وجهة نظر

عبد اللطيف المناوي: السيدات والسادة مساء الخير وكل عام وانتم بخير اعتدنا طوال الفترة الماضية في وجهة نظر ان نطرح مشاكل الشارع المصري على المسئولين بحثا عن حل لكننا في شهر رمضان سنقدم حلقات خاصة ابطالها وضيوفها مواطنون عاديون من قطاعات المجتمع المختلفة لكنهم يتحدثون بلسانهم نستمع فيها اليهم وهم يتحدثون عن همومهم ومطالبهم وآرائهم ونطرحها امام الراي العام بحثا عن حل ,السيدات والسادة اولى حلقاتنا في رمضان و اول ضيوفنا هو وجه مصري صميم مثل الاف الوجوه التي تراها في الشارع المصري او على المقهى فيذكرك بوالدك وجارك وصديقك اطلقت عليه عدة القاب قاهر القراصنة جن البحر امير الدهاء ولكننا سنناديه باسمه الذي يناديه به اولاده الصيادين الريس حسن خليل صاحب المركب ممتاز 1 فيه جدعنة المصريين وذكائهم يحمل احلامهم وآلامهم قام ببطولة حقيقية وتمكن من تحرير 36 صياد بعد مرور 139 يوم من اختطفهم على يد القراصنة الصوماليين ايضا معنا الريس سماره نصر صاحب المركب سماره والتي كانت ايضا مختطفة على ايدي القراصنة ,السيدات والسادة لا نتحدث اليوم فقط عن مغامراتهم التي تشبه مانراه في الافلام ولكننا سنتحدث ايضا عن قطاع كامل من المصريين السواحلية والصيادين مشاكلهم واقتراحاتهم للحل في مشاكل الصيد في المياه الاقليمية والضرائب الباهظة والتامينات ومافيا الزريعة وتصاريح الصيد وانتاج مصر من السمك والعديد من القضايا والحدود بين مسئولية الدولة ومسئولية المواطنين مرة اخرى ارحب بضيفي وجهة نظر المواطنان المصريان ابنا مدينة عزبة البرج بدمياط الريس حسن خليل صاحب مركب ممتاز 1 والريس نصر سمارة صاحب مركب سمارة اهلا بكما وحمداله على سلامتك ريس حسن وحمد الله على سلامتكوا جميعا قبل ما ابدا مع الريس حسن انا اعلم انه ليك حكاية فيما يتعلق بمركبك في البداية وهي كانت المقدمة للموضوع الاخر والعملية الاكبر فاسمع منطك الاول حكايتك مع مركبتك اللي اختطفت ايه الظروف وايه اللي حصل
الريس/ سماره نصر - صاحب المركب سماره: والله هم المركبين كانوا مع بعض واتخطفوا يوم 10/4 من خليج عدن والقارصنة خطفوهم زي ماحضرتك عارف احنا قعدنا اسبوع كده مش فاهمين ايه اللي بيحصل لان الموضوع القراصنة كان اول مرة يحصل للصيادين المصريين كانت مشكلتنا مع دولة مع تصريح انما قراصنة دي كانت اول مرة تحصل قعدنا اسبوع كده مش عارفين حاجة لحد ما ربنا هدانا نروح لسيادة محافظ دمياط كلمنا عضو مجلس شعب سابق عندنا قالنا وروحونا لسيادة المحافظ طلبنا مقابلته الساعة 6 اتقابلنا الساعة 9 بالليل قابلنا الراجل واحسن استقبالنا وقالنا شوف انت قبل ما تتكلم انا عارف الموضوع واجهزة الدولة عارفة الموضوع وفيه 3 محاور بيشتغلوا في الموضوع دا من غير انت ما تتكلموا جهاز المخابرات العامة ووزارة الدفاع ووزارة الخارجية سعدنا بكلام سيادة المحافظ وبعد ما خرجنا ناقشت كلام مع الحاج حسن قلت له ايه ايه رأيك في الكلام قال طبعا سيادة المحافظ بيتكلم احنا هنقول ايه فقعدنا حوالي 3 اسابيع بعدها وبدات رحلة تانية وكلفنا ن احنا نسافر اليمن لانه تربطنا علاقة جيدة براجل يمني اسمه محمد النقلي وصديق صومالي صديقه هو يعني فسافرت وقعدت حوالي 10 ايام قدرنا نفهم الوضع هيتم ازاي والكلام ازاي واختبرت الصومالي دا في عدة حاجات انه كان المفروض لما اتكلم وقال ان الحاج حسن هيسافر الصومال فكنت قلقان الحاج حسن هيسافر الصومال طب والرجالة في الصومال هتبقى مشكلة ففضل الله قدرت اكلم الراجل دا عملنا له حاجة كده قدرت أقيمه اولا عرضت عليه فلوس لقت الراجل مش بتاع فلوس عرضت عليه شغل وحاجات تانية لقيت الراجل كويس وقالي لو احنا هنبدا في موضوع تفاوض وفلوس وبعد كده لو عايزني اقاتل بنفس المنظر اقاتل فشكرته جدا وكانت الرحلة التانية بتاعة البطل الكبير بتاعنا لظروف صحية عندي ان مقدرش اسافر فجيت للحاج حسن وقلت له الوضع كذا كذا كذا وانت يابطل هتسافر وتكمل المسيرة بتاعتك
عبد اللطيف المناوي: ياريس حسن انت عندك كام سنة ؟
الريس/ حسن خليل - صاحب المركب ممتاز 1: انا ما بقولش لحد السن بتاعي انما هقولك
عبد اللطيف المناوي: انا مش هاقول لحد .
