مرشّح "استبن"

( المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانا يجعل من يسمعه هو الذي يغشى عليه).
( حصاوي يدخل المقهى فيجد المثقف منهمكا في القراءة )
حصاوي: بتقرا في إيه؟ فيه حاجة مهمة؟
المثقف: خبر مش بطال، بيقول لك الأستاذ حمدين صباحي صرح بأنه سيدعم الفريق أول عبد الفتاح السيسي إذا انحاز للثورة.
حصاوي: طيب ليه بتقول مش بطال؟
المثقف: لأنه عكس سياسيين كتير أيّدوه بلا شروط بينما هو ربط التدعيم بشرط وهو انحيازه للثورة.
حصاوي: برضه لسه مش فاهم.
المثقف: يعني إذا لم ينحز للثورة هيكون لحمدين صباحي موقف آخر.
حصاوي: قصدك ساعتها يقف مع مين؟
المثقف: مع نفسه طبعا، يعني ينزل انتخابات الرئاسة
حصاوي: وافرض نزل الانتخابات وما كسبش؟
المثقف: مستحيل
حصاوي: وإيه اللي خلاها مستحيل ؟
المثقف: لأن حمدين صباحي في الحالة دي هيكسبها بلا شك
حصاوي: وإيه اللي خلاها بلا شك؟
المثقف: لأنه منحاز للطبقات الشعبية اللي انت منها، ولأن رجل تاريخه وكفاحه معروفين لكل الناس
حصاوي: بس أنا ما كنتش أعرف
المثقف: انت مش مهم
حصاوي: إزاي بقي؟، دا انت نفسك قلت إني من الطبقات الشعبية.
المثقف: يمكن انت ما عندكش الوعي الكافي عشان تقدر تفرز مين اللي يستحق يفوز بالرياسة.
حصاوي: طب وعيني وعلمني انت.
المثقف: ما أنا وعيتك أهو، وبنصحك في الحالة دي تنتخبه وانت مغمض
حصاوي: يا بخت كل المرشحين بيك، إنما قولي.. هو حمدين دا بيشتغل إيه ؟
المثقف: أولا هو راجل مثقف ثقافة عاليا زيي كده، ثانيا هو راجل ديمقراطي
إلى أبعد حد، دا غير إنه ناصري ومؤمن بالقومية العربية.
حصاوي: ما شاء الله، كده نورتني.
المثقف: أي خدمة، دا واجبي إني أوعيك.
حصاوي: وإيه كمان ؟
المثقف: راجل طاهر ونظيف اليد وقلبه على مصر
حصاوي: بس انت يعني ولا مؤاخذة في دي الكلمة كشفت على قلبه؟
المثقف: من غير ما أكشف كل أفعاله بتدل على كده.
حصاوي: كويس.. زي إيه يعني ؟
المثقف: انت بتختبرني يا فسل ؟
حصاوي: حاشا لله، أنا بستفهم منك بس.
المثقف: عايز تعرف إيه تاني، مش كفاية اللي قلته ؟
حصاوي: أيوه.. بس لسه ما قلتليش هو بيشتغل إيه ؟.
المثقف: وانت مالك ومال شغلته، يكفي إنه أكتر الناس عشقا لمصر وتراب
مصر الغالية.
حصاوي: وتفتكر بقية المرشحين مش بيقولوا كده برضه ؟
المثقف: دا كلام دعاية فارغة، إنما هو حقيقي مش مزيف، والاّ انت بتشك في كلامي ؟
حصاوي: معقولة؟، بس أصل انت ما جاوبتش كل دا على سؤالي الأساسي.
المثقف: اللي هو إيه ؟
حصاوي: ما أنا من الصبح بكرّره عليك وانت مش بتجاوبني، صاحبك ده بيشتغل إيه بالظبط ؟
المثقف: ودا سؤال برضه ؟، بيشتغل في الكفاح السياسي وفي كل المجالات.
حصاوي: معاه شهادة بكده؟
المثقف: انت باين عليك غبي.
حصاوي: متشكر، بس انت برضه ما ريحتنيش، هو بيشتغل إيه؟
المثقف: وإيه فايدة الإجابة ؟
حصاوي: أصل انت باين عليك ما تعرفش شغلته إيه غير إنه عايز يرشح نفسه زي ناس كتير.
المثقف: أنا قايم ومش هتناقش معاك.
حصاوي: تكونش مش عارف شغلته إيه ومكسوف تقول إنك مش عارف؟
المثقف: ( وهو ينهض ) خلاص المناقشة بينا انتهت.
حصاوي: أصل أنا سمعت طراطيش كلام إنه كان معجب بصدام حسين والعقيد
القذافي وكان بيمدح فيهم، بس أنا مش مصدق.
المثقف: شائعات مضللة، قولي بقي انت هترشح مين بسلامتك.
حصاوي: الفريق أول السيسي، هي دي عايزه كلام؟
( المثقف يغشى عليه )
"هرش مخ"
الأحد 19 ينارير 2014
1 - أضعف الإيمان
إذا أردت أن تثبت أنك مسلم ومؤمن صالح - قولا وعملا - اذهب واحرق جامعة الأزهر أو أيّة كنيسة.. وهذا أضعف الإيمان!
2 - مستقبلك
إذا أردت أن تعرف مستقبلك، لا بد أن ترجع أولا إلى تاريخك.
3 - إكرام الحي
إكرام الحي، دفن الميت، فالموتى لا يشمّون الروائح الكريهة بعكس الأحياء، ونفس الأمر
ينطبق على الأفكار القديمة.. لأنها تموت!.
4 - حياتك
حياتك على الأرض قصيرة، فإذا أردت الجنة سارع بالعمل حتى الموت!.
5 - التقدم
إذا أردت أن تتقدم، فاصنع العجلة ولا تستوردها ولا تشحذها!.
6 - طريقك للعبقرية
إذا أردت أن تكون عبقريا، ابدأ واعتبر نفسك غبيا لم تتعلم شيئا، وسوف يبتعد الجميع عنك، وعندئذ فقط حاول أن تفكّر!.
7 - لا تنسَ
في بلادنا، إذا أردت أن تعرف أكثر فلا تنس أن الخطر يختبئ لك خلف أول ناصية!.