صباح الورد

الحلنجي يگسب !

قال روكا الحرامي للملك رمسيس الثاني: الحكومة ندهت لرجال الأعمال وقالت لهم عاوزين نزرع الصحرا ونغرَّق السوق خضار . بامية وقلقاس وبدنجان وكوسة وبرسيم عشان الناس تاكل وتملا بطنها . والأرض خُدوها مني بملاليم. بس اللي يلعب بديله ويبني عليها يا ويله يا ظلام ليله .
وأضاف روكا يقول: رجال الأعمال غمزوا لبعض وقالوا للحكومة ماشي . وبعتوا جابوا رغيف فينو فرنساوي بتسعة جنيه من فندق خمس نجوم وحلفوا عليه ان ربنا يعميهم لو ما زرعوش الأرض . أصلهم مش بيحبوا الرغيف المدعوم عشان بيعض لا مؤاخذة .
قال الشيخ غريب : عضته أجارك الله !
قال روكا للملك : صاحبي وحبيبي حسونة بيه الحلنجي رجل أعمال قديم كان بيلعب بالفلوس لعب . اتظلم في قضية نصب ع البنك واتشمبر خمس سنين. ويشاء ربك انه يخرج من السجن ع الحديدة في معمعة بيع الصحراوي بملاليم. وطي علي ودني وقال لي سلفني قرشين اشتري بيهم من الحكومة حتة محندقة ألف فدان . قلت له أجيب لك منين 001 مليون يا مجنون . قال لي أنا مش مجنون . انت اللي أهطل وعلي نياتك . أنا سكتي سالكه وح اشتري بالسعر بتاع رجال الأعمال . أدفع 42 ألف جنيه استلم ألف فدان .. مديت ايدي في الزكيبة واديته ايراد يومين من شغل المحطة. دفعهم واستلم الأرض وتاني يوم باع منها نص فدان كتيمي. رد فلوسي علي داير مليم واشتري عربيتين . واحدة سودا بستاير والثانية سودا من غير ستاير تمشي وراه فين ما يروح وجواها أربع تيران زلبطة بنضارات سودا لزوم المنجهة . وحط قرشين حلوين في البنك لزوم دفتر الشيكات .
قال الملك : كل هذا من عائد بيع نصف فدان أرض صحراء ؟
أجاب روكا : اصله باع بالمتر سيادتك. المتر مباني بألفين جنيه. يعني النص فدان بأربعة مليون . وكان واقف عليه جملة باتناشر جنيه .
قال الشيخ : يعني المتر بقرش يا معلم !
قال الملك : هذا غش . ألم يلتزم بزراعة الأرض ؟
قال روكا: الراجل التزم وزرع التسعمية تسعة وتسعين فدان ونص. بس مش قلقاس سيادتك . القلقاس محتاج تقاوي وكيماوي وفلاحين يسقوه مية. ولا حتي زرعها قوطة . أصلها مجنونة . ممكن تهيج وتاكل الفلاحين اللي بيسقوا القلقاس . وخاف يزرعها قطن. أصل الدودة اللي بتاكل القطن طفسة ، ما يكفيهاش يوماتي بألف جنيه توكسافين . ولو زرعها قصب مش ح يتباع سيادتك . الناس سنانهم وقعت من الغلا وما عادش فيهم حيل يمصوا . ولما رجالته قالوله إزرعها كوسة قال لهم البلد مش ناقصة كوسة .
قال الشيخ : ولا قرع يا معلم !
قال روكا: العقد مكتوب فيه » يزرعها « والراجل وعد الحكومة ووعد الحُر دين عليه . ما سابش شبر واحد من غير ما يزرعه. زرعها سرايات وفلل وحمامات سباحة ومولات ومدارس ونوادي .. عملها مرتجع .
قال الشيخ : قصدك منتجع يا معلم !
قال روكا : بس تقول إيه سيادتك للحكومة . بتكره الخير لولادها . متغاظة وبتاكل في نفسها عشان ربنا فتح عليه من وسع . بيبيع فدان الفلل بخمس أنارب.. ولو زرعه بامية كان ح يبيعه بجوز بواكي .
قال الشيخ : مش سايبه حد في حاله !