الريس/ حسن: اني من مواليد 47 يعني 63 سنة وبعدين قبل ما نبدا في أي حديث نقولكم كل سنة وانتوا طيبين لمصر كلها كل واحد بأسمه
عبد اللطيف المناوي: انا عايزك تحكيلي بقى الحكاية من الاول انت عرفتوا ازاي ان المركب اتخطفت مين بلغكم واتصرفتوا ازاي ؟
الريس/ حسن: احنا قاعدين طبعا المركب بتاعتنا سرحت البحر اللي هو احمد سمارة وممتاز 1 فجأة بعد سفرهم بفترة لقيت ابني محمد بيكلمني بيقولي الحق يا بابا جاي علينا لنشات قراصنة وضربوا علينا بالنار قلت طب طولوا بالكم ما تعملوش حاجة اقفوا شوفوا هما هيعملوا معاكوا ايه احنا ناس صيادين ونعتبر ماشيين في المياه الدولية اللي هما بيخطفوا منها المراكب التجارية زينا زي المراكب التجارية رايحين نشتغل واحنا اصلا معانا تصريح من مكان اسمه زيلع جنب جيبوتي واصلا كنا شغالين فراح الارسال مقطوع ..3 ايام سرقوا منهم زي ما بيقولوا الثريا وقولولنا لو مسكنا أي مركب تجاري حنسبكوا وقعدوا يكشفوا في المياه الدولية عشان يلتقوا أي باخرة ياخدوها راحت الايام واجت الايام يكلمونا كل اسبوع مرة واحد اسمه ابو علي يقولنا هتجيبوا 4 مليون دولار وان مكانش هحرق المراكب واقتل العيال اخر ما زهقت منه في مرة بعد ما فات شهر وخلاص قلت له ياعم قولي ان انت حرقت المراكب وقتلت العيال عشان نطلع جنازتهم دلوقت وتبقى انت ارتحت وانا ارتحت انما الناس دول لهم 160 طفل خلوهم مثلا ال40 في 4 فيه اللي عنده 5 فيه اللي عنده 3 مفيش فايدة تغيب المدة عيالنا يحرقونا في قلبنا واهالي الصيادين بيصوتوا طب اعمل ايه طبعا احنا لنا اتصالات بحتت تانية وصلنا لهم الكلام بالنسبة للدولة بتاعتنا الحكومة لغاية سيادة الريس وكل الناس بتوعنا بيقولوا احنا قادرين نجيبهم دلوقت اه بس طولوا بالكم عشان بس ما يبقاش فيه خساير احنا في ايدنا نجيبهم دلوقت اهه دي جميع القطاعات المخابرات والخارجية وكله يعني الدولة كلها اظن كفاية كده عملوا كل حاجة زي ما قالك المعلم سمارة اللي هو كان رايح لليمن وبرحلي السكة اللي انا هامشي فيها
عبد اللطيف المناوي: انتوا بداتوا الاتصال انتوا قررتوا انكوا تبداوا تتصلوا عشان تتفاهموا مع القراصنة ؟
الريس/ حسن: ما انا هقول لحضرتك لسه ماحصلتهاش اهه فقلنا للمسئولين في الدولة هنا وعرضوا الامر على الريس وعرضوا الامر على كله قال طب رحوا كانوا طبعا متابعنا في الوقت دا عدت الفترة الطويلة بتاعة ال4 شهور رحت انا مسافر على اليمن ..سافرت اليمن اتلقيت في الناس اللي انا هسافر معاهم اللي كان المعلم سمارة مرتب معاهم دننا رايحين عشان نقطع لجيبوتي بعد 5ايام حتى كنت تضحك واحنا رايحين هناك في مرة كنا قاعدين بناكل في قلب السوراند فبيقولولي بتكلم مين قلت لهم طبعا بكلم الخارجية بتاعتنا والمخابرات قال دول بيقولولي انتوا قاعدين تاكلوا دلوقت وبعدين نقلتوا في حتة تانية بتشربوا شيشة قال هما شايفينا قال هما المصريين يخفى عليهم حاجة ..دننا رايحين عشان نقطع لجيبوتي السفارة الجيبوتية قالت لازم تجيب جواب من القنصلية المصرية في اليمن رايحين القنصلية قال اهلا وسهلا واتفضلوا الجواب قبل مانروح كان عنده علم الدولة كلها بتتابعنا وبتقدم المساعدات من غير ما حد يحس انما الكلام لو كان أي كلام من الاهالي اتقال في الجرايد يعني اسمحوا لهم كان صعبان عليهم ما يعرفوش فاسمحوا لهم راعوا ظروفهم من حقهم ..احنا راكبين الطيارة على جيبوتي نزلنا في جيبوتي و راكبين طيارة على الصومال في صومال لاند اللي هي ارجيسا نزلنا فيها قعدنا ندور بقى هنروح فين قعدنا نمر على القبائل
عبد اللطيف المناوي: ومعاكوا المرشد الصومالي اللي عارف القبيلة ده مين ؟
الريس/ حسن: القبيلة دي فين وممكن نعمل ايه ؟
عبد اللطيف المناوي: والقراصنة دول معروف تبع قبيلة من القبايل ولا هما..
