صباح الورد

اتصل الآن!

سأل الملك رمسيس الثاني روكا الحرامي عن أخبار امتحانات الثانوية العامة. رد روكا قائلا: اللي مش مذاكر مش ح يدخل الجامعة . ح يقعد ع القهوة مع خواته سيادتك . لكن اللي مذاكر ح يجيب مجموع ويدخل كليات العِمَّة .
قال الشيخ غريب : قصدك القمة يا معلم !
قال روكا: بعد خمس ست سنين يتخرج وياخد الشهادة الكبيرة . امه تزغرد وابوه ينفش ريشه. وح يلاقي زمايله اللي ما دخلوش الجامعة مستنيينه ع القهوة . ما فيش حد بيتوه سيادتك. كله بيقعد ع القهوه .
قال الشيخ : أحسن من المشي البطال !
قال روكا للملك : الأستاذ مرزوق بتاع الرياضيات كلَّم خاله إمبارح في التليفون . كان بيعيط وحالته تصعب ع الكافر. قال له انت متأكد يا خال ان الحاجة سعدية اختك تبقي أمي ؟ أصلها عملت فصل بايخ ماتعملهوش أم في ضناها. استكترت عليَّا الكام أستك اللي بيخشوا جيبي في اليومين المفترجين بتوع المراجعة . قعدت راقدة في الدرة مغمضة عين ومفتحة عين ، وأول ما الرزق بدأ يهل عملت عملتها وماتت .
وأضاف روكا يقول للملك : بعد ما ماتت سيادتك اشتكاها لطوب الأرض . وحلف بالطلاق ما يدفنها إلا بعد ما يخلَّص المراجعة ويلم فلوسها علي داير مليم .
قال الشيخ : الحي أبقي من الميت !
قال روكا للملك : اللي ما يعرفش الأستاذ مرزوق يبقي مش من مصر . الإعلانات بتاعته مرطرطة في الشوارع والقهاوي ومحطات المترو والسوبر ماركت . لو سيادتك دخلت أي مراحيض عمومي ح تلاقي صورته مكتوب تحتها »شمشون الرياضيات - اتصل الآن« .
واضاف روكا: أيام المراجعة بيمد سلك حوالين فدان من ارض الدولة الواسعة ع الطريق الصحراوي ويعمله حوش يرص فيه الصبيان والبنات عشر صفوف كل صف عشرة . القصير ورا والطويل قدام. قلت له واشمعني عشر صفوف يا أستاذ مرزوق. ما تخليهم حداشر والرزق يحب الخفية . بص لفوق وقال لي: وأروح من ربنا فين ؟ كفاية 001 طالب عشان يستفيدوا وربنا يطرح البركة في شوال الفلوس . قلت له ما دام هي دي النظرية خليهم تسع صفوف بس وكله بثوابه . قال لي كده العملية تقف عليَّا بخسارة يا معلم !
قال الشيخ : خير الأمور الوسط !
قال روكا: يفوت علي كل صف يلم الفلوس من العيال ويحدفها في الشوال. 002 جنيه من كل طالب * 001 طالب يعني المراجعة بترمي في عِبه 02 باكو في الليلة اللهم لا حسد . ومابيرضاش ياخد منهم رسم دخول الحوش . بيقول ان الطمع يقل ما جمع ، وكفاية يدفعوا خمسين جنيه رسم خروج . وبياخدها مقدم . أصل الطالب بيهرب بعد الحصة سيادتك .
قال الشيخ : حرامي يا معلم !
قال روكا: قبل ما يبدأ الشغل يرفع ايده فوق يروحوا العيال قايلين في حس واحد نشيد التعليم .
قال الملك : تقليد رائع لتمجيد قيمة العلم . وخاطب جلالته الشيخ غريب : أطربني بسماعه ، فقال الشيخ :
حقيقة ما ينكرها إلا جاهل جربوع
ابعد عن المدرسة لو عاوز مجموع
روح لمدرس خصوصي انشالله حتي تجوع
يسقيك عِلم سنة في أقل من أسبوع