على حساب مين؟

أنا الأول باشكركم جداً على الفرصة دي أنا بجد محتاجة أتكلّم مع حد ويفهمني ويديني حل، أنا مرتبطة بولد هو بيحبني أوي وأنا كمان بحبه أوي، هو وقف حياته عليّ، ويمكن أكون أنا بس اللي في دنيته وأنا متأكدة إنه بيحبني أوي، بس في مشاكل كتيرة بتقابلنا ودايما بنقف قدام المشاكل دي، أكبر مشكلة إن ماما شاكة إني مرتبطة بحد، والمشكلة إنها شاكة فيه هو، بس أنا مش باحط ده في دماغي أوي بس هي بتعاملني وحش أوي.

تاني مشكلة إن أختي وحشة معايا جدا عشان ما كنش ليها حظ في الحب، فهي شايفة إن كل الولاد وحشة، دايما بتبقى السبب في المشاكل اللي بيني وبين الولد اللي بحبه.. أنا والولد ده مش بنشوف بعض كتير عشان أنا مش باخرج كتير، المشكلة إن بيبقى نفسُه يشفني وأنا باخاف أخرج معاه عشان ما حدش يشفني دي بقى أكبر مشكلة؛ عشان كل لما بيحصل كده هو بيتضايق أوي ويفضل ساكت خالص، وكل ما أسأله مالك؟؟ يقول لي: ما فيش، بس أنا ببقى عارفة هو متضايق ليه، بس مش عارفة أعمل له إيه، مش كده بس كمان هو كل لما يتضايق من أي حاجة يفضل ساكت برضه، وأنا مش باعرف أعمل حاجة أنا بتعب أوي من كده؛ عشان باحس إني مش عارفة أخليه سعيد، أنا مش عارفة أعمل إيه يا جماعة بس كل اللي عارفاه إنه بيحبني جداً وأهله كمان بيحبوني جداً، بس المشكلة في اللي بيحصل وفي أهلي، وكمان هو دماغه غريبة..

يا ريت تساعدوني إزاي أفهمه؟؟ وإزاي أحس إني أحلى من البنت اللي هو كان مرتبط بيها هو آه مش بيحبها بس أنا باحس إنها كانت أحسن مني في كل حاجة؟
ag al0ne

صديقتنا العزيزة..
خلينا نتفق في الأول إن ما فيش حد يقدر يرضي جميع الأطراف ولو حتى على حساب نفسه, يعني لو رضتيه يبقى ده على حساب مين؟ هيبقى على حساب نفسك وأهلك, ويؤسفني أقول لك على حساب علاقتك بربنا, فطبعا علاقتك بيه مش ممكن ترضي ربنا؛ لأن ربنا ما بيرضاش إلا عن الحلال, والحلال هو الخطوبة والجواز, مش لأن ربنا بيضيّق علينا وخلاص؛ بس لأنه بيخاف علينا من العلاقات اللي بتبقى فيها المرأة لوحدها, من غير شرع ولا قانون ولا حتى أهل يقدروا ياخدوا لها حقوقها ويحافظوا عليها, وأول حق من حقوقها دي إنها تبقى متصانة وبكرامتها, ما فيش راجل يبص لها نظرة طمع أو نظرة سيئة الظن.
أرجوك لازم تفكري كويس؛ لأنك بترضيه على حساب أهلك, بتخوني ثقتهم فيكِ, وبتخيبي ظنهم فيك, مش معقول يكون جزاؤهم إنك تعملي كده فيهم, حتى لو كانوا قاسيين معاكِ, ففي نظرك إيه اللي مخلي والدتك متغيّرة معاك؟ وإيه اللي بيخلي أختك تعمل لك مشاكل؟ هل لأنهم مش بيحبوك أو بيغيروا منك أو مش عاوزينك سعيدة, وحتى لو كانت أختك ما لهاش نصيب في الحب أو في الجواز لحد دلوقتي, فهل ده معناه إنها هتكره لك الخير والسعادة؟؟ ممكن الغيرة تظهر عليها لو ما قدرتش تسيطر عليها, بس مش ممكن تكرهك وتحقد عليك, ولو ده صحيح كانت شجعتك على اللي بتعمليه, فهي بتهاجمك؛ لأنها خايفة عليك, طبعاً بطريقة غلط, بس دي طريقة تفكيرها, أما بالنسبة لوالدتك فمش ممكن هتعاملك وحش؛ لأنها بتكرهك وعاوزة تنتقم منك مثلاً لأنك بتكذبي عليها, ممكن طريقتها اللي غلط في التصرف معاك, بس أنت اللي وصلتيها لكده لما كذبتي عليها وخونتي ثقتها فيك, طبعا لازم تحتضنك وتكون بئر أسرارك, وصاحبتك اللي مش ممكن تخبي عنها حاجة, بس للأسف هي مش من النوع ده من الأمهات, بس مش معنى كده إنها مش أم بتحبك وبتخاف عليك أكتر من نفسك, دي أمك, والحمد لله إنها عايشة بتوجهك وبتنصحك, فهناك كتير غيرك فقدوا أمهاتهم ويتمنون لو كانوا عاشوا وعملوا فيهم أكتر من كده, اتفقنا أن طريقتها غلط, طيب ليه ما تقربيش أنتِ منها وتشتكي لها، وتفتحي صدرك لها, واطلبي منها تتحملك وتسمعك للآخر؟؟ حاولي وبلاش تخسريها بالشكل ده.
صديقتي الحبيبة, مش معنى إنه بيحبك هو وأهله إنك ترمي نفسك في أحضانهم وتعتبريهم أهلك وتبعدي عن أهلك بالشكل ده, فأمه أو أخته بيحبوك لأنه بيحبك ومبسوط في علاقته بيك, بس أول ما يعرفوا إنه متغيّر منك هيتغيروا زيه, أول ما يفكر إنه يسيبك هيعملوا زيه؛ وده لأن اللي بيهمهم مصلحة ابنهم وسعادته, سواء معاكِ أو مع غيرك, طيب ده حتى أم الزوج وإخواته بيتغيروا على زوجة ابنهم لما يعرفوا إنه متضايق منها أو متخانق معاها حتى لو كان بينهم أولاد, فأرجوك فكري كويس!! وبلاش تخسري كل حاجة علشانه, ولو هو بيحبك بجد يبقى لازم الحب ده يكون بعلم ورضا أهلك, فمش كفاية أهله يعرفوا, فأنت كمان بنت ناس حقهم عليكِ. أما بالنسبة لرغبتك في إنك تجذبيه ناحيتك أكتر علشان ما يفكرش في حبيبته القديمة, فده مش هتقدري تعمليه في المرحلة دي دلوقتي, يخطبك الأول, وساعتها فكري في كده, أما قبل كده فأرجوكِ أرجوكِ اوعي ترضيه على حساب ربنا وأهلك ونفسك, وربنا يحميك, وابقي طمنينا عليكِ.