صباح الورد

بلد جراچات!

سأل الملك رمسيس الثاني روكا الحرامي: لماذا سرقت منبر قاين باي من مسجد السلطان حسن ، واشعلت نارا بين وزارتي الثقافة والاوقاف . أيها الوغد ؟
أجاب روكا مستنكرا : مش انا وشرفك ياسيادة الملك . انا روكا بتاع الصعب . اركب الصعب وادلدل رجليَّا واقول ماحدش ينزلني . لكن سرقة الآثار سهلة وماتلذش . مافيهاش تشغيل دماغ . وأنا ما أحبش الرزق الي ييجي بالسهل . تغور اللقمة اللي ماتجيش بعد عرق وشقا .
قال الشيخ غريب : رجل مباديء يامعلم !
قال روكا للملك : انا مايملاش عيني الا الهرم بتاع جد سيادتك الكبير .. ولو عشش في نافوخي بعون الله اسلته من مكانه ويبقي حلالي بلالي .. افكه أنا وصبياني حجر حجر في شهر واحد بالكتير . واذا حد سأل نقول احنا بتوع شركة صيانكو .. جينا عشان نغسل الحجارة ونرشها دوكو ونلمَّعها لحد ماتبقي زي المراية والسياح يشوفوا وشهم فيها . بتوع الآثار ح يسيبونا نفك مادام العملية فيها مصلحة للبلد ، ويحلفوا ان ماحدش مننا يحط إيده في جيبه ولايكلف نفسه مليم. الشاي والغدا والسجاير عليهم، وكباية عرقسوس ساقع بين كل حجر وحجر ، لحد مانفك آخر حجر .
قال الشيخ : وفص ملح وداب !
قال روكا : اذا ماحدش من السياح سأل عن الهرم يبقي خير وبركة . واذا سألوا تبقي العملية انكشفت لامؤاخذة . وساعتها الموظف يكتب مذكرة لنائب المدير ، وبعدها بكام يوم المذكرة تتحول للمدير ذات نفسه ، وبعد جمعتين المدير يرفعها للمدير العام ويكتب عليها »للعلم والبطاطا« .
قاطعه الشيخ : قصدك للعلم والاحاطة يامعلم !
قال روكا : بعد المدير العام مايرجع من اجازته بالسلامة يبعتها للراجل الكبير بتاع الآثار ويكتب عليها »لاتخاذ الدبابير النائمة« .
قاطعه الشيخ : قصدك اتخاذ التدابير اللازمة ياسيد المعلمين !
قال روكا للملك : والقيامة تقوم سيادتك .. يقبضوا ع الغفير ويحققوا معاه .. والجرايد تقول انه قابض من الهكسوس ، وينشروا صوره مع ملك الهكسوس بيتودودوا ويشربوا قرفة باللبن علي قهوة عنتر . والشهود يقولوا الملك هو اللي حاسب ع المشاريب .. دفع للواد دقدق ورقة بميت جنيه وقال له خلي الباقي علشانك ، وبعدين باسه وقال له سلم لي علي امك.
قال الشيخ : ان الله ستار حليم !
قال روكا : التحقيقات تشتغل والورق يروح وييجي ، واخرتها النيابة تفرج عن الغفير لعدم كفاية الادلة . والعملية تنام وتشخر .. وساعتها احط رجل علي رجل وابيع حجارة الهرم ع القهوة بالقطاعي .
قال الملك غاضبا : ويختفي هرم اجدادي ايها اللص ؟!
رد روكا : مظبوط سيادتك .. ويبنوا مكانه جراج دورين تحت الارض وسبعة فوق ويسموه جراج خوفو والساعة بخمسة جنيه . زي جراج الاوبرا اللي بنوه بعد مااتحرقت الاوبرا .
قال الشيخ : بلد جراجات يامعلم !