولكن لسبب أنا قلته قبل كده .. ان فيس يعني وجهك على الفيس أيا كان الوجه دا حقيقي ولا مزيف .. وطبعا أكتر مكان يوصل للناس وجهك هو الاستاتس بتاعتك .. فتلاقيه يعيش الدور اللي هو اختاره وممكن يعيد المشهد أكتر من مرة لغاية ما يعلم مع الناس ... حتى اذا كان الدور اللي عايشه دا مؤقت أو مزيف .. المهم يتحقق المراد واللايكات والكومنتات تبقى على ودنووووووووووووووووووووووووووووووووووووووو
7- استاند أب كوميدي
بتشوف قناة موجة ؟ بتشوف الناس اللي بتقلش دي على طول .. بتشوف الناس اللي ماشية توزع ضحكات يمين وشمال ؟؟؟ أهو هو دا بقة متاح دلوقتي من خلال الاستاتس ... بتبدأ الاستاتس بألشة صغيرة .. وتطول وتبقة نكتة .. وتطول وتبقة سكتش .. وتطول وتبقة موقف .. واحتمال تقلب فيلم بحااااااااااااااااااله يتفنن فيها صاحب الاستاتس بالكلمات والألش والكوميديا .. كيف لا وأقصر طريق لقلب الانسان هو الطرافة وخفة الدم .. والشعب المصري .. مش ابن نكتة وبس .. دول أجداده كلهم نكت أساسا
يعني لايك من هنا ولايك من هنا .. بتبقة عاملة زي الرياح اللي بتزيد شعلة ونار الألش جواه فيزيد في التفنن والابداع والابتكار في الكوميديا اللي بيقدمها .. وتتوالى الاستاتسات .. وتتوالى الضحكات .. وهلم جرا
8- لوحة اعلانات
نقول كمان . . الفيس بوك له نفس الميزة اللي هي في نفس ذات الوقت أكبر عيوبه .. انه فضيحة
مين مننا مبيشوفش نشرة الأخبار .. فلان راح .. علان جه .. سلان نزل .. خلان طلع .. ؟؟؟ مين فينا منفسوش يتقال عليه انه راح وجه وسوى وعمل ؟؟ هنا بقى الاستاتس تعمل عمل وكالة الأخبار الخاصة بيك .. فلان نازل بكرة .. فلان رجع من السفر .. فلان نجح .. وطبعا انت مش أي حاجة حتنشرها يعني .. يعني مش حتقول خبر عاجل .. انا صحيت من النوم .. طبعا لازم تنقي الأخبار كويس جدا .. انت بقى أدرى بصحابك وايه نوع الاخبار اللي ممكن تخصك اللي حيهتمولها وييجو على ستايتساستك ويبهدلوها
9- أنا شفت
ودي بنلاقيها في واحد عايز يقول للناس انه دخل فيلم في السينما .. تلاقيه يقوم كاتب الاستاتس اسم الفيلم .. وبس .. عشان الواحد يخشله ويقول ايه دا انت دخلته ... ؟؟ ويبدأ بقة قعدة نقاد فنيين حول الفيلم .. ودا يقول عاجبني .. دا يقول مش عاجبني .. وعشان بقة صاحب الاستاتس يحلف ميت يمين انه دخل الفيلم بجد .. يقوم كاتب واحدة من كلمات الفيلم اللي غالبا متقالتش في الاعلان .. عشان يحزم دماغ الناس الفيسبوكيين .. وتتوالى الكومنتات من هي فيلم ايه .. هو حلو ولا ايه ...ا
وتشتغل وتحلو بقى يا معلم
10 - اشتغالة
