صباح الورد

مونتجومري زمانه !

سأل الملك رمسيس الثاني روكا الحرامي عن أخبار الترشيح لانتخابات مجلس الشعب .
قال روكا لجلالته : رحت أقدم ورقي عشان أرشح نفسي قالولي ما كانش يتعز . الراجل فتح اللفة اللي فيها الورق بتاعي ، وبعد ما بص فيه حدفه في وشي وقال لي شهادة البكالوريوس بتاعتك مضروبة . قلت له تف من بقك .. ده اللي عاملها إيده تتلف في حرير . قال لي أنا ما سمعتش قبل كده عن حاجة اسمها مهندس مراجيح . والشهادة بتتختم بختم النسر مش بربع جنيه مخروم . وكمان بتطلع من الجامعة مش من القهوة. واللي بيمضي عليها رئيس الجامعة مش صاحب القهوة .
قال الشيخ غريب : تلاكيك يا معلم !
قال روكا: قلت له أنت مش عايش في الدنيا ولا تعرف حاجة . ده المعلم عنتر راجل زي الفل وسمعته في الحارة زي الجنيه الدهب وامضته بتفوت في الحديد . وعملت لهم فضيحة سيادتك ولميت عليهم أمة لا إله إلا الله . بس برضه صمم علي رأيه وحط العقدة في المسمار.
قال الشيخ : قصدك في المنشار يا معلم !
قال روكا للملك : قلت له إزاي تحرم المجلس مني وأنا بطل من بتوع الحرب . جاب الكشف بتاع الحرب وبص فيه وقال لي إسمك مش مكتوب . قلت له يبقي الكشف بتاعكم هو اللي مضروب . أنا معايا شهادات ان انا فعصت بصابعي اليمين 54 دبابة حديد برجالتهم . والجرايد نشرت صورتي وكتبت المعلم روكا بطل أغسطس .
قاطعه الشيخ : الحرب كانت في أكتوبر يا معلم!
قال روكا للشيخ : كلها شهور ربنا يا مولانا . والبطل المجدع اللي شايل رقبته علي كفه وداير يلف بيها ، بيرمي نفسه في النار من غير ما يسأل إحنا في شهر إيه .
قال الشيخ : مونتجومري زمانك يا سيد المعلمين !
قال روكا للملك : أنا جاي لسيادتك عشان تكش فيهم وتخليهم يقبلوا الورق بتاعي . وإذا كانت الشهادة مش عاجباهم انا جاهز بغيرها .
قال الشيخ : دايما جاهز يا سيد المعلمين .
قال الملك غاضبا : أتريد ان تدخل إلي مجلس الشعب الموقر بأوراق مزورة أيها اللص !
قال روكا : أعوذ بالله. وتربة أمي وألاَّ أعدمها ما حصل . أنا لو عاوز أقدم ورق مضروب مش ح أغلب . وممكن الصبح أورَّيك شهادة مختومة بختم النسر الازرق وممضية من رئيس الحي واتنين مهندسين ان أنا أوباما بتاع أمريكا .. لكن دي مش سكتي . أنا أحب أمشي في السليم يا عم رمسيس . واذا كانوا خايفين مني طمنهم سيادتك. قل لهم روكا مالهوش في السياسة . مش ح أقعد تحت القبة جنب الوزرا ولا البهوات . مكاني ورا في الحتة الضلمة اللي ساكن فيها النواب الطيبين اللي لا بيهشوا ولا ينشوا . أقلع الصندل واحطه تحت راسي واتمدد واديها نوم . واوعدك مش ح أشخر . أصل أنا بفهم في الذوق يا عم رمسيس . مش معقول أشخر وأعكنن علي 30 عضو نايمين حواليا .
قال الشيخ : كلك ذوق يا معلم !