أختك الصغيرة هتتجوز قبلك.. شكلك هتعنسي

بسم الله الرحمن الرحيم.. أنا مشكلتي تتلخص في إني بنت عندي 23 سنة، ولظروف ومشكلات خارجة عن إرادتي.. لسه بادرس في آخر سنة واتأخرت في الكلية سنتين، المشكلة عندي في البيت كل شوية يتكلموا في موضوع الجواز قدامي، وإن أختي الصغيرة اللي عندها 20 سنة بيتقدّم ليها عرسان وبيرفضوا علشان أنا الكبيرة، برغم إن العرسان اللي اتقدموا لها مافيش فيهم حد مناسب، وأنا باتعب نفسيّا لما بيفتحوا الموضوع ده قدامي، بس مش بابيّن.. وأنا مش معارضة إن أختي تتجوز قبلي، وقلت لهم الكلام ده كتير بس برضه بيتعمدوا يفتحوا الموضوع ده قدامي زي ما يكون أنا ليّ ذنب في كده.

ماما وبابا على طول يقولوا لي شكلك هتعنسي.. بس بتهريج وهما مش حاسين إنهم بيدبحوني بكلامهم ومش مقتنعين بالنصيب.

أرجوكم ردوا بحلول ليّ مش ليهم؛ لأن المشكلة فيّ.. مش قادرة أستحمل ومش قادرة حتى أقول لهم إني باتضايق من كده.. آسفة إني طولت عليكم.
nona.nona


صديقتي العزيزة.. الكثير من الأسر المصرية تلجأ لهذه الطريقة مع بناتها؛ وهي أن تشعرهن دائماً بأنهن في مشكلة؛ لأنهن لم يتزوجن حتى الآن، تقدري تسميها كده طريقة من طرق الضغط النفسي الإيجابي من وجهة نظرهم طبعاً، يعني بيفتكروا إنهم لما يعملوا كده البنت هتبدأ تتحدى نفسها و"تتنحرر وتتجدعن" علشان تصطاد العريس اللقطة.

وطبعاً أنا عارفة إن الطريقة دي مش صح تماماً، ونتايجها بتكون عكسية؛ لأن البنت بتبدأ تفقد الثقة في نفسها، وتحس إنها مش مرغوبة، وده بيكون غير حقيقي بالمرة، كل الحكاية إن النصيب لسه ماجاش زي ما بيقولوا.

ولكن وبالرغم من إني مش متفقة مع طريقة أهلك في التفكير أو في تعاملهم معاكي، لكن لازم تفهمي إنهم في النهاية بيعملوا كده بسبب خوفهم وقلقهم عليكي، ومش معنى كده إنهم يقصدوا يجرحوكي أو يضايقوكي.

أما بقى بالنسبة ليكي إنتي فيكفي إنك تكوني مؤمنة بالنصيب زي ما بتقولي علشان تقدري تواجهي أي حد يقول لك كلام زي ده، سواء أهلك أو أي حد تاني.

يعني لازم يكون عندك يقين دايماً إن ربنا له حكمة في كل حاجة بيعملها لنا، يعني لما نصيبك يتأخر شوية أكيد له حكمة مش هتعرفيها إلا بعدين أو ممكن ماتعرفيهاش أبداً، لكن لازم يكون عندك ثقة في ربنا دايماً؛ لأن ثقتك في ربنا هتزود ثقتك في نفسك.

علشان كده نصيحتي الوحيدة ليكي هي إنك تقربي أكثر من ربنا بالصلاة وقراءة القرآن والدعاء، وادعي له دايماً إنه يرزقك بالزوج الصالح وإنك تكوني راضية بنصيبك؛ لأن الرضا هو سر السعادة في الدنيا، واعرفي إن كل ما كان رضا ربنا هو كل همك تكفل الله بكل ما أهمك.

كمان مش عايزاكي تاخدي الكلام بحساسية جامدة يعني حاولي تسمعي من هنا وتطلّعي من هنا؛ لأن حتى لو زواجك اتأخر مع إن ده مش حقيقي بالمرة؛ لأن سنك لسة صغير جداً جداً، فده سببه مش عيب أو نقص فيكي؛ لأن زي ما قلت قبل كده في الأول وفي الآخر ده نصيب، وزي ما أنتي قلتي بنفسك أختك بيتقدم لها عرسان كتير لكن مافيش حد فيهم نصيبها، يبقى الوضع مش مختلف كتير.

عشان كده لازم دلوقتي تهتمي بمستقبلك وبدراستك علشان تخلصي كليتك وتبدئي حياتك العملية، اللي إن شاء الله هتكون موفقة.

واعتبري إن الوقت اللي بتمري به ده وتصرفات أهلك اللي بتضايقك مجرد ابتلاء من ربنا علشان يشوف مدى ثقتك وإيمانك به.

صديقتي..
لازم تتعلمي تحمدي ربنا دايماً على النعم اللي عندك وبلاش تبصي لنصف الكوب الفاضي علشان ماتتعبيش، ولما تمري بموقف سيئ فكري دايماً إنه فيه بنات كتير عندهم ظروف ومشاكل أسوأ من كده ومع ذلك بيصبروا وبيحمدوا ربنا.
لو عايز تفضفض لنا دوس هنا