المثقف ينتخب الراحل

(المواطن الغلبان حسن حصاوى يغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه).
حصاوي (جالس يصفر بسرور.. يدخل المثقف وينظر له بعدم ارتياح).
المثقف: مالك مزأطط ومبسوط كده؟
حصاوي: (وهو يدق على المائدة ويغني) السيسي رئيسي.. السيسي رئيسي.
المثقف: لسه ما نجحش في الانتخابات.
حصاوي: ما تزعلش نفسك.. السيسي هيبقى رئيسي.. السيسي هيبقي رئيسي.
المثقف: برضه دا رجم بالغيب.. لما يبقي ينجح أبقى غني.
حصاوي: أفهم من كده أنك ضد السيسي؟
المثقف: لأ.. بس لسه هفكر قبل ما أحط صوتي.
حصاوي: وصوتك مع مين يا تري؟
المثقف: لسه ما أخدتش قرار.. جايز يبقى السيسي وجايز يبقي حمدين صباحى.
حصاوي: مش فاهم.. يا تنتخب دا يا تنتخب دا.. حدد موقفك من دلوقت.
المثقف: اللي أنا شايفه لحد دلوقت أن حمدين مرشح نفسه على مبادئ الزعيم الخالد جمال
عبد الناصر، بينما السيسي لسه ما قالش كده.
حصاوي: بس صور عبد الناصر بتظهر جنب صورة السيسي.
المثقف: الصور دي حطها بعض الناس اللي عايزينه.. مش هو اللي حاطها.
حصاوي: وأنت عايزه يبقى زى عبد الناصر ليه؟
المثقف: وهو دا سؤال يا حمار؟
حصاوي: وهي دي ملافظ يا راجل يا طيب؟ وبعدين أنت عايزه زى أي واحد ليه؟
المثقف: لأن الزعيم كان بطل حقيقي.. ارجع لخطاباته وأنت تعرف.
حصاوي: أنا حافظ كل خطبه.. هو كان بيقول حاجات كتيرة بس ما عملش حاجة من اللي كان بيقولها.
المثقف: زي إيه مثلا؟
حصاوي: وجع دماغنا بالديموقراطية وعمره ما كان ديموقراطي.. لأنه كان بيعمل اللي هو
عايزه وبس.
المثقف: لأنه كان بيحقق لنا الاشتراكية.
حصاوي: إزاي وهو ما اكتشفش الاشتراكية إلا بعد 12 سنة من حكمه؟.
المثقف: وافرض إيه العيب في كده؟
حصاوي: العيب أنه فضل حابس الاشتراكيين حتى بعد ما أعلن الاشتراكية ولا أنت نسيت التاريخ؟
المثقف: بس هو طلعهم بعد كده بشويه وشغلهم معاه.
حصاوي: بعد ما اشترط عليهم يحلوا حزبهم.. وشغلهم في حاجات تافهة.
المثقف: وهما كانوا عدلين ولا ثوريين؟ ثم عيب السيسي أنه جاي من خلفية عسكرية,
بينما إحنا عايزين دولة مدنية.
حصاوي: (يضحك حتى يستلقي على قفاه).
المثقف: أنت بتضحك ليه؟
حصاوي: وهو الزعيم بتاعك كان من خلفية إيه؟
المثقف: دا كانت صدفة لكن هو حكم البلد بحكم مدني.
حصاوي: وهو أنا اللي كنت عينت أنور السادات اللي كان من خلفية عسكرية برضه؟
واللي عملوا بعد كده اشتراكيين من رجالته، ما كانوش من خلفية عسكرية زيه؟
المثقف: دا مش عيب.
حصاوي: مش أنت اللي بتقول السيسي من خلفية عسكرية؟
المثقف: لازم أتأكد وأسمع منه أنه فعلا هيحقق دولة مدنية زى حمدين صباحي.
حصاوي: وهو عبد الناصر ما قعدش يحكمنا شوية بالبدلة العسكرية؟ وعبد الحكيم ما كنش
بيحكم معاه وهو لابس البدلة العسكرية.و يا ريته حقق بيها أي نصر.
المثقف: بس إحنا انتصرنا بعد كده.
حصاوي: دا أيام السادات اللي كان برضه من خلفية عسكرية.
المثقف: لكن خلانا نعمل معاهدة سلام مع إسرائيل.
حصاوي: ما كنش قدامه حل تاني.. لأننا كنا لسه ما خدناش كل سيناء ومع ذلك كنت عايزه يعمل معاهدة سلام مع مين؟ مع منظمة حماس مثلا اللي حاربنا دا كله علشانها؟
المثقف: إحنا حاربنا عشان العروبة كلها.
حصاوي: بس سوريا واليمن بعد ما اتحدوا معانا.. انفصلوا.. وبعدين مش لما نقدر نأكل نص الفقراء عندنا على الأقل؟.
المثقف: (صارخا) أنت بتسفسط.
حصاوي: أدي اللي أنت فالح فيه.. لما تتزنق تعلي صوتك وتقول أي كلام.
المثقف: طب عندا فيك أنا هنتخب حمدين صباحي.
حصاوي: طب ما تختصر وتنتخب الإخوان وخلاص.
المثقف: حمدين مالوش علاقة بالإخوان.
حصاوي: أقولك انتخب الزعيم عبد الناصر وبكده ترتاح وتريحنا.
(المثقف يغشي عليه )
565
لينين الرملي
هرش مخ
الأحد 30 مارس 14
1 - حقوق الملثمين
طلبة ملثمون يلقون زجاجات المولوتوف أمام الجامعات ويهربون. من حق الملثمون أن يكون لهم نفس
حقوق المنقبات!.
18
2 مفاجأة معروفة!
مصدر عسكري يصرح أنه يملك أدلة دامغة على تورط حماس في العمليات الإرهابية في سيناء.
كأننا لم نعرف هذا منذ قيام حماس باحتلال غزة !.
25
3 الجهاد
أعملوا كما فعل عبد الناصر بفتح إذاعة خاصة للفلسطينيين ليهاجموا إسرائيل منها كما يحلو لها!
15
4 إما أو
طلاب الإخوان يتظاهرون في كل مكان ضد ترشيح السيسي بالمولوتوف. فهل هم لا يخشون من حمدين أم يؤيدونه سرا حتى لا يخسر؟!.
23
5 اكشفوا عليهم
لحنة من الأطباء ستكشف عن المرشحين للرئاسة لتتأكد من خلوهم من الأمراض بما فيها جنون
العظمة.. بعض الإعلاميين يحتاجون لنفس هذا الكشف!
22
6- طلعوا من دول
عمرك شفت ألتراس الأندية يشاغب عشان يمنعوا جمهورهم من حضور المبارايات؟ أكشفوا عليهم
لحسن يطلعوا إخوان!.
23
7 اكتساح
إبراهيم المعلم خسر انتخابات الأهلي باكتساح، مع أنه أنكر أنه من الإخوان.. الظاهر الناخبين
ما صدقهوش!.