صباح الورد

العلاج باللابوريا!

قال الملك رمسيس الثاني لروكا الحرامي: علمت انه تم ضبط طبيب بيطري يعالج المرضي من البشر.. مثل هذا الأمر لا يمكن تصديقه.. اعتقد انها نكتة.
قال روكا: أحفاد سيادتك ولاد نكتة . خرموا التعريفة ودهنوا الهوا دوكو وعبوا الشمس في أزايز، وعالجوا البني آدمين بدكاترة البهايم .
قال الشيخ غريب: ولسَّه !
قال الملك : مازلت لا أصدق .
قال روكا: بس أنا مصدق سيادتك. أصلي اتعالجت عنده . بعد ما كتفني حط السماعة علي سدري وقال لي إكتم النفس وقول حا. وبعد الكشف طمني. قال لي شوية تعب في البطن من التلوث. ابقي إغسل البرسيم قبل الأكل عشان المبيدات اللي فيه بتعمل بلاوي. واشرب مية كتير . جردلين علي الأقل بعد الغدا. وبلاش تاكل التبن نيّ . أسلقه. وقال لي دفي نفسك وإلبس بردعة صوف. وكتب لي علي شَربة ملح. أفك الشيكارة وأدِّوبها في نص جردل مية واشربها ع الريق. وقال لهيثم إبني أبوك عضمة كبيرة يا ابني ومحتاج راحة. إربطه خمس تيام .
قال الشيخ : بالشفا يا معلم !
قال روكا للملك : ما فيهاش حاجة سيادتك لما دكتور البهايم يعالج بني آدم . ما انت عارف يا عم رمسيس ان ما فيش حد بيشتغل في حاجة إتعلمها . بتاع الحقوق بيبيع سندوتشات. وبتاع الآداب قهوجي. واللي معاه بكالوريوس تجارة بيغني في الموالد والافراح. واللي بيعالج الكلب ممكن يعالج صاحبه .. والاتنين من مخاليق ربنا سيادتك .
قال الشيخ : عداك العيب يا معلم !
قال روكا: الواد قرني إبن جمالات الدلالة كان نفسه يطلع دكتور. بس كان بيكره ناظر المدرسة. بيتشائم منه عشان مناخيره مدارية دقنه . دفس في عينه ماسورة ولف من الناحية الثانية وسحبها من قفاه وعمل في رأس الناظر نفق سيادتك. إترفد من المدرسة وخد سنة سجن. ولما خرج إشتغل علي توك توك تلت سنين. ربنا أكرمه وعمل قرشين حلوين وقال لازم اتعلم الطب. مرزوق التمرجي قال له طلبك عندي . وقعد يعلّم فيه ع القهوة سبع تيام بالتمام والكمال. لحد ما شرب الصنعة وبقي دكتور. إشتري عدة وفتح عيادة وكتب علي اليافطة »الاستاذ الدكتور قرني. خريج جامعات أمريكا وكوستاريكا وزميل معهد بلالايكا ودكتوراه في العلاج باللابوريا. اخصائي مخ وأعصاب وكبد وكلاوي وقلب وعظام ونظر وعمليات من كل صنف « . وأضاف روكا يقول للملك: بقاله خمستاشر سنة شغال سيادتك. الكشف عنده بتلتميت جنيه والزبون يحجز قبلها بعشر سنين. وياما عمل عمليات لدكاترة كبار ومسئولين في وزارة الصحة . بس سيادتك عارف ان الأعمار بيد الله .
قال الملك: سوف أصدر أمراً ملكيا بسجن كل فاسد معدوم الضمير .
قال روكا: يا عم رمسيس كبَّر دماغك . ح تسجن مين ولاّ مين؟ وح تجيب سجون منين تكفي الخلق، بلاش تلخبط النظام وسيب الدنيا ماشية بقفاها . لو كل فاسد دخل السجن البلد حالها يقف. مش ح نلاقي موظف في وزارة يشوف مصالحنا. ولا تاجر نشتري منه فراخنا ولحمتنا. ولا مدرس يدي ولادنا دروس خصوصية .
قال الشيخ: ولا دكتور بهايم يعالجنا !