ليه البنات مش بتتجوز

بقلم سالى عبد العزيز
علشان الناس هتقول ايه الجيران والقرايب و الصاحبات هيقولوا عليها ايه..لو وافقت على واحد اقل منها في كام حاجه...وبعدين بنت فلانة احسن منها في ايه علشان تاخد واحد كامل من مجميعوا وهيا لأ...وبنت علانة جالها شبكة ب آآآآآآآآآد كدا ...ازاي يعني هيا يجيلها واحد معقول بس مش قادر يجيب غير اسورة وخاتم وبس!!!!....وبعدين سوري في الكلمة هيا البنت اللي طالبة طلبات أووفر بقى اللي كاملة المعاني علشان يجيلها الكامل مان من عالم الكارتون والسوبرمان دا حتى السوبرماركت مافيهوش من هذا المان في هذا الزمان...بقول ايه..بدل يا بنتي ما تتعبي نفسك وتكرمشي وشك بحطك ايدك على خدك مستنية العدل العِدل..شوفيلك حاجه تنفعك..اشغلي نفسك بحاجة مضمونة تلاقي نفسك فيها..أي حاجه انشاء لله تنجحي في الطبيخ وتعملي مشروع مطعم اكل بيتي وانتي في بيتكو..اقري ..اكتبي..خديلك اتجاه..كوني موجوده متكونيش عروسة بخيط يحركها كلام الجيران والقرايب والصاحبات..متفكريش في الجواز هيجيلك جري ومعاه الجهاز..نفسي البنت تبقى عزيزة النفس وعندها كرامة حقيقية ومش مصطنعه وأقصد بالكرامة المصطنعه ان البنت تعزز نفسها بطلبات من العريس تقطم وسطه..الكرامة الحقيقية انه لما يسعى وراكي عريس يكون لأنك عروسة انسانة مش عروسة دبلانة لانك بنت عندها عقل وروح وفكر..لو قدرتي تكوني كدا انت بنفسك مش هتدوري على تفاهات الشبكة والمهر والشقة المعرفش تكون ايه وفين..هتاخديه من ايده وتقوليلو معاك كام..يالا نكمل اللي معايا على اللي معاك وهنعيش وهنبدأ وهنعمل أحسن ما عندنا علشان يكون ملكنا..مش ملك الجيران والقرايب و الصاحبات..نفسي البنت تفهم ان السعادة سعادتها هيا من جوا قلبها وفي عينيها مش سعادتها وهيا بتغيظ بس في اللي حوليها ....مبتفهمش كلامي دا اللا الهانم اللي بتقع في الحب لشوشتها..طب ولازم تحبي علشان تتصرفي كدا..طب افرضي حبيتي حد غلط..ميستاهلش انت هنا تبقي اتنازلتي كتير..نفسي البنت يكون عندها وعي كافي مش تفاهة واخداها من كلام الستات وقعداتهم..بتمنى البنت تدي الانسان اللي يستاهل ...ما يستاهله..حتى لو كان يستاهل الدبح..دووووسي يا حبيبتي طالما عندك وعي