الريس/ حسن: يعني من حميع القبايل متوزعين فهما نروح نقعد في قلب القبايل ونروح ناكل معاهم وندبح
عبد اللطيف المناوي: تدبحوا على حسابكم ولا حاسبهم ؟
الريس/ حسن: على حسابنا احنا ما كل الكلام دا المصريين بس احنا مش عاوزين نتكلم في كلمة مصاريف ولا كلمة فلوس يعني عاوزين نتكلم فاحنا قعدنا ندبح مع الناس دول ونعمل معاهم واجب واتعرفنا بيهم اللي يقولنا انا متبري من ابني واللي يقول ابني العاصي ماشي ننقل القبيلة التانية قعدنا اسبوع في الحوار دا ندور على القبائل خلاص درنا على القبائل واللي يقول ابني العاصي واللي يقول قرصان بيمشي في السوق ندور على القرصان في السوق دا بينام في اللوكاندة الفلانية بيروح في الاوتيل الفلاني ندور عليهم عايزين نسمع أي كلام منهم
عبد اللطيف المناوي: انتوا كان الاتصال مع المركب في الوقت دا مش موجود ؟
الريس/ حسن: لا مش موجود المراكب مخبيين تليفونات صغيرة بقوا يتصلوا بينا من غير ما حد يعرف على ان اللي حاصل ايه في المنظر اللي قدام حضرتك في مكان القيادة كانوا القراصنة قاعدين في القيادة فوق وسايبين البحارة تحت في المركب الكبير التاني فبقت البحارة في الوقت دا قدامهم وقت خالي يقوموا يستخبوا ويقولولنا الموضوع بتاعنا كذا كذا كذا بقينا نعرف الاخبار منهم ..لحظة ما كنا بندور على القراصنة في الشوارع او في السوق بتاعهم يقولوا المركب الايطالي هيمشي النهاردة وهيدينا 4 مليون دولار دا هيمشي بكرة دا هيمشي بعده الموضوع طال عدى 20 يوم وانا اقول للعيال بتوعنا ماتقلقوش انتوا بتكلموني وانا جنبكم شايفكم اهه انا هاجيلكم لما فات شهر و10 ايام انتظار في الفترة دي زهقنا بعد 20 يوم قلنا نروح حتة اسمها راس جوري ..راس جوري دي بقى المنطقة بتاعة القراصنة هنا بق الاسد متمركزين في المنطقة رحنا هناك قعدنا 3 ايام ,ومعانا الصومالي واليمني ففي قلب الاوتيل الجميل اللي هما كانوا بيقولوا عليه حطوا لنا فرشة سفنج على السرير زي بتاع الجيش ونايمين برة في الهواء الطلق فاحنا قاعدين مع الناس دول جايبين شيشة تفاح ولامين القات ولمين الناس دي حوالينا عمالين ياكلوا ويشربوا ويشيشوا اللي هما القراصنة ..ما انا بقولك الريس وحبايبنا المخابرات بتوع الجيش كلهم بقوا يعلمونا حتت لذيذة والزمان كمل فمقعدين الناس كلهم عمالين ياكلوا ويشربوا
عبد اللطيف المناوي: انت عامل عملية تجنيد يعني ؟
الريس/ حسن: لازم عملية تجنيد فلما قعدنا وجمعنا القراصنة قدروا قالوا انتوا معاكم فلوس ايه قلنا لهم احنا معانا 50 الف دولار قالوا دول بتوع ايه قلنا اللي البحارة اكلوهم حط ال40 في 10 في اليوم شوف يطلعوا كام الف دولار انما احنا ما بندفعش فدية مصر ما بتدفعش فدية لحد
عبد اللطيف المناوي: دول المصاريف بتاعة البحارة اكلتوهم وشربتوهم على البحر ودي فلوسهم .
الريس/ حسن: قالوا احنا سامعين في الاخبار بتلموا في الجوامع ماهي مصر مليانة جوامع لو لميتوا من كل واحد 50 قرش هتلموا فلوس كتير قلنالهم بيلموا انما مش لكم طب من هنا لهنا مفيش كلام زهقنا قلنا لهم احنا هنروح .. عايزين نخوفهم رحنا هناك قعدن 5 ايام قلنا مش نافعة نرجع تاني رجعنا راس جوري تاني قعدنا نتكلم معاهم قالوا بكرة المركب الايطالي هيدفع 4 مليون دولار قلنا حلو الايطالي هيدفع 4 مليون دولار يمكن ربنا يهديهم وادي احنا في ايام كريمة في شعبان وجاي رمضان وبنقولهم كل سنة وانتوا طيبين حتى بنقول لواحد قال انا لا بصلي ولا بصوم لا شعبان ولا رمضان ..الايطاليون راحوا دافعين الفدية واحنا موجودين في نفس المكان راحوا القراصنة اللي اخدوا الفلوس راحوا ماشيين وراحوا بايعينا لقراصنة تانيين نتكلم معاهم طيب هنبدا نتكلم تاني الكلام اللي قلناه ماهوش نافع قعدنا نتكلم معاهم ييجي 3 ايام واقول ياعم عاوز اشوف عيالي.. عيالي الاتنين يقولي اطلعهم لك البر تشوفهم الاتنين اقول اشوف الاربعين يقولي اطلعلك عيالك الاتنين اقوله ال40 عيالي انا اصلا عاوز اشوف ورا ضهر المراكب ايه عاوز امشي على البر
عبد اللطيف المناوي: عاوز تعرف فيه ناس قد ايه فيه قراصنة قد ايه ؟
الريس/ حسن: فرحنا اول مرة لقينا البحر عالي والمكنة بتاعة اللنش عطلت اخدنا على خاطرنا وقلنا مفيش نصيب احنا جينا عندهم والعيال على المراكب زي ما حضرتك شايف المنظر كده عمالين بيشاورولنا من بعيد واحنا بنشاور لهم بحرارة من بعد 5 شهور معرفناش نروح قلنا طيب نعمل ايه احنارايحين والحديث فرغ من الراجل
عبد اللطيف المناوي: اه يعني انتوا دفعتوا عشان تشوفوهم اول مرة ؟
