صباح الورد

»إفتيني ولا تغديني«!

قال روكا الحرامي للملك رمسيس الثاني: رحت بالكارت بتاع سيادتك للبهوات بتوع مدينة الإنتاج الإعلامي . قلت لهم الملك بيسلم عليكم وبيقول لكم شيلوا الشمع الأحمر من علي فضائية الأعشاب بتاعتي . الراجل قال لي لما تشوف حلمة ودنك . لا فضائية الأعشاب ولا حتي فضائية الفتاوي .
قال الملك لروكا : لم أكن أعلم أن لديك أيضا فضائية للفتاوي .
قال روكا : كانت فضائية مالهاش زي . ليل نهار تطرقع فتاوي سيادتك . الزبون يتصل بالنمرة اللي ع الشاشة ويتكرع فتاوي لحد الصبح . فتاوي جاهزة في العلب للي مستعجل . يعني »تيك أواي« سيادتك . وفتاوي تفصيل ع المقاس والاستلام بعد يومين وشعارنا »قفة فتاوي لكل مواطن« . أصل الفتاوي مزاج يا عم رمسيس . أنا اعرف واحد من زباين الفضائية ما يعرفش يحط راسه ع المخدة قبل ما يرم عضمه بجوز فتاوي مع الكاتشاب . وأول ما يصحي من النوم لازم يبل ريقه بفتوي مع سيجارة .
قال الشيخ غريب : إفتيني ولا تغديني !
سأل الملك : كيف يقبل علماء الإفتاء بالعمل في فضائية آفاق مثلك ؟
أجاب روكا : الفتوجي بتاعي أجدع من كل العلما يا سيادة الملك . مدقدق وابن سوق وهارش الفولة وعارف القرد مخبي ابنه فين . قبل ما يظهر ع الشاشة لازم يعمل دماغ ويوَنوِن ويطير في السما من غير جناحين . ولما يحس انه تمام التمام يلزق الزبيبة والدقن ويقول للمخرج ع البركة .. ويبُخ فتاوي تجيب عاليها واطيها .
سأله الملك : وما هو مرجعكم في الإفتاء ؟
أجاب روكا ضاحكاً : مرجع إيه يا راجل يا طيب؟ حفيدك الشيخ القبيض نص وزنه دماغ . بيغرف من دماغه ويرمي فتاوي في حجر اللي غاوي ويقول له عبي يا مؤمن . راجل بركة. كان مهندس في الحي سياتك . لسانه حلو وضميره أحلي وعمره ما قفل درج مكتبه في وش حد . كان عنده 5 عيال ومرتبه ألف جنيه ما فيش غيرهم ، لكن ربنا طارح فيهم البركة . بيشتري بيهم حاجات تساوي 05 ألف وزيادة . بَنَي من مرتبه فيلا وبرجين واشتري مزرعة 03 فدان ع الصحراوي وفتح بوتيك لمراته و5 شركات لعياله وحط عشر أنارب في البنك بياكل الشهد من فوايدهم . ولما المحافظ طرده اتفرغ للعبادة سيادتك . بيحج في السنة مرتين وثلاثة . وطول النهار في الجامع . يوماتي بعد العشا نتقابل علي قهوة عنتر . نشرب الحلبة الحصا ونعَّمر الطاسة بكام حجر لحد ما عنينا تشوف الجوزة تِعبان بقُصة لابس شورت وراكب بسكلته . ولما الأدان يقول الله اكبر نتمضمض ونقوم نصلي الفجر حاضر .
قال الشيخ : حرماً يا سيد المعلمين !
قال روكا للملك : فتاويه بنج سيادتك. زبونه قالت له ان دكتور فضائية الأعشاب نصحها تمضغ لبان دكر عشان لسانها بيفأفأ إذا اتكلمت مع صاحبتها 03 ساعة في التليفون . حدفها بدقنه وقال لها ياكافرة . حرام شرعا ان بقك ينكشف علي دكر حتي لو كان لبان . قالت له وإيه رأيك يا مولانا في جوزي اللي بيمضغ لبان نتاية ؟ شد المطوة من الشراب وقال لها يبقي زاني وكافر ودبحه حلال هو والنتاية .. حتي لو كانت لبانة .
علَّق الشيخ : وتُطلب الخُلع يا معلِّم !