حصاوي وحل المشكلة

( المواطن الغلبان حسن حصاوى يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانا يجعل من يسمعه هو الذي يغشى عليه).
( الشاب السلفي يعاود زيارة المقهى الذي يرتاده حصاوي)
السلفي ( وهو يتصفح جرائد الصباح ): الله أكبر. خبر كويس قوي.
حصاوي: إيه ؟ خير؟
السلفي: خير جدّا، مكتوب في الجرايد إن حماس قتلت 18 شخص مرة واحدة.
حصاوي: ياه ..غريبة، يعني مقاومة حماس اتتطورت للدرجة دي؟ وقدرت تقتلهم ازاي؟
السلفي: زى الناس في يوم واحد وماخدوش غلوة.
حصاوي: وليه السرعة دي؟ ما كانوا يستخدموهم بأنهم يبادلوهم بعدد أكبر من الأسرى المسجونين في إسرائيل، يعني يطلبوا منهم يفرجوا عنهم قصاد مية وتمانين فلسطيني ويمكن كمان قصاد 360 مسجون.
السلفي: بس إسرائيل ما كنتش هتوافق.
حصاوي: ازاي؟ دول بيهتموا بكل جندي أو أي فرد إسرائيلي من المدنيين، وأكتر من كده ..
جايز دا يتسبب في سقوط نتنياهو.
السلفي: أنت مخك راح لفين؟ اللي قتلتهم حماس مش من اليهود.
حصاوي: مش معقول. ليه؟ هما من الضفة الغربية أو من منظمة فتح؟
السلفي: لا يا أخي، معقول قادة حماس تقتل حد من فتح؟
حصاوي: معقول جدّا. ما هما تبادلوا القتل بينهم وبين بعض، وكانوا بتوع حماس بالذات ساعات يرموهم من فوق أعلى العمارات ينزلوا ميتين.
السلفي: لا يا سيدي اللي اتقتلوا المرة دي من الفلسطينيين اللي عايشين في غزة .
حصاوي: دا يبقى خبر أوحش.
السلفي: بالعكس؛ لأن اللي نفذوا فيهم القتل كانوا عملاء وخونة لإسرائيل.
حصاوي: آه قلت لي، لكن أنت بتقول إنهم اتقتلوا امبارح. يبقى معقول لحقوا يحققوا معاهم ويتأكدوا إنهم فعلا مجرمين؟
السفلي: مؤكد.
حصاوي: بس الحرب بقالها شهر. فجأة كدا اكتشفوهم واتأكدوا أنهم جواسيس؟
السلفي: طبعا؛ لأن إسرائيل قدرت تقتل لأول مرة تلاتة من قيادة تنظيم حماس، يبقى أكيد لهم عملاء من بينهم.
حصاوي: يا سلام؟ وما فهموش كده غير لما اتقتل لهم تلاتة من الكبار؟ ثم مش ممكن يكون واحد فيهم من اللي أعدموا بريء؟
السلفي: يعني كانوا يعملوا إيه؟
حصاوي: زى الناس يا أخي، يجيبوا لهم محامين يدافعوا عنهم وبعد التحقيق يتأكدوا أنهم كلهم مدانين.
السلفي: ما فيش وقت للكلام دا، دول في حالة حرب.
حصاوي: طب ما هو عندك مرسي وإخوانه اللي بالميات ولسه بيتحاكموا بقالهم أكتر من سنة ولسه ما صدرش ضدهم أحكام.
السلفي: بس احنا مش في حالة حرب.
حصاوي: والإرهابيين اللي عندنا اللي حكمونا وقتلوا ناس كتير ولسه بعد ما اتحبس بعضهم فيه غيرهم برة السجون بيقتلوا وبيفجروا حتى في المدنيين.
السلفي: دول مصريين زينا ولهم رأي ووجهة نظر تانية، مش أعداء ومحتلين الأرض؟
حصاوي: طب وإذا طلع إنهم كانوا أسوأ من المحتلين.
السلفي: هيطعنوا في الحكم وهيبقى فيه نقض.
حصاوي: أنت تعرف إن فيه نزاع بين ممثل فتح في التفاوض وبين ممثل حماس؟
السلفي: دا شأن داخلي بحت. وإحنا لا نتدخل فيه.
حصاوي: ازاي دا احنا السبب في كل اللي حاصل.
السلفي: يعني اعترفت دلوقت بأننا السبب؟
حصاوي: أيوه؛ لأن بتوع حماس موقفين التفاوض على شرط أساسي أهم من كل حاجة، ومصر هي العقبة مش إسرائيل.
السلفي: وإيه هو الشرط دا؟
حصاوي: إن مصر تفتح لهم منفذ رفح بلا قيد ولا شرط. ومالهاش دعوة بأنفاق التهريب من مصر لغزة وإلا هيتخرب بيت القادة الكبار بتوع حماس اللي بياكلوا من وراها شيكولاتة وكراملة.
السلفي: وليه لأ يا أخي؟ ما احنا كلنا عرب.
حصاوي: خلاص بما أننا كلنا عرب، ما نقترح على حماس تخلي مصر هي اللي تهيمن على قطاع حماس وبكدا تتحل المشكلة.
( السلفي: يغشى عليه )
538
لينين الرملي
هرش مخ
25 أغسطس 14
1 الحد الأقصى
على وفد الفصائل الفلسطينية تحديد الحد الأقصى لعدد المقتولين والمصابين المطلوبين من المدنيين العزل في غزة قبل أي مفاوضات مع إسرائيل!.
22
2- الصراع
الصراع الآن على من يتولى المفاوضات مع إسرائيل؛ مصر أم تركيا أم قطر أم أمريكا؟ أم التنظيم الدولي للإخوان في مصر؟!
20
3- في المزاد
الإخوان يطالبون حماس برفض المبادرة المصرية مقابل تمويلها لإعادة تسليحها. مين قال أكتر؟!
13
4- ما يجيبها إلا رجالها
مهما حاولتم فلن يحل النزاع الفلسطيني الإسرائيلي إلا شخص واحد هو جمال عبد الناصر، فهو الوحيد الذي يمكن أن يغني.. انتصرنا ..انتصرنا فيخرس الكل !.
23
5- تسقيفة أمال
( أعلنت قيادات الدعوة السلفية التزاما منها بالقانون الامتناع عن الخطابة لحين الحصول على التصاريح، رغم قدرتهم على الصعود للمنابر).كتر ألف خيركم!.
21
6- حل الأزمة
لماذا لا تجري المفاوضات بين مصر ودولة حماس دون أي أطراف أخرى؟
الخناقة أصلا على فتح معبر رفح المصري ولا شيء آخر !!
23
7- الوطني منور
قيادات الوطني يشكلون تحالفا انتخابيّا وينسقون مع " النور". الظاهر ناويين يقلبوها ضلمة!.
14