حصاوي يغشى عليه !

( المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشى عليه).
( مرة أخرى يدخل حصاوي المقهى، فيجد المثقف جالسا مع مجموعة الشباب
فيشده الفضول أن ينتقي كرسيا بالقرب منهم عله يعرف ما يقولون لكنه يجدهم كالعادة يتكلمون في نفس الوقت، فلا يكاد يفهم شيئا رغم ارتفاع أصواتهم.
وينتبهالمثقف لحصاوي)
المثقف ( للشباب): وطوا صوتكم شويه، الحمار اللي قاعد جنبنا رامي ودنه معانا.
شاب 1: دا تبع المباحث؟
المثقف: لا تبع الحمير، بس غلباوي وأنا بحاول أوعيه.
شاب 2: هو إحنا خايفين من أمثاله؟ لو جدع يتناقش معانا.
المثقف: ما فيش داعي. دا كبير في السن عمره ما هيفهمنا، وطوا صوتكم أحسن.
شاب 3: بتقول إيه؟
حصاوي: ( يتدخل فجأة بصوت عالي): بيقولكم وطوا صوتكم عشان تسمعوا بعض.
شاب 4: وأنت مال أهلك ؟ ما تخليك في نفسك.
حصاوي: عالعموم ما فيش فايدة. دا أنتم بتقولوا نفس الكلام ومع ذلك مش عايزين تسمعوا بعض.
شاب 1: بالعكس إحنا بنتناقش وبنسمع بعض.
حصاوي: ولا بتسمعوا المجتمع اللي أنتم عايشين فيه. بتتكلموا في وادي والناس في وادي تاني خالص.
المثقف إحنا هدفنا مجتمع ليبرالي ديموقراطي حر شعاره عيش حرية وعدالة اجتماعية
حصاوي: كل الأحزاب بتقول نفس الكلام. وأنتم بتأيدوا حمدين صباحي. مش كده ؟
الجميع: طبعا.
المثقف: لأننا شايفين فيه ملامح الزعيم الخالد جمال عبدالناصر.
حصاوي: بس زعيمكم اللي لسه عايشين في عصره، كان غير كده خالص وأنتم ما حضرتهوش و إلا كنتم عرفتم أنه عمره ما كان ليبرالي ولا كان ديموقراطي
ولا اشتركي.
شاب 2: دا افتراء على التاريخ.
حصاوي: أنتم درستم التاريخ في كتب المدرسة اللي أنكتب بتعليمات الزعيم، يعني من طرف واحد يبقى ازاي عرفتوا حقيقته ؟.
المثقف: لا إحنا عارفين التاريخ كويس.
حصاوي: منين ؟ من جرايد الأهرام والأخبار والجمهورية اللي كانت تبع عبدالناصر؟ ولا من مقالات محمد حسنين هيكل ؟ ما حدش كان بيكتب إلا التاريخ اللي عايزه الزعيم، واللي يقول غير كدة يعتقل.
المثقف: كفاية أنه كان ضد أمريكا والغرب كله.
حصاوي: كفاية أزاي؟ صدام والقذافي والأسد وأبنه وبقيتهم كانوا ضد أمريكا لكن كانوا
هما نفسهم دكتاتورين أقسي منهم.
المثقف: يكفي أن هو اللي قاد معركة الاشتراكية.
حصاوي: بعد إيه ؟ الزعيم جه من سنة 52 وكان حاطط الاشتراكيين في السجون
وما عرفش حاجة عن الاشتراكية إلا بعد عشر سنين وما أفرجش عنهم غير لما أجبرهم يكتبوا إقرار بحل حزيهم.
المثقف: لكن خرجوا واشتغلوا معاه وأيدوه.
حصاوي: هما اشتروا حياتهم ونفسهم واضطروا ينافقوا ويمشوا وراه في الزفة.
المثقف هو كان عنده حق، لأن مش كل حد يدعي الاشتراكية، يبقي اشتراكي.
حصاوي: وحمدين بتاعكم اشتراكي؟
الجميع: طبعا.
حصاوي: طب ما هو ناس كتير برضه بتقول أن الفريق السيسي بيفكرهم بزعيمكم الخالد
المثقف: يقولوا زي ما هما عايزين، لكن كفاية أنه من العسكر.
حصاوي: طب ما هو السادات وحسني مبارك كانوا عسكر، والقوات المسلحة هي اللي
أشرفت على انتخابات الرئاسة اللي جابت مرسي المدني بس كان إخوان مسلمين.
المثقف: وإحنا ثائرين عشان نصلح الوضع ده.
حصاوي: أمال ليه ما حدش نطق وقال أن الزعيم الخالد كان من العسكر، هو وكل الشلة اللي كانت معاه طوال حياته وفضل يحكم بيهم لحد ما مات ؟ يعني العبرة مش أن الحاكم ييجي من خلفية عسكرية أو مدنية، المهم مشروعه إيه.
( الكل ينظرون لبعضهم البعض في انتظار أن يتحدث غيره)
حصاوي: يعني سكتوا؟
المثقف: أنت لازم تكون أول واحد يعتقل عشان الثورة تاخد مجراها.
الجميع: ( في نفس واحد ) أيوه.
( حصاوي يغشى عليه ).