حاجة كده عاملة زي الفرقعة الاعلامية .. أو كدبة ابريل قبل معادها ... خبر كده عن نفسه .. بس يا إما يكون الخبر بيكون فشنك .. أو صحيح بس هو مزود سطرين من عنده عشان يزود في بريق الفشرة اللي بيعملها ... وطبعا هو مش حيكدب نفسه من الأول .. دا بعد ما الموضوع يسخن كده ويلاقي الدنيا زهزهت على حس الفرقعة اللي هو عملها ويلاقي أصداءها اللي هو كان بيراقبها وهو فطسان على نفسه من الضحك .. يقوم قايل وبراءة الأطفال في عينيه : تعيشووو وتاخدو غيرهاااااااااااااااااا هاهاهاهاهاها
شفت بقى الاستايتاسات يا حاج .. شفت نفسك بتعمل كام واحدة فيهم؟؟؟؟؟
نقلب بقة عالوول
2- الوول
وهو اختراع مصري فرعوني قديم .. حيث أن جدودك الفراعنة هما أول ناس كتبوا عالوول ..اللي هيا الحوائط والجدران .. والحقيقة صراحة اللي سماه مغلطش . . لأن الحيطة هي اللي بتخلد وبتحتفظ بكل حاجة ... مثلا لو جارك مضايق منك حيقوم جاي على سور العمارة أو الفيلا بتاعتك ويقوم كاتبلك شتيمة . . أو انت نفسك ممكن تكون راسم قلب وجواه أول حرف من اسم اللي بالي بالك .. الخ ... لكن بنستخدم الوول في ايه .. أو عالأقل ممكن تستخدمها في ايه .. دا اللي حنشوفه دلوقتي
1- هزار البوابين
ودا اللي بتعمله مع صاحبك لما بتتخنق منه أو يكون فاقع مرارتك .. تقوم تستلمله أي حاجة .. صورته .. الاستاتس بتاعته .. فيديو عنده .. وقوم علق تعليق سخيييييييييف قمة في تقل الدم .. ويكون يحمل في طياته ضربة تحت الحزام تخلي شكله وحش .. أو لما تغلب خالص خش على بروفايله هو نفسه اكتبله السخافة دي عالوول .. وطبعا الناس ما حتصدق تزيط في الزيطة واللي حيكمنت واللي حيضحك .. مكمن الخطورة هنا ان ممكن .. ودا غالبا .. ان شكله الوحش دا حيمتد الى ارض الواقع مش بس ارض الفيستوك ز..وزي ما قلتلك قبل كده ... وحقولهالك مرة تانية وتالتة وعاشرة ... الفيس بوك دا فضيحة التاريخ .. فان الشئ الجميل هنا بالنسبالك ان صاحبك دا مش حيقدر ساعتها يمد ايده في الشاشة ويقوم جايبك من قفاك ساعتها .. والضحكة حيكون المرادي من نصيبك وانت متخيله عامل ازاي ... أو لما تشوفه زي الملسوع عمال يرد على اللي مسكوه خلاص .. ومن يضحك أخيرا .. يضحك كثيرا
2- اضرب صاحبك لو هما كتير
ودا بتعمله مع صاحب يكون قريب ليك وفي نفس ذات الوقت يكون بينكو ميوتيال فريندز كتير ... لو واحد او اتنين حاول يقلش عليك أو واحد بدأ فعلا ببادرة الألش .. اوعى تهرب ليضحكوا عليك .. خش على بروفايل صاحبك دا وازرع بذور الألشة اللي كانت عندك .. يقوم صحابك ما حيصدقوا ويلاقوا ضحية جديدة يقوموا يشتغلوا .. وبكده انت اتألش عليك أقل وفي نفس الوقت مهربتش من أرض الميدان .. عملا بمبدأ بريل القائل : اضرب صاحبك لو هما كتير .. وللأسف هما حيكونوا كتير .. وكتير جدا كمان
3- زوبعة
