لقد نفد رصيدكم

الامتحانات ع الأبواب.. تخيل إنك رايح تمتحن دلوقت.. دخلت اللجنة وأخدت ورقة الأسئلة
.. بس المراقب قالك: خد بالك الوقت غير محدد.. قولت: يعنى إيه ؟ الوقت مفتوح؟!
قالك: لا يا حلو الوقت محدود بس انت مش من حقك تعرف آخره إمتى متعرفش ورقتك هتتسحب إمتى؟ ممكن نسحبها فى أى وقت بس لما نيجى نسحبها مستحيل تتأخر لحظة واحدة.
- طب إزاى ؟!!!!!!!!
- هو كده.
المهم سعادتك بدأت تجاوب وبتبص حواليك فى اللجنة، لقيت ناس بتموت نفسها علشان تحل ومش مضيعة ثانية واحدة من الوقت.. وناس تانية بتلعب وتتنطط وغفلانة عن الوقت خالص.. قلت فى نفسك ما هو الحكاية سهلة، أقوم ألعب شوية وبعدين أرجع أكمل وبعدين كده كده لسه بدرى مش معقولة الورقة بتاعتى أنا بالذات اللى هتتسحب دلوقتى.. يا ترى لو ده حصل فعلًا هتقول على نفسك إيه؟!
طب ما هو ده حاصل بالفعل!!
كلنا فى الدنيا دلوقت فى امتحان مفتوح ومفيش حد عارف ورقته هتتسحب إمتى
مفيش إنسان يقدر يقطع بميعاد لحظة خروج روحه.. العاقل هو اللى يستغل وقته صح ويخلى حياته كلها طاعة سواء عبادات أو معاملات أو مباحات، واللى مبيفكرش اللى يغفل عن الامتحان المصيرى ويضيع مستقبله الدائم (الجنة) علشان شهوات دنيوية فانية، فيا ترى أنت عامل حساب سحب ورقتك؟.