( المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانا يجعل من يسمعه هو الذي يغشى عليه). ( المثقف هذه المرة هو الذي يذهب حيث يجلس حصاوي ليتحرش به ) المثقف : ما قولتليش ناوي تنتخب مين للرئاسة يا حصاوي؟ حصاوي: هنتخب اللي معظم الشعب مجمعين عليه. المثقف : أيوه يعني مين ؟ حصاوي: انت على كده مش مثقف بقى ولا حاجة. المثقف: انت يا حمار بتجرؤ تقولّي كده ؟ انت عارف أنا بقرا كام كتاب في الأسبوع ؟ بلاش، بتقرا حتى جرايد ومجلات قدي؟. حصاوي: لا، بس انت تلاقيك بتتفرج ع التليفزيون بس. المثقف: أنا مش تافه زيك عشان أضيع وقتي في إني أتفرج على التلفزيون حصاوي: معلوم، لأنك كل يوم والتاني بتطلع تتكلم فيه، هتلحق تشوفه إمتى. المثقف: أيوه، عشان أنبه وأوعي وأفهّم وأرشد الحمير اللي زيك. حصاوي: طب بذمتك بيفضل لك وقت تقرأ فيه أي حاجة تقولها للناس ؟ دا انت ما شاء الله بتطلع على كل القنوات وبتقول نفس الكلام اللي بنسمعه بقالنا عشرات السنين ويا ريت الناس بتفهم من كلامك حاجة. المثقف: دول الحمير اللي زيك بس. حصاوي: وانت زي الممثلين والمغنيين والراقصين والرقصات، ما هو كله بقى بيطلع دلوقت في التليفزيون عمال على بطال، وبياخدوا رأيهم في أمور السياسة زيهم زيك بالظبط. المثقف: أنا ما ليش دعوة بيهم، دول بيطلعوهم عشان يجذبوا بيهم الناس وخلاص لكن أنا عندي رسالة بوصلها للجماهير. حصاوي: والرسالة دي بتوصلها دليفري للجماهير مجانا؟ والاّ بتهبش بيها قرشين حلوين ؟ المثقف: وانت عايزني أقرا كتب ومراجع عربي وإنجليزي وألبس بدلة كل مرة لون وأروح أتلطع في الاستوديوهات وأقعد انتظر فيها بالساعات وأديهم خبرتي ببلاش؟ حصاوي: يعني على كده انت ناشط تليفزيوني. المثقف: ( بغضب ) إلزم حدّك أنا بقولك أهو. حصاوي: الله دا أنا جيت لك على الوجع بقى. المثقف: تقدر تقولي انت بتتكلم في السياسة إزاي وأنت جاهل لا بتقرا ولا بتكتب ولا بتتابع أي شأن من شؤون وطنك؟ حصاوي: لكن بسمع الناس اللي ما بيتكلموش كتير واللي ما لهاش دعوة بالكلام المجعلص، الناس اللي بتعرف مصلحتهم فين وبيفهموا كل حاجة بقلوبهم وعقولهم من غير سفسطة وكلام ملعبك بيطلع في الآخر ما لوش أي معنى. المثقف: يعني انت مش خايف على البلد ولا قلقان عليها من أي حاجة؟ حصاوي: أقولك الحق، أنا مش خايف غير من السلفيين. المثقف: ما لهم السلفيين؟ ما هما قالوا إنهم لن يعطوا أصواتهم للإخوان. حصاوي: وهما الناس يعرفوا منين؟ دا التصويت سري. المثقف: ما دام أعلنوا كده يبقى كل الأعضاء هيلتزموا بالتصريح ده؟ حصاوي: ما الإخوان كانوا أعلنوا في الأول إنهم مش هيرشحوا نواب في كل الدوائر، وطلع إنهم كدابين، وقالوا إنهم مش هيرشحوا حد منهم للتنافس في الترشيح لرئاسة الجمهورية وبعدين رشحوا بدل الواحد اتنين. المثقف: لكن السلفيين غير الإخوان. حصاوي: بأمارة إيه؟ المثقف: دول فصيل تاني خالص، والمهم إنهم ضد العنف. حصاوي: لكن بيكفروا الناس في حاجات كتير، يعني زي الإخوان بيحشروا الدين في السياسة، يبقوا مش فارقين عنهم، واللي يكفر غيره بعد شوية يلجأ للعنف لو ما سمعناش كلامه، ما دام هما عملوا أوصياء على الدين، كفاية إنهم بيدعونا للدين كأننا كفار، وكفاية إنهم ضد الأزهر وضد المسيحيين ومع جواز القاصرات وغيره وغيره. المثقف: ده رأيهم، وهي دي الديموقراطية. حصاوي: الديموقراطية إن كل صاحب رأي يقبل التاني اللي بيخالفه، مش يكفره كأن هو جاي بدين جديد، هما يقبلوا إن حد يكفرهم؟ المثقف: دي أمور تتحل بالنقاش والجدل، وإلاّ إنت تخاف من النقاش والجدل معاهم؟ حصاوي: أنا مش خايف أنا قلقان بس إنهم يعملوا بلبلة وسط الناس يقوم هما والمرشحين التانيين ياخدوا شويه أصوات قليلة من المرشح بتاعنا. المثقف: بالحق إنت برضه ما قلتليش مين المرشح بتاعكم ؟. حصاوي: يا نهار اسود، إنت لسه ما عرفتوش وبتسأل ؟ إنت ما بتقراش جرايد ولا بتشوف صوره في كل بلد وعلى كل بيت وفي الشوارع والميادين؟ المثقف: مين؟ تقصد الفريق السيسي وإلاّ حمدين صباحي؟ حصاوي: تصدق إن فيه ناس متكلمين معايا عشان أطلع في برنامج سياسي في التليفزيون وكنت بفكر أطلع فيه، بس بعد كلامك ده عمري ما هبقى ناشط تليفزيوني زيك. ( المثقف يغشى عليه ) هرش مخ 1 - يا بخته 3 سيدات هيترشحوا لرئاسة الجمهورية، بينما كل الشخصيات النسائية المعروفة لم تفعلها، يا بخت اللي يتجوز المرشحة - سواء نجحت أو سقطت - حد من الاثنين هيخش المستشفى 2 - فتش عن امرأة متهمة بالتجسس لإسرائيل، على الله الإخوان والسلفيين يقتنعوا إن المرأة لا تقل عن الرجل خسة مثلهم!. 3 - اللي ناقصنا المرشحين ليسوا كثرة حتى الآن، نحتاج إعلاميّاً ورياضيّاً وممثلاً وراقصة، وطاهر أبو زيد لازم يترشح لأن شعبيته زادت قوي!. 4 - فزورة سهلة يا ترى أمريكا وتركيا وقطر وحماس وبيت المقدس هيرشحوا مين؟، طبعا كل الناس عارفة، لذلك لا جائزة لمن يعرف الإجابة!. 5 - عناني عناني.. عناني.. عناني، الاسم ده أنا عارفه، وبالإمارة هو هيرشح نفسه، بس لو حد يفكرني هو مين!. 6 - الجنسية الدستور يمنع ترشيح الذين يحملون جنسية غير مصرية، هارد لك، راحت عليك يا باسم!. 7 - يا خوفي أعلنت أمريكا أنها لا تعتبر زيارة المشير لروسيا تهديدا لها، وتثق أن الانتخابات الرئاسية ستكون نزيهة، استر يا رب!.