فيلم هندي تعمله انت وواحد صاحبك أل ايه انكو زعلانين من بعض ( بس من غير خروج عن النص ) .. تكتبوا لبعض عالوول كلمات زي : متشكرين يا أصيل .. مكنتش أعرف انك كده .. يلا انت حر .. انت اللي عايز كده ... وكلام من دا من باب اثارة ريبة وفضول كل الأصدقاء اللي بينكوا .. وفي اللي حيخش يهدي النفوس .. ودا يتكلم .. ودا يتكلم .. وانبوكسات تتملي وموقف يشعلل وهوبا تلاقي نفسك عملت موضوع خد وقت وجهد وسسبنس ... والنتيجة محدش انضر .. وكلكوا عمالين دلوقتي تضحكوا عالموضوع كله ولا كأنه الكاميرا المخفية
4- يا شماتة أبلة ظاظا فيا
وهي وسيلة للشماتة من عدوك الحميم .. أو صديقك اللدود .. مثلا لنفترض أني أهلاوي ( ودي حقيقة) ... والأهلي علم على الزمالك ( كالعادة المعتادة( .... يقوم واحد يروح على وول صاحبه الزملكاوي ويسلخه .. وكل أهلاوي شمتان بقى حيروح ويسيب بصمته ... واصدقائه الزملكاوية الغلابة يخشوا يتدخلوا وتبقى ليلة .. او مثلا في رهان كان بينك وبين واحد صاحبك وانت اللي كسبته ... تقوم تخش له عالوول وترزعه كلمة كده ده في حالة لما تكون انت صاحب الشماتة .. أما اذا كنت انت المشموت فيه ف عندك حل من اتنين ... يا إما دي اكتيفشن .. يا اما تعمل ريموف لصاحبك ... وبعد كام يوم ابعتله آد وقوله أصل بروفايلي جاله شد عضلي
5- بروفايل بابا
السيد الوالد له بروفايل وعملك آدد ؟؟ انت شايف في دا مشكلة ؟؟ شايف في دا خنق عليك وتحكم ومراقبة ؟ ؟ أحب أقولك انت غلطان أوي لو فكرت في كده .. حد يطول يابني يبقى باباه صاحبه وحبيبه وكفاءة ؟ .. ويخش عالوول بتاعت باباه ومن غير مناسبة كده يكتبله . . صباح الخير .. صحيح انه يقدر يقولهاله بكل سهولة على مائدة الفطار الصبح مع بعض .. بس فيسبوكيا تفرق ... دا عن الجانب المشرق .. أما الجانب الآخر بقى .. فهو نفس ميزة الفيس بوك اللي هي أكبر عيوبه اللي قلتها قبل كده .. ان فضيحة .. روح كده على وول بابا واطلب منه نفس الطلب اللي انت كنت متردد تقولهوله النهاردة واتكتسفت منه : بابا عايز مبلغ وقدره وانا نازل .. بابا عايز آخد العريبة بكرة سيبلي المفاتبح ... دلوقتي لما يكون الطلب ده عالنت .. كل صحابه شايفينه ومستنيين ردة الفعل .. ممكن متخشش على باباك سخن أوي .. في الأول ابعتهاله انبوكس .. ولو مرضيش هدده انها حتبقى عالوول .. وهو عارف كويس يعني ايه عالوول .. يعني كل الناس شايفاه .. وبدل ما في البيت حد من اخواتك أو والدتك يتدخل عشان يقنع باباك ... بقى دلوقتي الموضوع على الصعيد الدولي مش بعيد رئيس الأمم المتحدة نفسه يخش يكلمه .. وبقى طلبك مش مجرد طلب .. ده بقى كده مطلب رسمي وشعبي ودولي .. ابسط يا عم من أده يا ناس من اده
3- الصور
ياترى فيسبوكيينا بيتملي صور ليه ... فلسفة مصرية مركبة حتكلم عنها في النقاط الجاية
1- أماكن نضيفة