الريس/ حسن: اه طبعا كل الحركات اللي بتتعمل دي لازم يتشرب فيها شاي وكده واحد منهم قال انما هاوديكم ساعة بس قلنا احنا ماهنطلعش من على ضهر اللنش احنا زي ماحضرتك شايف كده نسلم عليهم نمد لهم ايدنا كده خلاص قال كده واحنا في دماغنا لورحنا على ضهرالمركب لو قطع رقبتنا هنطلع نشوف نرجع فين ياباشا هي دي فيها رجوع دا كده حياة وموت هو خلاص احنا بقينا في المعركة يعني لا تقتلني يا اقتلك خلاص معادش فيها كلام قولي انا ارجع البلد اقولهم ايه ما ينفعش ..نقول لولادهم ايه فاول مارحنا على جنب المراكب العيال شافونا قالي روح لعيالك الاول قلت لا ال40عيالي طلعونا احمد سمارة الراجل يقولي كفاية ومش كفاية قعدنا معاهم نص ساعة وسلمنا على الناس واخدنا واحد round في قلب المركب وشفنا العساكر اللي في قلبها معاهم سلاح ايه واتكلمنا مع الناس وقلنا لهم خلوا بالكم استعدوا لما نطلع على البر بعد ساعتين من طلوعنا على البر .البر مفيش فيه حاجة مفيش فيه لنشات مفيش فيه سلاح بعد ساعتين هنركب العربية احنا وهنقولهم احنا هنروح خلاص مفيش كلام معاكوا انتوا طالبين فلوس كتير تبداوا انتوا بالعملية بعد ساعتين واحنا هنقف ورا الجبل وهنسمعكوا على ان قدام الجبل مفيش ارسال قالوا طب ما يمكن النش يسمعنا قلتلهم المسجون مسجون ايه برا القفص وايه جوة القفص برة القفص في ايديك كلبشات اما يخش القفص بيحلهم مافرقتش كتير القفص واحد قلتلهم ماتخافوش برضه شغلانة صعبة عمالين يكسروا الخشب ويطبخوا زي اللي في الجبل ناس لونها اسود كانوا بيض بقوا شبه الصوماليين صعبوا علينا قوي اخدنا على خاطرنا قوي قلتلهم ما تخافوش احنا نظمنا لكم العملية ياولاد هتعملوا ايه قلنا يياولاد مفيش تطليع "هنكر" ولا حاجة " الشيمة" تتقطع في ثانية والمكنة تكون دايرة من ساعة ما امشي من عندكوا تولعوا المكن بتاع الكهربا وتجمد البطاريات بتاعتك عشان لما تيجي تدور مارش تدور على طول نظمنا العملية دي قالوا تمام دارت المعركة في المركب الناس استسلموا وتلاتة رموا نفسهم البحر
عبد اللطيف المناوي: كام واحد على المركب ؟
الريس/ حسن: كان في كل مركب 6 صوماليين ..دول معاهم سلاح والتانيين مامعهمش فلما رحنا هناك وقلنا لهم الفلوس كتير وقعدنا ورا الجبل دننا رايحين الاوتيل لما رحنا الاوتيل حبسونا في الاوتيل على ان اللي طلع من البحر طلع قالهم المصريين هربوا وموتوا الصوماليين كلهم نسيت اقولك كنت وانا رايح اخد معايا تليقون ثريا ومخبي تليفون صغير ففيه واحد وهو بيستقطع عليا ويبوسني قلت انت تبوسني وتخليك بعيد شوية عشان انا هاديك حاجة عشان لما تيجوا تهربوا تبقوا تكلموني فدي ادينالهالم ودي كانت الاطمئنان التمام ..فطلعنا من المكان دا ورحنا ورا الجبل ولما
عبد اللطيف المناوي: انت قلت حبسوك في الفندق؟
الريس/ حسن: ما انا قلت سبتهم ومشيت ودي استعجلت عليها شوية وسبتهم ومشيت ورا الجبل وقلت لهم تهربوا قالوا ما احنا هربنا ونفذوا وبقينا بعيد عن البر ب50 ميل قلنا لهم حمد لله على السلامة امشي زجزاج تمشي 50 ميل بالطول و50 بالعرض عشان لما واحد يكون شايفك في النقطة دي لما ييجي يدور تكون انت رحت نقطة تانية قالوا في الاول احنا هنروح فين احنا مامعناش اكل قلنا لهم بلدنا اولى بنا احنا أي كلام هيتقالكوا تعالوا خشوا هنا تعالوا روحوا البلد دي دا اسمه كلام انتوا تسمعني انا هاقولك ايه أي كلام تاني تسمعه تقول طيب انما تنفيذ
عبد اللطيف المناوي: كان الكلام يروحوا الاول على عدن وبعدين يكملوا وكده ؟
الريس/ حسن: ياباشا اوديه لعدن ازاي ولما اجي عند ابويا يقولي الولاد فين اقوله ايه اقوله في عدن يقولي أنا علمتك كده ما ينفعش دول ولادنا وهنا دولتنا وابونا منتظرنا وهو اللي بيحركني بس ماكانش ينفع نقول الكلام دا على طول بس خلاص بقى ينفع نقول عشان الناس تعرف واهالي الناس تعرف واللي مش عارف او أي واحد معارض على انه اللي بيقول لازم ييجوا دلوقت اهه مش همه الخطورة مين اللي هيموت ومين اللي هيعيش انما احنا عايزين كلهم نجيبهم لعيالهم حتى لو طالت المدة انما النهاية حلوة انما لو استعجلنا النهاية وحشة الغرض فراحوا تلاتة حادفين نفسهم البحر لحظنا السئ ان فيهم واحد وصل البر لسّه خاشين الاوتيل قالوا دا مراكب المصريين هربوا وواحد طلع البر وبيقولوا دا المصريين قتلوا الصوماليين كلهم حتى الراجل في الاوتيل لما شافنا جايين مكانش عايز يدخلنا قالوا امشوا من هنا انتوا هتعملوا مشاكل فمشكورا الصومالي اللي معانا يعني ليه السيطرة فكلم المحافظ والامن اللي هناك قال طب خشوا
عبد اللطيف المناوي: محافظ المنطقة ؟
الريس/ حسن: اه..
