صباح الورد

فضائية الخرونجان!

قال روكا للملك رمسيس الثاني: إديني كارت توصية حجر من بتوع سيادتك أروح بيه للمسئولين بتوع مدينة الإنتاج الإعلامي. أصلهم قفلوا المحطة الفضائية بتاعتي وحرموا الناس من الإعلام الهايف.
قاطعه الشيخ غريب: قصدك الهادف يا معلم !
سأله الملك: وما شأنك أنت بالإعلام ايها الأفاق ؟
أجاب روكا: أصل الشغل في المحطة مابقاش يلذ . ما حدش معاه حاجة يحطها في المحفظة . وانت عارف ان الرزق بتاعنا كله جوه المحفظة . الواد عوض الفران قال لي لازم تشوف لك سبوبة تانية تلقط منها رزقك يا سيد المعلمين ، إفتح فضائية تاكل من وراها الشهد. وفعلا سيادتك . فتحت فضائية أعشاب اسمها »داويني ولا تغديني« بنعالج فيها كل الأمراض المستعصية. الإسهال والإمساك ووجع الرجلين وغممان النفس والكبد والكلي وكافة شيء . الواد دقدق ابن أوسة الدلالة يكشف ع الزبون إللي متمدد يقزقز لب في البيت قدام التليفزيون . يعرف الداء والدوا بتاعه وكأنه دكتور في اجدع مستوصف سيادتك .
سأله الملك : أتعني أنه ليس طبيبا ؟
أجاب روكا : طب الأعشاب مش محتاج دكتور يا عم رمسيس ، المهم ان الواحد يكون ابن سوق وحلنجي ومدقدق واشتغل سنتين ثلاثة في محطة بنزين .
سأله الملك : وكيف يتم تشخيص المرض دون فحص المريض ؟
أجاب الشيخ : الحرامي ما يغلبش !
قال روكا: لما يتصل بالنمرة اللي مكتوبة ع الشاشة نقول له يبعت الفلوس ، وتاني يوم الأعشاب الطبية توصله لحد بيته .. وكله بريبري وشرفك .
قال الشيخ : قصدك دليفري يا معلم !
قال روكا: الأعشاب موجودة بالزوفة عندي في المَنْور.. محفوظة جوه الشوال ومتغطية بمشمع عشان الدبان .. وكمان الفيران ما بتعتقش سيادتك . يعني الحمد لله متشاله في الحفظ والصون .. ولما المجاري ضربت في المَنْور جبت غطاس من بتوع المجاري وغمزته بتلاتين جنيه . قلع هدومه ونزل سحب الشوال وغسلنا البلاوي اللي عليه بخرطوم الميه ونقلناه فوق السطوح عشان الشمس تنقح فيه وتمص الريحة والرطوبة اللي جواه .. دي أمانة يا عم رمسيس وصحة الناس مش لعبة .
قال الشيخ : ربنا يديك علي أد نيتك يا معلم !
قال روكا: أقرا الروشتة اللي كاتبها الواد دقدق واحط إيدي اليمين في الشوال واغرف أعشاب لعلاج الدوخة وحرقان المخ وابعت . وبعدين احط إيدي الشمال واكبش منه أعشاب الجرب ووجع السنان واباصي .. كله في الشوال سيادتك .
قال الشيخ : .. والأعمار بيد الله !
قال روكا للملك : ولاد الأبالسة قفلوا القناة وسابوا العيان يلالي من غير اعشاب تداويه ، أعشاب الفضائية بتاعتي مالهاش حل سيادتك. خرونجان وشبنعر وسرنجع وزعبور القرد وخنديش الجن . اعشاب تخللي الاعمي يفتح والقرعة يطلع لها شعر زي الحرير ، والمجنون بين يوم وليلة يصبح حكيم زمانه ، حتي اللي مش لاقي وظيفة علاجه عندي ، ينقع الجعضوف في برميل سبرتو ازرق 7 ايام بلياليهم ، وياخد منه يوماتي لحسه ع الريق ، بعد عاشر برميل ح يلاقي عشرة بيخبطوا علي باب بيته .
قال الشيخ : عشان يدفنوه يا معلم !