ناهد: طلبنى فى الحرام ولما رفضت اتهمنى بسوء السمعة

«انتقمت لشرفى وقتلته، عشان هو كان عايزنى أعمل معاه علاقة غير شرعية، ولما رفضت هددنى بأنه هايقول لأخويا إن سمعتى سيئة ويفضحنى، فقلت أنتقم لشرفى، وأريح البنات من شره».. مبرر، تراه (ناهد. م) كافيًا لقتل أحد جيرانها، بسلاح أبيض، خلال اعترافاتها أمام المستشار محمد جمال مدير نيابة عين شمس.
وتقول المتهمة: «طول عمرى وأنا فى حالى، وسيرتى وسمعتى زى الفل، وكل الناس تشهد بكده، لكنه منه لله حاول أكثر من مرة أنه يعمل معايا علاقة وأنا كنت دايمًا بصده وببعده عنى، لأنه معروف فى الشارع أنه بتاع بنات وسيرته وسمعته زى الزفت، وعامل مشاكل مع كل الجيران بسبب معاكسته للبنات ومضايقته لهم».
وأضافت «كل أهالى البنات اللى فى المنطقة والبنات نفسهم، اشتكوا منه أكثر من مرة، ما بيرحمش أى ست ولا بتفرق معاه اللى بيتضايق، بيعاكس كل ستات المنطقة؛ الكبيرة والصغيرة، وحتى الأطفال، مفيش واحدة ست ما اشتكتش منه ولا من أفعاله».
وأكملت ناهد «بقاله فترة مركز معايا وبيضايقنى فى الرايحة والجاية، لدرجة أنى ما كنتش بحب انزل الشارع اجيب حاجة بسبب مضايقته المتكررة لى، وعشان مكنتش عايزة حد من أهلى يعمل معاه مشاكل، عشان هو مؤذى، فكنت عايزة أحمى أهلى من أذيته وشره، لكنه كان مصممًا يضايقنى ويعاكسنى، لدرجة إنى وقفت وطلبت منه إنه عيب اللى هو بيعمله معايا ده، لأنى جارته وما يصحش كده، لكن كلامى لم يؤثر فيه، ولقيته بيقولى إنه بيحبنى وعايزنى أكون معاه، ولما استفسرت عن قصده، عرفت إنه عايز يعمل معايا علاقة محرمة، ولما رفضت هددنى إنه هيروح لأخويا ويتبلى عليا، ويقوله إنه بيشوفى مع شباب فى أوضاع مخلة، وإن سمعتى سيئة، وإنه هيفضحنى فى المنطقة كلها».
واختتمت «ما اهتمتش بكلامه وسبته ومشيت، وقلت إنه بيهددنى بس، لكنى تفاجأت بأنه راح لأخويا فعلًا وقاله إن سمعتى زى الزفت، عشان هو شافنى أكتر من مرة مع شباب فى أوضاع مخلة، وخد معاه ناس من أصحابه عشان يشهدوا بكده، وطلعوا عليا فى المنطقة إنى بتاعة شباب، حسيت ساعتها إنى مظلومة ولم أشعر بنفسى غير وأنا باطعنه أكثر من طعنة فى جسده بالسكينة، وهو واقع فى الأرض غرقان فى دمه، ماكنش فارق معايا حاجة، المهم أنى قتلته وانتقمت لشرفى وسمعتى وريحت البنات من شره وأذاه».
بدأت تفاصيل الواقعة بتلقى قسم شرطة عين شمس، بلاغًا بوصول شاب للمستشفى جثة هامدة إثر إصابته بجرح نافذ نتيجة تعرضه للطعن بسكين، وانتقل رجال المباحث لمكان الواقعة، وتبين من التحريات والتحقيقات، أن وراء الواقعة فتاة، جارته، وأنها تمكنت من الهرب عقب ارتكابها للواقعة، وأن المجنى عليه أساء لسمعة الفتاة.
بعد تقنين الأوضاع وعمل الأكمنة اللازمة تم القبض على المتهمة، وبمواجهتها اعترفت بقتلها للمجنى عليه، انتقامًا لسمعتها، تم تحرير محضر بالواقعة وإخطار النيابة، التى تولت التحقيق وأصدرت قرارها بحبسها 4 أيام على ذمة التحقيقات.