عبد اللطيف المناوي: انا هترجم التنظيم دا اللي هو الشاي.
الريس/ حسن: خلاص اه ماشي.. وبعدين قالوا ما عدتوش تخرجوا من هنا احنا معادنا في نفس اليوم نسافر في الطيارة قال لا دا القراصنة بيقولوا الناس كلهم ميتين وطالعين على البر ..الو ياناس يابتوعنا ياللي بتتصلوا بينا الموقع بتاعنا قالوا اصبروا بيتابعونا من مصر هنا على طول تاني يوم قالوا اصبروا ما احنا اتكلمنا مع فلان احنا قاعدين محبوسين في الاوتيل والمراكب ماشية عمالين نتصل بالبلد هنا عشان ماحناش عارفين نمشي يقولوا استنوا شوية ففي الوقت دا الصومالي اللي معانا بدل ما كان بيضحك زي حضرتك كده وانت آعد قدامي بدات البسمة تروح من وشه قلنا بقى ايوة فيه في الامر شئ انت زعلان ليه ياعم مالك ياعبد الواحد قال مفيش بس البلد هيقتلوني وانا عشان انا معاكو وانا السبب هو انا لو مكنتش جيت معاكم كنتوا انتوا هتعرفوا ازاي قلنا ياعم تمهل شوية دلوقت ربك هيهدي الامور طلبنا حمادة رد علينا قلنا له طلع واحد صومالي قال طب تمام قلنا له افتح السبيكر وكلم سيادة المحافظ وسمع المسئولين عندكوا انهم ما اتقتلوش عايشين عمالين بنكلم المسئولين وكله بيتصل بينا وبعدين صرحوا لنا ان احنا هنسافر قبل ما يصرحوا لنا ان احنا هنسافر طب نعمل ايه الراجل اللي من اليمن مشكورا عارف ناس في الكويت فقالهم احنا محبوسين في الحتة الفلانية مفيش أي عربية تودينا جيبوتي قالوا له فيه عارف واحد من اللي هو كان في" المكلا" من اللي بيودي الغنم وكده قاله يعني انت ممكن ترحنا قاله ممكن طبعا الحاجات دي كلها بنبلغها للدولة بتاعتنا بعد ما نظمنا نفسنا وجبنا الفستان والنقاب
عبد اللطيف المناوي: دا على اساس انك كنت هتلبس واحدة ست؟
الريس/ حسن: اه طبعا ماانا ابيض لازم اتغطى مادام هركب العربية او هروح في المركب اللي هتوديني اليمن طب همشي ازاي فجبت الفستان والحجاب وكله تمام مية مية في لحظة كده بعدها بيومين قالي تمام ان المحافظ ييجي عندنا الشقة اللي احنا نايمين فيها وقالي انتوا هتمشوا وهنحميكم وكل حاجة قال كده تمام كلمنا من مصر قاله كده تمام ومية مية معانا طبعا كان فيه ناس دفعنا لها وجابت سلاح عشان تحمينا وصلونا لغاية المطار فالصحفيين عمالين بيصوروا فانا رفعت ايدي قلت لهم انا مصري ومصر ام الدنيا ومصر الامان ومصر القانون وماتخافوش على عيالكوا لو كان واحد عمل خطا في المصريين ولا في حد تاني المصريين ما بتعملش خطا في حد والصوماليين والمصريين حبايب وكلهم مسلمين والسلام عليكوا
عبد اللطيف المناوي: دا كان في مطار ايه ؟
الريس/ حسن: في مطار مقديشيو نفسه قعدوا كلهم يضحكوا وبقوا مبسوطين وخلاص بقى ركبت الطيارة لقيت سيادة السفير من جيبوتي بيطلبني بيقولي فين انت بقيت فين انت بقيت في الطيارة لقيت الوفد بسم الله ماشاء الله اول مانزلت جيبوتي خطفونا من على الطيارة سيادة السفير والناس بتوعه عملوا معانا كل الواجب قلنا له عايزين نمشي النهاردة مفيش وقت عشان الناس يطمنوا قالولنا حاضر كلم المسئولين في المطار وجاب لنا مطرحين اني واليمني وسلم علينا
عبد اللطيف المناوي: والصومالي؟
الريس/ حسن: لا الصومالي خلاص راح لاولاده
عبد اللطيف المناوي: طيب انا هسالك هنا ياحاج حسن الحكاية مفيش مسلحين من الصومال خدتهم معاك وانت رايح المركب مفيش مسلحين اجرتهم؟
الريس/ حسن: لا لا لا دول كانوا بيحمونا بره كانوا بيحموني اني بس
عبد اللطيف المناوي: لكن المصريين اللي على المركبين هما الي قاموا بالعملية لما انت اتطمنت ان مفيش خطر عليهم اديتهم الاشارة ؟
الريس/ حسن: اديتهم الاشارة خلصوا نفسهم سيادة الريس قال انا عارف انكوا هتعرفوا تخلصوا نفسكوا روحوا بقى خلصوا نفسكوا فلما ادالنا الاشارة طبعا وربنا كرمنا اخر كرم والبحارة بتوع المركب والكابتن بتاعهم المركبين خلصوا نفسهم انما احنا ما بعتنالهمش حد ابدا انا كل ما في الامر اللي احنا عملناه ان احنا طمناهم ان ضهرهم مفيش فيها حد
عبد اللطيف المناوي: مفيش لحظة وانت في وسط الحاجات دي كلها خفت فيها وقررت انك ترجع ؟
الريس/ حسن: ما هو اني قلت لحضرتك في الاول ربنا خلقني دمي حر جعلني ان عندي ضمير اني ارجع اقول للامهات دي ايه ..انا اكلمها ازاي وانا عارف انه ان شاء الله ربنا معايا وعذرائيل بيجي في العمر مرة واحدة ييجي وقت ماييجي بس
