يوم الابتسامة العالمي

بقلم سالى عبد العزيز
يا سلام عليهم الجماعة الفلبينين لما كدا آجي ادخل مطعم وانا مكشرو ألاقيلك الفليبيني واقف في وشي ومبتسم اوي..اعمل نفسي مش شايفاه واعدي من جمبه وشي في خط مستقيم علشان اقعد على الطربيزة ألاقيه يكسيفنس بعدد واحده جودمورنينج ووراها على طول هاو آر يو؟..أقول لنفسي ايه الاحراج دا بقى..وانا أصلا مزاجي مش اللي هوا ومش فايقاله..بس اغصب على نفسي واكشف عن اسناني ما أنا مكبوسة مبتسمة وارد السلام بأحسن منه..واقعد وأسأل استنى الأكل يجهز ومن هنا لهنا افضل اسأل نفسي عن سر ابتسامة الناس دي.. ومحدش يقوللي دي سياسة بيع لأن بيكون شغال معاهم اخوة عرب محدش منهم بيديك الوش السعيد دا..العرب في الاماكن دي بيبتسمولك وانت بتاكل وكأن بيقولك كل وقفة اللقمة في زروك..ليه الفلبنيين من ساعة ما بدخل لغاية ما بخرج من المطعم وهمه بيكونو مبتسمين وفيه لمحة فرفشه غايظاني في الروح بتاعتهم..همه معندهمش حاجه بتنكد عليهم عيشتهم..طب ما فيش مشاكل صحية مادية..بالرغم لو حسبناها يعني دول أغلبهم ناس غلابة جدا..يعني أقصد ان الحالة المادية مش هيا السبب في البوز المكتسب السنين الأخيرة بيننا..دا احنا كنا كمصريين تقول مصري تلحق بالجنسية كلمة ابن نكته..عشري..ابن بلد..كل الحاجات دي راحت فين..(الفلبين!!) دا الشعب الصيني مغيرش ديانته ولا لغته من ساعة ما ظهر على الخليقه تخيل تراث قديم زي دا من يمه على ديانة ولغة واحده الى الآن واحنا يعيني علينا مش قادرين حتى نتمسك بعادات بسيطة يومية!!..أنا مش فاهمه ليه جوانا انهزام..ليه ماشيين جمب بعض بعين مكسورة..بقينا بنخاف نضحك وكأن الضحكه هتتخصم من حسابنا في البنك دا ان كان فيه حساب أصلا..طب ما نحاول..نجرب نرجع نضحك تاني في وش بعض واحنا مش عارفين بعض..نسلم..نبتسم لو المسافه بيننا بعيده..ممكن نضحك الأاول على نفسنا ونعمل يوم عالمي كدا زي يوم عيد الام ولا حتى عيد الفطر..الواحد كدا يصحى من الصبح يخرج من بيته ولغاية ما يرجع وهوا مقضيها ابتسامات عمال على بطال..نشوف اليوم دا هيعدي ازاي..نعلمها لولادنا..الابتسامة..الضحكه..يا جماعه الحاجدات دي زي الاسماء..ببلاش يعني واللي بلاش كتر منه ولا ايه..آه على فكره..مقالي اللي فات دا حكرا على الرجال..يعني مفيش لا ست ولا بنت تمشي كدا تعبر عن رضاها وتبتسم عمال على بطال بسلام وأمان لأن وحياتك هتتفهمي غلط يعني هتتفهمي غلط!!....
كاتبة وأديبة متميزة