مجرد لعبة قديمة

أنا فيه ولد بيحبني جدا، وأنا كمان بحبه ومش متخيلة حياتي غير معاه، هو بس المشكلة إني ساعات باحس إنه يستاهل حد أحسن مني لأن فيه كل الصفات اللي تحلم بيها أي بنت، ووسيم وكل شيء كويس، وأنا ما أتمتعش بقدر من الجمال عالي يعني عشان أكون مناسبة ليه، ودائما باخاف لا يندم على حبه ليّ.
زائد إني كنت بحب ولد وأنا في ثانوي؛ بس حب من طرف واحد، بس نسيت حبه واقتنعت إنه حب مراهقة، ومع ذلك إن كل ما أشوفه بافضل أبص له وافرح لما أشوفه رغم إني ما بقتش أحبه ومش عارفة أنا كده بحب الشخص اللي بيحبنى ولا باخونه بمشاعري دي.

س.ع
خليكي مع اللي بيحبك واللي بتحبيه لأن هي دي العلاقة الطبيعية بين أي اتنين في الدنيا "الحب المتبادل" أما كونك بتحسي إنه يستاهل أحسن منك، فسامحيني دي قلة ثقة منك في نفسك، وعلشان تستعيدي ثقتك بنفسك لازم تعرفي شوية حاجات مهمة؛ أول حاجة ما تقارنيش نفسك بالآخرين أو حتى بيه لأن كل إنسان ربنا حباه بمواصفات خاصة ومزايا معينة؛ بدليل اسألي نفسك هو بيحبك ليه؟ وبطلي فوراً ترددي الكلمات المحبطة زي "أنا ما اتمتعش بقدر من الجمال" و"باخاف لا يندم على حبه ليّ"، والتي تزيد الشعور بقصور النفس وأنها فاشلة لا تستطيع إنجاز شيء؛ لأن هذه الكلمات لا تفيد مطلقاً، بل تزيد اليأس يأساً.
وتقبلي كل الإطراء الذي يوجهه لك حبيبك بطريقة متزنة، وحسي قد إيه إنتي تستحقي فعلا الحب والاحترام عشان أكيد جواكي حاجات كتيرة جميلة بغض النظر عن الجمال الشكلي والجسدي. وطوَّري نفسك، ونمِي مواهبك، وعززي الجوانب الإيجابية في شخصيتك، وفي الوقت نفسه نمي علاقتكم وخليها أعمق، واسعي لأنها تكون في إطار شرعي، وتكون قدام الناس كلهم وخصوصا أهلكم.
أما الموضوع بتاع ثانوي ده؛ فمجرد ذكريات حلوة زي لما تكوني تحبي حاجة معينة وإنتي صغيرة "لعبة عروسة مثلا" مهما تكبري بتلاقي نفسك لما تشوفيها بتضحكي وبتفرحي من جوه؛ لكن مش معنى كده إنك هتلعبي بيها تاني دلوقتي، بصتك له وفرحتك عشان بيفكرك بمشاعرك زمان وحدوتة كانت في خيالك.
لكن صدقيني لو اتعرفتوا على بعض وقربتوا من بعض ممكن تكتشفي إنه أبدا مش هو الشخص اللي إنتي متخيلاه.

لو عايز تفضفض لنا دووووس هنا