عبد اللطيف المناوي: لما شفت ولادك عملوا ايه معاك ؟
الريس/ حسن: انا لما شفت عيالي في المركب والله صراحة وانا صايم اني وقفت ابص للعيال اني ماعرفت اكلمهم كلمة ييجي ربع ساعة قعدت ابص على الناس زي ما يكون بيشتغلوا في الفحم بدل ماكانوا بيض بقوا سود قاعدين بهدوم وسخة وهدوم مقطعة ومفيش اكل ومفيش بوتاجاز وبيولع بخشب فجاة كده وانا قاعد قلت لهم الخطة كذا كذا كذا قبل ما الراجل يقولنا تعالوا انزل اللنش وروحوا وربنا معاكوا واعملوا كذا كذا الناس اللي معاكوا في المركب ناس شبه ضعفا وعلمت انا من البر انه فيه 3 بنادق من اللي معاهم ما بيشتغلوش شايلينهم منظر من كتر القعدة جبت معلومات قالوا يعني ايه قلت لهم اللي هناك اللي مش شغالة القديمة قوي والقديمة قوي دي وركزوا على دول
عبد اللطيف المناوي: هما بيخطفوا المركب ازاي معاهم لنشات ؟
الريس/ حسن: الفلوكة جنب المركب بيبقى ماشي وهو معاه نار ومعاه قنابل ييجي عند المركب ويضرب واني مامعاييش حاجة اروح واقف يروح ناطط على المركب كله بالسلاح يسيطر المشكلة فيه حاجة ادهى من كده لما المراكب اخدوهم القراصنة مامعييش فلوس دي الحاجة اللي زعلتني بقى فاحنا عندنا صندوق اسمه صندوق الصياد بقالي 13 سنة كل سنة بادفع فيه 7000 جنية على ان الحمد لله عندي 3 مراكب
عبد اللطيف المناوي: وكل مركب بيدفع ؟
الريس/ حسن: اه بيدفع وتامينات بندفع تامينات للصندوق وبندفع ترخيص فدول متراكم فيه فلوس كتير وربنا يعلم ان فيه من 17 ل22 مليون جنيه وطبعا فيه نسبة فيهم فاتيظ وفيه نلاس اتنغنغ فيهم انا اسف على الكلام اسف يعني امال يعني المكسب بتاعهم بيروح فين حطيتهم في الشقة وقافل عليهم مثلا
عبد اللطيف المناوي: دا تبع مين الصندوق دا ؟
الريس/ حسن: الصندوق تبع الاتحاد النوعي والريس بتاعه الحاج محمد الفقي
عبد اللطيف المناوي: الاتحاد النوعي للثروة السمكية دا هيئة حكومية ولاّ شكل نقابي ؟
الريس/ حسن: شكل نقابي ومحطوط فيه الفلوس دي فلفلوس دي محطوطة عندهم فرحت لهم قلت له اني دلوقت مزنوق واني بدفع تامينات والصيادين ليها فلوس في الصندوق دا ومالي وعيالي راحوا وعندي بيتين وعندي مركبين يساووا اكتر من مليون جنيه لو سمحت اديني مليون جنيه يُرد مش لا يُرد قرض يعني قالي روح خد من البنك قلت له ما ينفعش كده يا حاج محمد البنك نسبته عاليه انما لو اني تاخرت في قسطك تصبر علي الشهر الجاي قالي معنديناش اني بصرف على 36جمعية انا معرفش ال36 جمعية فين هو يعرفهم اكتر مني انما دا بالقانون بتاعنا بيقول الفلوس دي بتاع الصيادين اللي ياخدها اللي يغرق واللي يتحرق ونكبات وكوارث طب احنا عرفنا الحريق وعرفنا الغرق طب الكوارث يعني ايه والنكبات يعني ايه لو سمحت ترجمها لي
عبد اللطيف المناوي: دلوقت المركب مخطوفة وفقا للتفسيرالبسيط دي نكبة دي كارثة دا ينبغي على الجهة النقابية او الاتحاد النوعي الي انتوا طول عمركم بتدفعوا فيه فلوس عشان اللحظة دي دا الوضع الطبيعي ؟
الريس/ سماره نصر - صاحب المركب سماره : فيه حاجة .. احنا طبعا لما يحصل لنا مشكلة اول حاجة نروح لها الاتحاد طب انت يا اتحاد عملت لنا ايه في المشكلة دي تحديدا هل اجتمعت بالجمعيات قلت لهم ياجماعة فيه مركبين فيهم 36 مصري اخواتنا وولادنا اتخطفوا في الصومال تعالوا شوفوا كده نقعد نشوف هنعمل لهم ايه هل انت عملت كده هو لو كان عمل كان قال لنا طب انت ال36 مصري دول الصيادين اللي هما تبعك بعت لهم الفلوس البيت ودي حاجة بسيطة ودا محصلش
عبد اللطيف المناوي: يعني بيوت ال36 صياد دول طول الفترة اللي هما مخطوفين فيها مخبطش عليهم حد من الاتحاد ؟
الريس/ سماره: يا أستاذ عبد اللطيف احنا اتشتمنا واتهزانا بس دا من حقهم دول ولادهم ممسوكين انت كاتحاد عملت لي ايه انتوا كجمعيات واحد قالي الحاج حسن من ضمن رؤساء الجمعيات بيع بيتك وانا اكمل لك دا اسمه كلام احنا تبع مين هيئة الثروة السمكية لما نيجي نروح نعمل تصريح احنا اللي بنجيبه على حسابنا واحنا اللي بنجيبه كمجهود شخصي اروح اجيب تصريح من اليمن واجي اعمله اروح الاتحاد واخد الف دولار عشان اجيب تصريح طب انت كاتحاد وكنتوا في اليمن من شهرين واليمن دولة صديقة ما بتجيبش انت تصاريح ليه وتحطها عندك
