أنا عايزة حل لمشكلتي والمشكلة بتاعتي سببها أنا.. أنا عندي 25 سنة، وخريجة جامعية، بس مع الأسف ماشتغلتش لحد دلوقتي، ضيعت وقت كتير ما بين إني أدوّر على شغل وعلى كورسات أخدتها وما بين اليأس، ودلوقتي حاسة إني عندي يأس من كل حاجة وفراغ، وحاسة إني كبرت وضيعت حياتي، ودي مشكلتي الأولانية. مشكلتي التانية إني مارتبطتش وحاسة برضه بيأس من الموضوع ده، وماعنديش ثقة في نفسي، وحاسة إني خلاص زهقت مابقيتش مستحملة حد حتى أصحابي ومشكلاتهم، مابقاش عندي خُلق إني أسمع واحدة بتشتكي من حبيبها أو خطيبها، وحاسة إني صعبانة على الناس؛ على الرغم من إني جميلة والحمد لله، وأكتر حاجة مضيقاني إني حاسة إن الناس عارفة مشكلاتي ودي وجعاني أوي، مش عارفة أعمل إيه وأبتدي إزاي؟ نفسي أتغيّر وحياتي تتغيّر.
Light coke
شباب كتير بيعانوا من نفس مشكلتك، "عاوزين نتغيّر وكل حياتنا تتغير"، لكن مش عارفين نبتدي إزاي؟
طب تعالي نفكّر سوا، واحدة واحدة... عندك 25 سنة يعني في عز شبابك وعديتي مرحلة الخطر من مراهقة وغيره، وبقيتي في سن النضج والاختيار، صديقتي السنين العشرة الجايين هم أهم عشر سنين في عمرك كله، من 25 : 35 هم الفترة اللي بيعرف فيها البني آدم معنى وقيمة حياته كلها، بعد 35 بنبدأ نكبر وجسمنا يضعف حتى فرص الستات لإنجاب الأطفال بتكون أقل، لازم تفهمي إن الحياة قصيرة، وعلشان كده لازم نعيشها بأفضل طريقة ممكنة زي ما دكتور شريف عرفة دايما بيقول.
بتقولي إنك دورتي على شغل وأخدتي كورسات، لكن دلوقتي قاعدة في البيت، وسايبة نَفسك لليأس والفراغ، كمان مارتبطيش وده مخليكي ماعندكيش ثقة في نفسك.
طب تعالي نتخيّل سوا حالك بعد 10 سنين كده بالحال اللي وصفتيها دي، مافيش شغل وقاعدة في البيت، نسيتي كل اللي درستيه، جسمك بقى وزنه مرتين، بتقضّي كل وقتك على النت أو في الكلام في التليفونات، أو البكاء والتحسّر على نفسك، لوحدك، عانس، فَقَدت الثقة بنفسك تماما، وفقدت أصحابك واحدة ورا واحدة؛ لإنك زهقتي منهم، ومش مستحملاهم فهما كمان بعدوا وانشغلوا بحياتهم، شوية الجمال اللي عندك كرمشوا، وسن اليأس الحقيقي جاي بدري قوي عن ميعاده.
إيه رأيك.. طبعا زمانك بتصوّتي "يا لهوي"، وتقولي: "أبدا ده مش هيحصل! هتغير وأغير حياتي.. يعني هاغيّر حياتي".
الإرادة يا صديقتي.. اخرجي النهارده للحياة، اشتغلي.. واتعلّمي.. حتى لو شغل تطوعي، اتخيّلي نفسك بعد 10 سنين، زوجة وأم لطفل وناجحة في شغلك وحياتك، وليكي أصدقاء كتير وأهلك بيحبوكي، وعندك عربية صغيرة، تخيّلي نفسك "محاسبة ناجحة، أو صاحبة مشروع ناجح، أو إعلامية مشهورة، شوفي علشان تبقي كده بعد 10 سنين المفروض تبدئي إزاي دلوقتي، إزاي تعملي career منصب وتكون عندك خبرة فيه، البدايات دايما صعبة، وأنا أول ما اشتغلت في إجازة الصيف ماكنتش باقبض غير 80 جنيه في شغلانة قد يعتبرها البعض "مهينة" رغم إنها حلال، بس مع الوقت اتعلّمت.
كل مكان بتشتغلي فيه بتتعلّمي منه حاجة، وكل نشاط بتمارسيه بتكسبي منه حاجة والرزق مش كله فلوس؛ يعني أحيانا المعارف بيساعدوكي في حاجات، وممكن تقابلي شريك حياتك، بس مهم إنك تبقي عارفة إنتي عايزة إيه، علشان تقدري توصلي له.
ودلوقتي هسيبك تحددي مع نفسك إنتي عايزة إيه خلال 10 سنين الجايين؟ عايزة الصورة البشعة اللي رسمتيها في الأول، واللي إنتي بتصنعيها دون ما تحسي، ولا عايزة ترسمي صورة جديدة، تخليكي لما تقفي قدام ربنا ويسألك عن عمرك فيما أفنيته... تعرفي تردّي عليه، ده اختيارك .. وربنا يوفّقك.