«سباك» يقتل «بواب» طلب معاشرة زوجته

المتهم: انتقمت لشرف زوجتى ومش ندمان على اللى عملته
«انتقمت لشرفى وقتلته عشان كان بيضايق مراتى وبيراودها عن نفسها، وكان عايزها تخونى معاه، اكتشفت رسائل جنسية على الموبايل من رجل يطلب منها ممارسة الرذيلة معه، وعندما واجهتها اعترفت لى بأن المرسل حارس العقار اللى هى بتشتغل فيه وعندما ذهبت له تعدى علىَّ بسكين وحاول قتلى ولكنى دافعت عن نفسى وقتلته».
بتلك الكلمات بدء «أحمد. د» 41عامًا، سباك، الإدلاء باعترافاته أمام المستشار حسام نصار رئيس نيابة الهرم فى اتهامه بقتل «محمد. ع» 51 عامًا، حارس عقار بعد نشوب مشادة كلامية بينهما أدت إلى قيام المتهم بتسديد عدة طعنات قاتلة للمجنى عليه توفى على إثرها.
وقال المتهم فى اعترافاته أمام النيابة: أنا معملتش حاجة غلط أنا كنت بدافع عن شرفى، هو اللى كان بيعاكس مراتى وبيضايقها وهى عشان عارفة إنى عصبى وبغير عليها استحملت رذالته ومضايقته لها وما كنتش عايزة تقولى عشان خايفة من رد فعلى، لغاية ما فى يوم مسكت الموبايل بتاعها ولقيت حد باعتلها رسائل جنسية بيطلب منها إنها تخونى معاه، وأنه هيسهلها الشغل عند سكان العمارة، أول ما شوفت الرسائل الدم غلى فى عروقى ومسكت مراتى ضربتها وواجهتها بالرسائل لحد ما اعترفت لى بأن بواب العمارة اللى بتشتغل فيها حاول أكثر من مرة أنه يضايقها وأنه يراودها عن نفسها وهى كانت بتصده أكثر من مرة لكن من غير فايدة».
وأضاف المتهم فى اعترافاته: مراتى قعدت تبكى عشان هى ما كنتش لقية معاه حل وكانت خايفة تقولى عشان معملش مشاكل وأصحاب العمارة يطردوها وأحنا محتاجين الفلوس اللى بتيجى من وراء شغلها عشان السوق مريح اليومين دول بالنسبة لى ومفيش شغل كثير فقررت إنها تستحمل رذالته، لكن هو ما كنش بيرحمها وفى الطالعة والنازلة كان بيطلب منها إنها تمارس الرذيلة معه حتى لو بمقابل مادى ولما ملقاش فايدة معاها هددها بإنه هيخلى أصحاب العمارة يطردوها وهيتبلى عليها بأى حاجة عشان تطرد من العمارة.
وأكمل الزوج: أخذت موبايل زوجتى وذهبت للعمارة عشان أقابل أصحابها وأوريهم الرسائل اللى باعتها لزوجتى لكن للأسف ملقتش حد منهم وأنا نازل شوفته قدامى، معرفتش ساعتها اتحكم فى أعصابى أو أسيطر عليها لقيت رجلى بتاخدنى ليه وبعدين واجهته باللى أعرفه، أنكر واتهم مراتى بإنها هى اللى بتجرى وراه وإنه هو اللى بيصدها حصلت بينا مشادة كلامية لقيته راح لغرفته وأحضر منها سكينًا وكان عايز يقتلنى به خطفت السكينة منه وضربته بها لغاية ما وقع على الأرض قاطع النفس.
واختتم المتهم: فجأة لقيت قميصى غرقان دم، روحت قلعه ولبست قميص من عند القتيل وأخذت الموبايل بتاعه عشان عليه رقم زوجتى والرسائل عشان محدش يفحصه ويتوصل ليا وبعدين خرجت من العمارة عادى بعد ما أخفيت جثته داخل غرفته بالعمارة، ثم ذهبت إلى بيتى وحرقت موبايله وقميصه.
كان العميد عبدالحميد أبوموسى رئيس مباحث قطاع غرب الجيزة قد تلقى بلاغًا يفيد العثور على جثة حارس عقار مصاب بعدة طعنات داخل عقار بهضبة الأهرام، فانتقل العقيد محمد راسخ مفتش المباحث الجنائية إلى محل الواقعة وعثر على جثة المجنى عليه مصابًا بعدة طعنات بالرقبة والصدر.
وبإجراء التحريات تبين أن سباك وراء ارتكاب الجريمة بسبب إرسال المجنى عليه لزوجة المتهم رسائل يطلب منها ممارسة الرذيلة مقابل توفير فرصة عمل لها.
وبإعداد كمين للمتهم تمكن الرائد عمرو حجازى رئيس مباحث قسم شرطة الهرم والنقيبان محمد عتلم ومحمد السعودى من ضبطه، وبمواجهته اعترف بارتكاب الواقعة، فتم إخطار اللواء هشام العراقى مدير أمن الجيزة واللواء إبراهيم الديب مدير الإدارة العامة للمباحث وإخطار النيابة التى أصدرت قرارها بحبس المتهم 4 أيام على ذمة التحقيقات.