حصاوي والشباب

( المواطن الغلبان حسن حصاوى يغشي عليه من حين لآخر. وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه).
( حصاوي يدخل المقهى فيجد المثقف جالسا مع مجموعة من الشباب يلبسون ملابس متشابهة تقريبا ويتناقشون بصوت عالي فجلس بعيدا عنهم ولكنه حاول أن يفهم القضية التي يتحدثون فيها فلم يفهم، وأخيرا نهضوا وتبادلوا الأحضان مع المثقف ومشوا. وتغلب الفضول علي حصاوي وراح للمثقف كي يفهم)
المثقف فاتك نقاش مثير وحيوي جدا يا حصاوي، كان عايزك عشان تدرك الواقع اللي أنت عايشه والمستقبل اللي منتظرنا.
حصاوي قولي الأول هي الخناقة كانت علي إيه بالظبط؟
المثقف مش خناقة يا بني آدم، دا تبادل للرؤى ووجهات النظر المتعددة.
حصاوي بس أنا سامعهم كلهم بيتكلموا في وقت واحد بصوت عالي وساعات يخبطوا علي الطرابيزة.
المثقف فرط حماس لأنهم كانوا بيناقشوا قضاياهم المصيرية.
حصاوي وإيه هي ؟
المثقف أنت حمار يا حصاوي؟ قضيتهم الشباب طبعا. ما خدتش بالك أن كلهم شباب؟
حصاوي خدت بالي أن كلهم لابسين زى بعض تقريبا.
المثقف ما هو دا الشباب. وهما مدعوين للنقاش مع رئيس الجمهورية وقائد الجيش وعدد من الوزراء والمسئولين في جميع المجالات. وهما بيحضروا نفسهم عشان يحطوهم أمام مسئولياتهم الجسام.
حصاوي ما شاء الله أنعم وأكرم بيهم، لكن قولي هو إيه معني الشباب في رأيك؟.
المثقف ودي عايزه تعريف ؟. هم فئة في سن الشباب واللي هيتقلدوا المراكز المهمة في البلد. مش بس في السنوات القادمة لكن من الآن وفورا.
حصاوي بس أنا ما شفتش معاهم بنات.
المثقف دا هيحصل بمجرد ما تدور العجلة.
حصاوي طب وهما العمال ما فيهمش شباب؟
المثقف فيهم طبعا.
حصاوي بس أنا ما شفتش فيهم عمال. ولا فيهم كمان فلاحين وفواعلية وعواطليه وأصحاب مشاريع تجارية وعد بقي باقي كل فئات الشباب في كل المجالات.
المثقف أيوه بس كدا المسألة هتلم وترطرط.
حصاوي يعني الشباب لازم كلهم يبقوا محامين وأطباء ومهندسين ؟
المثقف لأ . بس...
حصاوي ولا فيهم سلفيين؟
المثقف ما خدتش باللي.
حصاوي ولا فيهم إخوانجية ؟ ولا شيعيين ولا نوبيين ولا حرائر ولا ..
المثقف ( مقاطعا ) قصدك إيه من الكلام دا ؟
حصاوي قصدي الشباب مش قبيلة واحدة وحتى كل اللي قلتهم لك دول بينتموا لأحزاب مختلفة وتيارات ضد بعضها. وفيهم اللي مالوش في السياسة أصلا. لكن مع كده لهم آراء متشابهة وطلبات واحدة مع أنهم يمكن ما يعرفوش بعض ومع أن فيهم الأميين و المهمشين. مش كده وبس وفيهم المخبولين زى ما الكبار والعجايز وحتى حزب الكنبة اللي نزل بالملايين مرتين.يبقي ليه بتتكلم عن الشباب كأنهم كتلة واحدة وحزب واحد له خصوصية معينة ؟.
المثقف أنت بتسفسط. الشباب هو عماد كل بلد يريد أن يتقدم.
حصاوي كل بلد عايز يتقدم لازم يستعين بالشباب الصالح بس والواعي بس واللي أفقه متسع ونفس الشيء بالنسبة لبقية الأجيال.الطهارة والثورية والفاعلية مش قاصر علي فئة عمريه واحدة.
المثقف الشباب لهم مطالب.
حصاوي والكبار لهم مطالب والعواجيز لهم مطالب.وما ينفعش الشباب يطالب وبس،
والثورية مش مجرد اندفاع. الثورية محتاجة كمان خبرة وتروي ودراسة.
المثقف بالشكل دا هنستني سنين قبل ما نحقق أي تقدم.
حصاوي أحسن ما نجعجع من غير ما ندرس قوتنا دلوقت والبلد كلها علي كف عفريت
وشباب الإخوان والسلفيين عايزين يهدوا كل شيء فيها ، وإحنا ناقصنا كتير عشان نتغلب علي مشاكل الماضي اللي حصلت بمباركة الشباب اللي بتتكلم عنهم. مصر كانت أحسن مع سعد زغلول والنحاس. وغيره من سياسيين أذكياء وكانت أحسن أيام محمد علي اللي عمل نهضة مصر قبل ما ينطس في مخه علي كبر ويعمل فيها شاب وحب يتوسع ويدخل علي تركيا وكانت النتيجة أن الغرب وقفوا ضده ورجعونا لورا.
المثقف أنت رجعي متعفن.
حصاوي دا اللي أنت والشباب بتوعك اللي صوتهم عالي من غير علم ولا دراسة. لكن
إن شاء الله دا مش هيتكرر تاني, مهما عمل الكلمنجيه اللي زي حضرتك.
( المثقف يغشي عليه )
587
لينين الرملي
هرش مخ
الأحد 9 فبراير 14
1 مرشح الاشتراكية
لا ملامة علي من ذهبوا ليعبوا ذهب صدام والقذافي مقابل تأييده بالطنطة، والآنيستعدون لمعركة الرئاسة ويريدون أن نتبرع له!
20
2 ومرشح الكوبونات
لا لوم علي من اغترف من كوبونات صدام وفلوس القذافي وتمني أن تحذو مصر حذوه.
وهو مرشح لوزارة الثقافة، لأنه ممثل. زغرطوا يا جماعة !
25
3 يوم لك ....
بلاغ للنيابة ضد سامي عنان يتهمه بالتآمر مع الإخوان.لا إله إلا الله.بس خلاص !
14
4 الأمن يصرح
أمن القاهرة يشكو أنه لا يملك سوي سيارة واحدة للكشف عن المتفجرات. يعني ننتظر عدة
تفجيرات في وقت واحد في أماكن متباعدة؟!
22
5 فضيلة السكوت
تصريح للببلاوي يمدح فيه المشير السييسي. وكان من الأفضل له ولمصلحة للسيسي أن يسكت !
14
6 الخنازير
ينتظر أن يعلن الإخوان قريبا أنهم وراء أنفلونزا الخنازير التي تقتل المرضي، خوفا أن تغطي علي إرهابهم !
19
7 عودة ال...
باسم يوسف يعود ببرنامجه قريبا. حاول أن تكمل الجملة السابقة بما تراه مناسبا!
13