عبد اللطيف المناوي: طب انت ايه اللي يخليك تجيب تصريح من اليمن ؟
الريس/ سماره: من اليمن عشان في سمك
عبد اللطيف المناوي: طب ليه ماتاخدش تصريح من هنا ليه الدولةما بتقومش لك هي بالحكاية دي يعني هنا السؤال هل الصياد او صاحب المركب هو اللي بيروح للسلطات اليمنية او الاريترية يطلب منهم تصريح صيد ؟
الريس/ سماره: كله بمجهود شخصي
الريس/ حسن: والدولة ما بتعملش حاجة والاتحاد ما بيعملش
الريس/ سماره: هو اللي ما بيعملش
عبد اللطيف المناوي: الاتحاد دا معين ولا منتخب ؟
الريس/ حسن: يعني لو منتخب مننا يعني احنا اديناله الختم يفضل العمر كله صاحبه واحد انتخبناه وغرر بنا فيها حاجة دي ..لا يصلح.. ننتخب واحد تاني يصلح مفيش مشكلة
الريس/ سماره: وفيه حاجة تانية نروح هيئة الثروة السمكية تجيب التصريح يطلب مننا كمية ورق بنجيبها له وبعد ما نجيب الورق ونتممه يقوم مطلع ورقة من جيبه امضي لي هنا.. امضي لك على ايه..؟ الهيئة مش مسئولة عنك لو حصل لك أي حاجة طب انا بتمم الورق دا وجايلك ليه طب انت لو انا امضيلك
الريس/ حسن: انا اسف بيخلي مسئوليته ليه من قلة تمكن لو متمكن وفاهم شغله كويس ما يكتبش ورقة انما قلة تمكن هو اتحط كده وخلاص
عبد اللطيف المناوي: يعني انتوا مفيش حاجة بتنظم عمل الصادين ومراكب الصيد دي في مصر هل مش معروف المراكب دي قد ايه وفيه قانون واحد بيحكمها
الريس/ حسن: لما احنا اتقابلنا مع سيادة الوزير نظيف من فترة وكنا قاعدين في الاجتماع قالك المراكب دي بتمثل 90% من الصيد واللي بتجيب البلطي والقراميط بتمثل 10% طب لو دول عملوا كده كنا ما نستوردش سمك من بره لما بدؤوا يعاكسونا وعرف انه متمكن من الحتة اللي هو فيها محدش يقدر يجادله دا انا بقعد اطلبه على التليفون ما بيرضاش يرد عليا
عبد اللطيف المناوي: فيه تضييق على حركة المراكب والصيادين ؟
الريس/ حسن: ماهوش واخد باله اول ما اتمكن من الشغلة الناتج قل والدولار بتاعنا طلع برة بنستورد سمك من برة وبنستورد سمك فاسد من برة لو اتعرف واحدة بتعدي اتنين
عبد اللطيف المناوي: طب هنا الكلام انتوا كصيادين انتوا كاصحاب مراكب شايفين الحل ايه ؟
الريس/ حسن: الحل يشغل الناس بحريتها يعني ييجي واحد يقولك اني ياعم معايا رخصتين رخصة اولى ورخصة تانية اركب جرار واركب ملاكي فيها حاجة دي مش بدفع لها فلوس ما اشتلش رخصتين ليه فاني راجل فاهم معايا رخصة بحر احمر ومعايا رخصة بحر ابيض او ما يخلص الموسم باع البحر الاحمر ونيجي نعمل عمرة بنقعد شهر 6 وشهر 7 وشهر 8 وشهر 9 وشهر 10 خمس شهور يقوم اني معايا رخصة بحر ابيض رخصة البحر الابيض بيدفع لها ربع ترخيص بشتغل فين بقى برة المياه الاقليمية المصرية يقولك لا دول لو جم اشتغلوا هنا هيشتغلوا مع دول هو انت ياجدع عايز تنتج للدولة ولا بتنقي
عبد اللطيف المناوي: لا فهمني دي دلوقتي انت لما بتاخد ترخيص للبحر الابيض ما بيخلكش تشتغل في البحر الاحمر يعني يا تشتغل احمر يا ابيض للمركب الواحدة ولا لك انت كصياد؟
الريس/ سماره: للمركب
عبد اللطيف المناوي: طب وعامل موسم خمس شهور بتفضل متعطل ما بتشتغلش في البحر الاحمر فانت المراكب بتاعتك عطلانة خمس شهور ما بتشتغلش وهو مانعك تشتغل ؟
الريس/ حسن: لما تيجي تقوله يقولك الناس بتتشاكل مع بعضها انت ياباشا عاوزني انتج للدولة وااكل الناس دول ولا عايزني استورد سمك والدولار بتاعي يطلع برة
الريس/ سماره: هقولك قرار وقوف بتاع البحر الأبيض مرة يوقفوه شهرين ومرة يوقفوه 45 يوم ولما بيوقفوه شهرين ما بيدوش فكرة للصياد
عبد اللطيف المناوي: قرار الوقوف اللي هو منع الصيد في البحر الأبيض ؟
الريس/ سماره: وعلى فكرة بنقولها الصيادين معندهمش أي مانع ان هما يقفوا طالما دا لمصلحتهم هو الوقوف دا مش لمصلحة الصياد بس ماتوقفنيش شهرين وارجع بعد 45 يوم نلاقي ناس معينين افوجأ واحد قاعد يقول دا انتوا هتمشوا في نص الشهر ازاي الكل ما يعرفش واسال في الجمعيات جالكم واحد نسال في حرس الحدود جالكوا حاجة بتقول كده يقولوا لا نفاجا انه بعد 45 يوم فيه ناس بتسرح بتقوم كوارث في البلد يعني يا استاذ عبد الطيف يانقوم بقرار صح