زمان كنا لما عايزين نرفه عن نفسنا أو من باب التغيير بننزل نخرج .. أي ان الهدف من الخروجة كان الترويح والانبساط .. دلوقتي بقيت أحس الناس بتخرج عشان تتصور مع بعضها في المكان اللي غالبا هما حينقوه بما يناسب الفيس ( الوجه اللي هما فصلوه لنفسهم على عالم الانترنت ) ... المكان لازم يكون نضيف .. مثلا .. ممكن ناس تعدي من ادام كوستا أو سيلانترو مجرد تعدية .. يقوموا يتصوروا أدامه ان فلان مر من هنا .. أو يدخلوه انشاله يشربوا شاي بلبن ( نفسي أعرف شاي بلبن سيلانترو يفرق ايه عن شاي بلبن في قهوة المعلم عجوة ؟؟؟؟ ) هوهواه يعني .. لكنها عقدة الخواجة التي ذكرتها سابقا ورغبة جامحة في اظهار الوجاهة المادية باستفزاز وشناعة
2- ديفيليه
قد يتحول الفيس بوك أو البروفايل الفيسبوكي الى معرض للأزياء .. الواحد يستعرض فيه أي حاجة جديدة يجيبها .. البدلة الجديدة .. التيشيرت الجديد .. النضارة البولس الجديدة اللي غالبا لازم يكون لابسها في صورة البروفايل لسبب أنا مكتشفتوش لحد دلوقتي .. أما بالنسبة للبنات تلاقي غالبا المعرض بيكون حول الشنطة والشوز الجداد اللي جايباهم .. وحبذا بقى لو الكاميرا تخش زووم على الماركة بتاعتها او المحل أو السعر .. أما اذا تعذر اللبس الجديد . . تلاقي الفرد بقى يطلع كل لبس الدولاب ويقعد يطقم ويطقم ويتصور طبعا ب بوز مختلف كل شوية ويعمل ألبوم يسميه الكينج أو البرنس أو الجامد أو خلافه رغم ان جايز زوقه لا يرقى ل ......انت عارف التكلمة... لا وبفقع مرارتك أكتر ويعمل تاج لصحابه في الصور دي .. مش فاهم ايه المطلوب يعني ؟؟؟؟
هدف آخر للصور دي انك توريهم النيو لوك اللي انت عملته .. الحلاقة عالزيرو .. الدوغلاس الجديدة .. ضربت موس في حاجبك الشمال .. بالنسبة للشباب
3- كومبليمو
طبعا فهمتم انا قصدي على ايه بالضبط .. كتير أوي لما تلاقي حد عاملك تاج في صورة زي .. اوصفني في كلمة حلوة وكلمتين .. قول أحلى حاجة فيا ... قول اول كلمة عايز تقولها أول ما تشوفني .. غالبا حاجات زي كده بتبقى فايك مزيفة .. وبيكون فيها جزء مجاملة كبير ... واللي يقولك أصل أنا عندي هدف من وراها .. أطور في نفسي وأعرف مميزاتي وعيوبي .. اللي يقوللي كده أقول له .. قربلي وهات ودنك عشان حهمس ... ( بقى انت بالذمة حتعمل تاج لحد عندك شك ولو واحد في المية انه حيقول عنك كلام مش أد كده ؟؟؟ ) .. فاهمني طبعا
4- التطور الطبيعي للحاجة الساقعة
وهو بأنه ينزل صور جميع مراحل حياته .. وهو طفل .. وهو مراهق .. وهو شاب .. وهو كهل ... وهكذا ... عشان يوري كل اللي معاه هو بيتحول كل شوية ... بالضبط زي اسم برنامج كان كده بقى كده ... بيميل غالبا لنشر صورته وهو طفل لأنه عارف وعارف ان الاطفال احباب الله .. فده حيجيبله كومنتات أكتر .. وده بيشبه في هدفه أهداف أصحاب الاستايتسات :) :)
5- في الصور ألش . . ميتعوضش
No Comment ... e7na na2seeeeeeeeeeeeeeeeeeeeeeeeeeeeeeeeeeeeeeeeeeeeN
وفي الختام .... عد كام واحدة من دول بتعملها من غير ما تاخد بالك
ومتقولش مفيش عشان مش حصدقك؟
واذا قليلين
بتشوف كام واحد صاحبك بيعملها؟؟؟