أبقى قابلني

المواطن الغلبان حسن حصاوى يغشي عليه من حين لآخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه.
حصاوي جالس بالمقهى فيدخل المثقف يحمل رزمة من الصحف والمجلات
المثقف: خبر هايل قريت اللي مكتوب النهار دا في الجرايد؟
حصاوي: أنا ما بقراش جرايد.
المثقف: عادي.. ما أنت جاهل.. وحتى لو قريت مش هتفهم حاجة.
حصاوي: معلش.. منك نستفيد.. مكتوب إيه بقى؟
المثقف: فتح وحماس.
حصاوي: اشمعني؟
المثقف: هي قافية؟ دا خبر هايل.. فتح وحماس أعلنوا أنهم هيوحدوا المنظمتين وينضموا لبعض.
حصاوي: أبقى قابلني.
المثقف: بقولك الاتنين أعلنوا دا قدام الصحفيين واتصوروا قدام الصحفيين.. لكن أنت ما بتقراش.. الجرايد كاتبة مانشت المصالحة الفلسطينية تزلزل واشنطن وتل أبيب.
حصاوي: برضه أبقي قابلني وتعالى تف في وشي.
المثقف: لأنك متشائم وكئيب.
حصاوي: أنت اللي عندك زهايمر.. بتنسي أننا سمعنا دا ميت مرة.. افتكر كدا لما كان مدير المخابرات بتاعنا كل شويه يقعد مع بتوع فتح وبتوع حماس عشان يصالحهم. وبعدين ما يحصلش حاجة.
المثقف: لأ المرة دي واضح أنهم جادين.
حصاوي: كأن العيب كان فينا إحنا بقى.. يمكن إحنا كنا بنوقع بينهم.
المثقف: لأ طبعا بس كل شيء وله أوان.
حصاوي: طب فهمني فتح هي اللي سعت للمصالحة لأنها يئست من الاتفاق مع إسرائيل ولا حماس هي اللي عقلت لما مصر سدت لهم الإنفاق؟ وبعدين إيه حكاية أن المصالحة زلزلت أمريكا؟.
المثقف: ما أنت لو كنت بتقرا، كان يمكن ربنا نفخ في صورتك وفهمت.
حصاوي: مش الحكومة الأمريكية أكدت أنها لن تعترف بالحكومة الموحدة بين فتح وحماس إلا إذا أعلنت بوضوح تام رفضها ونبذها للعنف وتعترف بصراحة بدولة إسرائيل وتقبل كل الاتفاقيات والالتزمات السابقة.
المثقف: يبقي أمريكا حصل لها زلزال ولا لأ؟.
حصاوي: دا إعلان حرب على الفلسطينيين.. وعشان كده أشك أنه هيحصل أي تغيير.
المثقف: إزاي؟ إذا كانت المنظمتين وقعوا اتفاقية المصالحة علنا.
حصاوي: يا ما وقعوا اتفاقيات وكان الواسطة بينهم كل مرة المرحوم عمر سليمان وبعدين ما حصلش حاجة وكانوا يرجعوا يشتموا بعض ويقتلوا بعض.
المثقف: المرة دي اتحدوا واتفقوا على المصالحة وتشكيل حكومة وفاق وطني في ظرف 6 شهور.
حصاوي: ولزمتها إيه الست شهور؟ ييقى لسه ما اتفقوش.
المثقف: هيتفقوا بالتأكيد.
حصاوي: قول إن شاء الله.
المثقف: إن شاء الله طبعا.
حصاوي: وعلى فكرة كمان لسه فيه مجموعة من الملفات لم يتم الوصول إلى تفاهمات بشأنها.
المثقف: هيوصلوا ويتفقوا وبكره تشوف.
حصاوي: إحنا من سنة 48 بنقول بكرة نشوف، ما بنشوفش غير كلام.. بس شفنا احتلال إسرائيل لتلات دول عربية مصر وسوريا والأردن.. وانقسام الفصائل الفلسطينية لميت حركة ومنظمة.
المثقف: المرة دي هيتجمعوا كلهم.
حصاوي: بس قادة حماس أعلنوا أن المواجهة مع الاحتلال الإسرائيلي ستكون أقرب مما نتخيل جميعا.. يعني كأنهم هيدخلوا حرب.
المثقف: ودا يزعلك في إيه؟ بالعكس.. دا معناه أنهم المرة دي مش هيسيبوا أرضهم وهيقلبوا الترابيزة على إسرائيل.. دا غير أن مصر رحبت بالمصالحة وقالت إنها تأمل في تقدم المفاوضات وإقامة دولة فلسطين المستقلة.
حصاوي: وهي مصر عمرها قالت حاجة غير كده؟ ثم التصريح بيقول تأمل.. يعني ممكن تحصل المصالحة وممكن لأ.. وأمريكا بتحذر وبتهدد بعدم الاعتراف بحكومة فلسطينية ترعي الإرهاب ولا تعترف بإسرائيل.
المثقف: أمريكا تقول زى ما هي عايزه.. المهم إيه اللي هيحصل على أرض الواقع.
حصاوي: أهو دا الكلام.
المثقف: يعني أنت معايا؟
حصاوي: مش لما يحصل اللي بتقول عليه؟.
المثقف: قلت لك هيحصل إن شاء الله
حصاوي: اعتبر دا وعد؟
المثقف: أنت بتهزر؟ ثم تعالى هنا أنت عمال تتكلم كأنك قريت الجرايد اللي عامل نفسك مش بتقراها.
حصاوي: احلف لك أني بطلت أقراها من مدة طويلة.
المثقف: أمال جبت المعلومات دي منين كأنك بتقرا من جرايد النهار دا؟
حصاوي: قريتها كلها من وأنا شاب! بس أنا خايف من حاجة.
المثقف: إيه تاني؟
حصاوي: تفتكر حماس هتقف مع القاعدة اللي في سينا ضدنا ولا ضد إسرائيل؟
(المثقف يغشي عليه)
هرش مخ
الأحد 27 مايو 14
1 تراهني؟
حديث عن المصالحة بين فتح وحماس.. والتي كانت مصر تتبناها، وقد راهنت لسنوات عدة أنها لن تحدث، حد جدع يحب يراهني تاني؟!.
21
2 ولسه
أخيرا عرفنا مهنة حمدين وهو أنه المرشح السابق لجمهورية مصر العربية للمرة الثانية، لكن التالتة تابته!.
16
3 نفس الخطأ
سيأخذ حمدين بعض الأصوات بالتأكيد فنعرف وقتها كم من النخبة عندنا يقعون في نفس الخطأ
مرتين!.
16
4 شطارة
حملة حمدين صباحي تتهم الجميع بتزوير الانتخابات قبل أن تبدأ.. ومستعدين يراهنوا على كده بميت مليون.. بس ممكن ياخدوهم وينسحبوا من دلوقت ويشتكوا برضه!
24
5 الأيدي والأسنان
صرح المخرج خالد يوسف بأن صديقه حمدين قال له "امسك في السيسي بأيديك وسنانك"
وأنا أنصحه أن يمسك بأيديه فقط!
21
6- حمدين في النور
صباحي سيعرض رؤيته على حزب السلفيين.. أغلب الظن وبعض الظن أثم، أنه سيقنعهم بالعدول عن السلفية!!!
17
7 أوباما المسلم
مرسي يعلن (أمريكا مش هتتخلي عن الإخوان ولن تفرج عن باقي المساعدات لمصر إلا بخروجي من السجن). أوباما أسلم يا رجالة!!.