أمي محتاجة للفلوس وأنا شغلي مش قد المقام

[باشتغل غصب عني عشان أقدر أسدد ديون أمي]
باشتغل غصب عني عشان أقدر أسدد ديون أمي
السلام عليكم.. جزاكم الله خيرا على الخدمة دي، وأثابكم حسن الجزاء للتفريج على المسلم كربته إن شاء الله.
مشكلتي هي إني محتارة جدا لأبعد الحدود اللي ممكن تتقال؛ أنا المفروض أكون متخرجة من سنتين من كلية الخدمة الاجتماعية، وبفضل الله ده مش حصل لمشكلة ما مع دكتور وأنا الحمد الله رضيت بالنصيب، وعزمت على التكملة.. في أثناء وقت الإعادة للسنين المتبقية كان بيجي لي فرص كتير للشغل؛ بس طبعا للخريجين وطبعا للتقدير العالي، وده مش حاصل معايا، وبفضل الله ربنا رزقني الرضا على نصيبي ده، وباقول أكيد هتتعوض في شيء تاني.

ووالدتي كمان عليها ديون، وهي أجدع شخص ينفض من ناحية الفلوس بحجة ليس في الإمكان أفضل مما كان، فتقريبا هي اللي شايلة الحِمل لوحدها، وكانت عايزاني أخلص علشان أبتدي أشيل معاها المسئوليات الخارجية كمان، وده مش حاصل برضه بسبب الدراسة.

المهم إني ابتديت أدور على شغل، وربنا وفقني ولقيت.. بس الشغل مش مناسب ليّ بالمرة، ومميزاته مش كتير للدرجة، وحاسة إني باتنازل لما باروح الشغل ده؛ الشركة كبيرة ومعروفة جدا ومجالها فريد؛ بس معاملتهم صعبة قوي لدرجة إني بقيت كل أسبوع باغيب يوم علشان أريح أعصابي من الشغل.

والشغل عندنا بيطلع بنسب؛ يعني مثلا كل يوم ليّ تارجت معين لو ماخلصش يبقى أعتبر نفسي ما أشتغلتش اليوم ده، ولو يوم غياب يبقى الشهر تقريبا ضاع من المرتب، ولو فيه عذر ماياخدوش بيه.. دي معاملة صعبة قوي، وكمان مستوى الناس اللى باتعامل معاهم دبلومات وإعدادية فيما أقل، وأسلوبهم وكلامهم حتى إنهم علشان يحفزوني على الشغل بيبقى بطريقة استفزازية "شوفي فلانة طلعت نسبتها في الشغل جاتك وكسة اتنيلي على النسبة اللي مش عارفة تطلعيها"... وهكذا.

ومش هينفع طبعا أغير منهم، أنا يا دوب بقالي 3 شهور بالعافية معاهم، واتكون عليّ ديون لازم أشتغل وأسدها، ومرتبي ضعيف علشان النسبة دي، ومن كتر احتياج أمي بتقول لي كفاية إن الشغل قريب من البيت، وأي مبلغ يجي من بره أهو أحسن من مافيش.. أنا عايزة أسيب الشغل وعليّ ضغوط كتير والنجاح في هذا المجال بالشكل ده مستحيل وصعب جدا، ومش هاعرف أغيّر منهم، هم أكتر من 30 إنسانة، وأنا بس لوحدي.

غير إنه طبعا ليه مميزات أنه قريب من بيتي تقريبا ربع أو تلت ساعة مافيش مواصلات تقريبا، المكان محافظ علينا جدا كبنات؛ يعني البنات لوحدها والشباب لوحدها، بس باروح وكأني داخلة سجن لمدة 9 ساعات من أول ما باروح على مكتبي مش باقوم؛ إلا في ميعاد النزول الأكل بمواعيد والشرب بمواعيد حتى الصلاة بمواعيد.. شيء متعب نفسيا وأشياء كتير خايفة لأطول في الكلام عنها، وأرجو الرد سريعا جزاكم الله خيرا.

shahd_baby56


شكرا ليكِ يا صديقتي الجميلة على متابعتك لينا وثقتك فينا، في الحقيقة أنا ماعرفش إيه المشكلة اللي أخرت تخرجك سنتين، وهل هي في مادة واحدة أو مجموعة مواد، وعموما الظروف في مصر خلت حتى الناس اللي بتتخرج وواخدين تقديرات بيلاقوا صعوبة شديدة في إيجاد عمل في مجالهم.

