على عبد الحى : سنه أولى ديمقراطيه

بعد نجاح ثورة يناير مصر كلها بتتكلم في السياسة !!
سامع حد بيقولى دى مشكله يعنى ولا حرام ؟
بقوله لا ياسدى اطمن ده شئ ايجابي بس المفروض إننا نختار المواضيع اللي نتكلم فيها
بالضبط زى المواد اللي بتفرضها عليك المناهج التعلميه وأنتا في سنه أولى مدرسه
برضو هنا الواقع فرض عليك مواد بس مختلفه شويه لان مدرسه الحياة اصعب كتيير من مدرسه الوزارة
لكن امثله سريعه للمواد اللى فُرضت علينا فى مدرسه الحياة وإحنا لسه في سنه أولى ديمقراطيه ..
مثلا تلاقى واحد بيتكلم عن الرئيس القادم وده شئ كويس بس للأسف ناس كتيير بتتكلم عن الأشخاص وفلان متعصب للمرشح الفلانى وفلان عايز المرشح العلانى .. ده كويس لكن أنتا على أساس فكرت فيه هوا علشان راجل كويس يعنى وسمعته سبقاه وكده ؟
ولا علشان بقاله كتيير فى العمل السياسي ولا علشان ايه بالضبط ؟..
ونسينا أهم نقطه الا وهى البرنامج الانتخابى يعنى لو عمى عبد تلوث بتاع الكبدة رشح نفسه ومقدم برنامج انتخابي كويس لازم انتخبه مش علشان الكبده طبعا علشان البرنامج .. وبمناسبه ان الكلام ده لسه عليه بدرى كان المفروض الناس تاخد بلها الاول من الانتخابات التشريعيه زى مجلس الشعب ومجلس الشورى لانهم قبل انتخبات الرئاسه ...
ولان نجاح اى شئ بيتم بنائه بيبدء من القاعده الاول
لازم نحسن اختيار المرشحين اللى هايمثلونا فى المجالس التشريعيه علشان نقدر ننهض بمصر كادوله وبناء عليه هانقدر نختار الناس اللى هاتعمل دستور جديد يعنى هيا اللى هتشارك فى عمل العقد اللى بينا وبين الحكومة الناس دى هيا اللى هتحاسب الرئيس لما يخطئ الناس دى اللى هتتكلم عن مشاكلك وتبدء تعمل على حلها الناس دى هي اللى هاتوصل صوتك للقيادات فى البلد
شوفتوا بقى ان الناس دى اهم ازاى من الرئيس ..
ينهار ابيض امال الرئيس لازمته ايه بقى ؟
ياسدى الفاضل حتى هذه اللحظه لم تتضح صفه الرئيس..
بمعنى هل ستكون مصر دوله رئاسيه فيكون الرئيس فيها صاحب سلطه ولكن تحكمه القوانين ام ستكون دوله برلمانيه لكلمه فيها تكون لأعضاء البرلمان اللى اختارهم الشعب واللي بتقوم بدورها بتشكيل حكومات بتعمل على تنفيذ مطالب الشعب اللى هوا انا وانتا
...هوا معقوله الكلام ده حقيقى وممكن يحصل ؟؟
يعنى هايكونلى سكرتير يتكلم باسمى جوة مجلس الشعب ويدير املاكى علشان انا مش فاضى اديرها ياااااااااااة ياحلاوة ياولاه على الديمقراطيه ..
هاقولك يااستاذ بما اننا كلنا لسه في سنه أولى فاقدمنا على الأقل 5 سنين علشان نقدر نجنى ثمار الديمقراطيه ونحس بيه بجد وده من خلال اننا نحسن الاختيار في كل حاجه مش فى أعضاء مجلس الشعب بس لكن كمان لازم نحترم راى الاغلبيه حتى لو مخالف لراى ونتقبل راى الاخر لما تحس وقتها انك قادر تعمل ده وقتها بس اعرف انك راجل مصرى ديمقراطى جدا ومبروك عليك النجاح فى سنه اولى
المنصورة