عبد اللطيف المناوي: يعني لازم يكون فيه شفافية تبقى القرارات معروفة لكل الناس وانك تسمح للناس انها تشتغل في البحر الابيض في البحر الاحمر ويبقى الهدف انك تزود الدخل بتاعك؟
الريس/ سماره: طبعا ..انا عايز اعرف دلوقت كام مركب اشتغلوا من ساعة ماعملوا رخص الصيد انا نفسي الثروة السمكية تثقف الناس بتوعها يعرف لما أنا اجيلة أنا مين وبشتغل فين مش ألقى صباد أعالي بحار وهو يقولي أنت بتجيب بلطي وقراميط
عبد اللطيف المناوي: طب انت اتكلمت على حكاية الزريعة انا عارف ان فيه مشكلة خاصة بالزريعة ايه حكاية الزريعة وفكرة المزراع وبيستغلوها ازاي وبياثر دا عليكم ازاي ؟
الريس/ سماره: المزارع شئ جميل جدا بس عايزين لما نجيب زريعة من البحر الف زريعة اوصلها الف مش اوصلها 10 يعني من الف سمكة زريعة ازرعهم الف ازرعهم 900 مش 10 دي برضه مشكلة واللي في النص دا هالك بتهلك هنا وبتهلك هنا فدا ماهوش كلام
عبد اللطيف المناوي: انتوا ليه بتصطادوا دايما في المياه الدولية ليه ما بتصطادوش في المياه الاقليمية ؟
الريس/ حسن: بالنسبة للمياه الاقليمية في قلبها استهلاك كتير ..المياه الدولية مرتاحة شوية السمك قاعد فيها مفيش حد بيخبط فيه كتير انما دول معندهمش القدرة يروحوا في المياه الدولية انا كبير شوية بقدر اتحرك بروح في المياه الدولية
عبد اللطيف المناوي: لكن انت معندكش تراخيص بالصيد في المياه الدولية من خلال مؤسساتك المصرية بتضطر انك تجيب تراخيصك من مؤسسات الدول بتاعتها القريبة من غير مساعدة من مؤسساتك المصرية ؟
الريس/ حسن: مجهود شخصي محدش بيعمل لنا حاجة انما عاوز اساله انت كل يوم بتقول رايح تونس ورايح اليمن وبعد ما انت تروح تونس وتروح اليمن طب الناتج ايه بعد ما انت بتيجي من اليمن بروح انا بشخصي اجيب التصريح وانت تقول ما سمحولناش
عبد اللطيف المناوي: هو من الواضح ان عملية صناعة الصيد في مصر تحتاج انها تعاد النظر مرة تانية في القوانين المنظمة ليها يعاد تفعيل المؤسسات اللي هي مشرفة على عمليات الصيد الاشكال التعاونية والنقابية للصيادين لازم اعادة النظر مرة تانية فيها لازم البحث عن دعم للصياد المصري في الشغل بتاعه في الخارج ودعم الصياد المصري من خلال المؤسسات المصرية بالتعاون مع المؤسسات الدولية الاخرى في الدول الاخرى اللي بيصطاد فيها الصيادين وفكرة التامين على الصيادين المصريين ومراكب الصيد وتنظيم العمل بالرخص وتراخيص الخاصة بمراكب الصيد واتاحة الفرصة ليهم ان هما يعملوا من خلال البحر الاحمر والبحر الابيض وايجاد وسائل تامين كافية هل اللي أنا قلته ده كافي
الريس/ سماره: تمام ده فيه المشكلة كلها وياريت يبقى فيه استجابة لان الصيادين والله العظيم تعبوا احنا تعبنا جدا جدا ولما يحصل كارثة نروح لمين
عبد اللطيف المناوي: بالظبط انت لازم تدفع مؤساتك النقابية مؤسساتك الحكومية وعليها دور ينبغي ان تقف معاك وينبغي انها تدعمك.. قبل مانختم دبرت الفلوس منين ؟
الريس/ حسن: انا استلفت كتير انما الشكوى لغير الله مذلة
عبد اللطيف المناوي: احنا النهاردة السيدات والسادة كما ذكرت احنا بنفتح الباب لكي نستمع ونسمع من قطاعات مختلفة من المجتمع من المواطنين المصريين من اخوانا من اهلنا اللي كل مشكلاتهم اخترنا في مرات سابقة ان نتحدث مع مسئولين ولكن احنا في هذه المرحلة بنفتح الباب لاخواتنا ولاهلنا لكي يعبروا عن انفسهم كل ما استمعنا اليه اليوم بنضعه امام المسئولين وبنعتقد انه ينبغي ان يكون هناك موقف يتخذ من اجل حماية صناعة الصيد في مصر وايضا من اجل حماية ودعم الصيادين المصريين لان مش الصيادين فقط اللي بينضاروا من هذا ولكن صناعة الصيد في مصر كما هي في كل دول العالم ينبغي ان تكون الصناعة قوية داعمة للاقتصاد وليست صناعة متعطلة بسبب اجراءات روتينية او بسبب قوانين قديمة او بسبب سيطرة الاتحادات اتصور انه آن الاوان لاعادة النظر في شكلها وفي دورها مرة تانية بشكر الريس حسن خلي صاحب المركب ممتاز 1 وبشكر الريس نصر سمارة صاحب مركب سمارة ومرة تانية حمد الله على سلامتكوا وحمد الله على سلامة اخوانا اللي عادوا بعد ان تخلصوا من القراصنة وسيطروا على مجموعة منهم وكل عام وانتم بخير ,السيدات والسادة شكرا لكم والى لقاء في مرات قادمة باذن الله