فلو هنتعامل مع مشكلة دراستك كأمر واقع أو كما أردتي أنتِ أن تعتبريها مسألة رضا بالنصيب؛ فلا يجب أن تتعاملي بنفس الطريقة مع كل أمور حياتك، شباب كتير في مصر بيعانوا نفس مشكلاتك، الفقر وتعطل الدراسة بسبب ظلم الأساتذة، وظروف العمل المهينة؛ لكن الفرق بين شخص وآخر شيء واحد هو الإرادة يا صديقتي.

طب تعالي نفكر سوا، واحدة واحدة.. الآن أنتِ في عز شبابك وعديتي مرحلة الخطر من مراهقة وغيره، وبقيتي في سن النضج والاختيار، صديقتي السنين العشر الجايين هم أهم عشر سنين في عمرك كله، هم الفترة اللي بيعمل فيها البني آدم معنى وقيمة حياته كلها، بعدها بنبدأ نكبر وجسمنا بيضعف حتى فرص الستات لإنجاب الأطفال بتكون أقل، لازم تفهمي إن الحياة قصيرة، وعلشان كده لازم نعيشها بأفضل طريقة ممكنة زي ما دكتور شريف عرفة دايما بيقول.

دلوقتي أنتِ راسمة لنفسك دائرة ضيقة ومانعة نفسك من الخروج منها، لو شغلك مهين لازم تدوري على غيره، ولو شغلك مش بيوفر احتياجاتك وبيسبب لك كل الألم النفسي ده يبقى مايستاهلش الاستمرار فيه.

الإرادة يا صديقتي.. اخرجي من الدائرة الضيقة.. اخرجي النهارده للحياة، ما تستسهليش الشغل القريب من البيت، اتعلمي حاجة جديدة.. احلمي حلم كبير وخلي حلمك يحركك، اشتغلي في مكان تاني وتالت، اتخيلي نفسك بعد 10 سنين، زوجة وأم لطفل وناجحة في شغلك وحياتك، وليكِ أصدقاء كتير وأهلك بيحبوكِ، تخيلي نفسك "إنسانة ناجحة"، وشوفي علشان تبقي كده بعد 10 سنين المفروض تبدأي إزاي دلوقتي.

إزاي تعملي career (منصب) وتكون عندك خبرة فيه، البدايات دايما صعبة، وأنا أول ما اشتغلت في إجازة الصيف ماكنتش بأقبض غير 80 جنيه في شغلانة قد يعتبرها البعض "مهينة" رغم إنها حلال، بس مع الوقت اتعلمت، كل مكان بتشتغلي فيه بتتعلمي منه حاجة، وكل نشاط بتمارسيه بتكسبي منه حاجة والرزق مش كله فلوس، يعني أحيانا المعارف بيساعدوكي في حاجات، وممكن تقابلي شريك حياتك، بس مهم إنك تبقي عارفة إنتي عايزة إيه، علشان تقدري توصلي له.

ودلوقتي هاسيبك تحددي مع نفسك إنتي عايزة إيه؟ خلال ال10 سنين الجايين، عاوزاكي ترسمي صورة جديدة، تخليكي لما تقفي قدام ربنا ويسألك عن عمرك فيما أفنيته.. تعرفي تردي عليه، أنا مش هاقول لك سيبي الشغل؛ لكن على الأقل لازم تدوري على شغل جديد.. وفي النهاية.. ده اختيارك.. وربنا يوفقك.

لو عايز تفضفض لنا دوس هنا